“Shaxsga doir maʼlumotlar toʻgʻrisida”gi Oʻzbekiston Respublikasi Qonuniga oʻzgartirishlar va qoʻshimcha kiritish haqida (O‘RQ-1125-son)

26.03.2026

Oʻzbekiston Respublikasining Qonuni

Qonunchilik palatasi tomonidan 2026-yil 20-yanvarda qabul qilingan Senat tomonidan 2026-yil 5-fevralda maʼqullangan

Keyingi yillarda mamlakatimizda zamonaviy raqamli iqtisodiyotni rivojlantirishga hamda shaxsga doir maʼlumotlarni himoya qilish sohasini yanada takomillashtirishga qaratilgan keng koʻlamli chora-tadbirlar amalga oshirilmoqda.

Shu bilan birga shaxsga doir maʼlumotlarni saqlash va ularga ishlov berishning alohida shartlarini, shaxsga doir maʼlumotlar bazalarini roʻyxatdan oʻtkazish tartibiga oid normalarni yanada takomillashtirish zaruriyati yuzaga kelmoqda.

Mazkur Qonun bilan “Shaxsga doir maʼlumotlar toʻgʻrisida”gi Oʻzbekiston Respublikasi Qonuniga Oʻzbekiston Respublikasi hududida saqlanishi lozim boʻlgan shaxsga doir maʼlumotlarning roʻyxatini aniqlashtiruvchi, ushbu maʼlumotlar bazalari Shaxsga doir maʼlumotlar bazalarining davlat reyestrida roʻyxatdan oʻtkazilishi lozimligini, shuningdek shaxsga doir maʼlumotlarning Oʻzbekiston Respublikasi hududidan tashqarida saqlanishiga xamda ularga ishlov berilishiga oid shartlarni belgilovchi oʻzgartirishlar va qoʻshimcha kiritilmoqda.

Ushbu Qonun shaxsga doir maʼlumotlarning samarali himoya qilinishini taʼminlashga xizmat qiladi.

1-modda. Oʻzbekiston Respublikasining 2019-yil 2-iyulda qabul qilingan “Shaxsga doir maʼlumotlar toʻgʻrisida”gi OʻRQ-547-sonli Qonuniga (Oʻzbekiston Respublikasi Oliy Majlisi palatalarining Axborotnomasi, 2019-yil, № 7, 385-modda; 2021-yil, № 1, 13-modda, 4-songa ilova; 2023-yil, № 11, 923-modda) kuyidagi oʻzgartirishlar va qoʻshimcha kiritilsin:

1) 3-modda ikkinchi qismining:

ikkinchi xatboshisi kuyidagi tahrirda bayon etilsin:

“jismoniy shaxs tomonidan shaxsga doir maʼlumotlarga shaxsiy va maishiy maqsadlarda ishlov berish”;

toʻrtinchi xatboshisi “davlat sirlarini tashkil etadigan maʼlumotlar” degan soʻzlardan keyin “hamda mudofaa va milliy xavfsizlik masalalariga taalluqli maʼlumotlar” degan soʻzlar bilan toʻldirilsin;

2) 20-moddaning birinchi qismi quyidagi tahrirda bayon etilsin:

“Ushbu Qonun 271-moddasining ikkinchi qismiga muvofiq Oʻzbekiston Respublikasi hududida saqlanishi shart boʻlgan shaxsga doir maʼlumotlar bazalari Shaxsga doir maʼlumotlar bazalarining davlat reyestrida roʻyxatdan oʻtkazilishi lozim”;

3) 271-modda kuyidagi tahrirda bayon etilsin:

“271-modda. Shaxsga doir maʼlumotlarni saqlash va ularga ishlov berishning alohida shartlari

Oʻzbekiston Respublikasi fuqarolarining shaxsga doir maʼlumotlari ushbu Qonunning asosiy prinsiplari taʼminlangan holda saqlanishi lozim.

Quyidagi shaxsga doir maʼlumotlar Oʻzbekiston Respublikasi hududida saqlanishi shart:

jismoniy shaxslarning biometrik maʼlumotlari;

jismoniy shaxslarning genetik maʼlumotlari;

Oʻzbekiston Respublikasi hududida oʻz faoliyatini amalga oshirayotgan telekommunikatsiyalar operatorlaridagi ularning xizmatlaridan foydalanuvchi jismoniy shaxslarning maʼlumotlari.

Ushbu moddaning ikkinchi qismida nazarda tutilmagan shaxsga doir maʼlumotlar kuyidagi shartlardan biri bajarilgan taqdirda, Oʻzbekiston Respublikasi hududidan tashqarida saqlanishi va ularga ishlov berilishi mumkin:

chet davlatni shaxsga doir maʼlumotlarning bir xil himoya qilinishini taʼminlovchi davlat sifatida tan olish;

operator tomonidan vakolatli davlat organi tasdiqlaydigan talablarga javob beruvchi standart shartnomaviy shartlar yoki majburiy korporativ qoidalar qabul qilinishi va ularga rioya etilishi;

roʻyxati vakolatli davlat organi tomonidan tasdiqlanadigan shaxsga doir maʼlumotlarni boshqarish va saqlash sohasidagi xalqaro standartlarga operator tomonidan rioya etilishi.

Shaxsga doir maʼlumotlar bir xil himoya qilinishini taʼminlovchi chet davlatlar roʻyxati Oʻzbekiston Respublikasi Vazirlar Mahkamasi tomonidan belgilanadi”.

2-modda. Oʻzbekiston Respublikasi Ichki ishlar vazirligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.

3-modda. Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin; respublika ijro etuvchi hokimiyat organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

4-modda. Ushbu Qonun rasmiy eʼlon qilingan kundan eʼtiboran kuchga kiradi.

Oʻzbekiston Respublikasining Prezidenti Sh. MIRZIYOYEV

Toshkent sh.,

2026-yil 26-mart,

OʻRQ-1125-son