25-modda. Davlat budjeti mablagʻlari hamda mineral xom ashyo bazasini rivojlantirish va takror hosil qilish davlat dasturlari doirasida tashkilotlarning oʻz mablagʻlari hisobidan geologik jihatdan oʻrganish uchun yer qaʼri uchastkalaridan foydalanish huquqining yuzaga kelishi asoslari
“Yer osti boyliklari toʻgʻrisida”gi Oʻzbekiston Respublikasi Qonuniga oʻzgartishlar va qoʻshimchalar kiritish haqida (444-II-son) · Sana: 13.12.2002 · Amalda
Yer qaʼrini geologik jihatdan oʻrganishning belgilangan tartibda tasdiqlangan loyiha-smeta hujjatlari Davlat budjeti mablagʻlari hamda mineral xom ashyo bazasini rivojlantirish va takror hosil qilish davlat dasturlari doirasida tashkilotlarning oʻz mablagʻlari hisobidan geologik jihatdan oʻrganish uchun yer qaʼri uchastkalaridan foydalanish huquqi yuzaga kelishining asosidir.
Mineral xom ashyo bazasini rivojlantirish va takror hosil qilish davlat dasturlarida nazarda tutilgan geologiya qidiruv ishlarini olib borish uchun loyiha-smeta hujjatlari ekspertizasi Oʻzbekiston Respublikasi Davlat geologiya va mineral resurslar qoʻmitasi tomonidan amalga oshiriladi.
Davlat budjeti mablagʻlari hamda mineral xom ashyo bazasini rivojlantirish va takror hosil qilish davlat dasturlari doirasida tashkilotlarning oʻz mablagʻlari hisobidan yer qaʼrini geologik jihatdan oʻrganish ishlarini boshlash uchun:
yer qaʼrini geologik jihatdan oʻrganish ishlarining davlat hisobi yuritilishi;
davlat ekologik ekspertizasining ijobiy xulosasi;
mahalliy davlat hokimiyati organlarining yer uchastkasi berish toʻgʻrisidagi qarori yoki yer uchastkasidan muddatli foydalanish shartnomasi asos boʻladi.
Yer qaʼrini geologik jihatdan oʻrganishga doir, davlat ekologik ekspertizasi oʻtkazilishini talab qilmaydigan ishlarning roʻyxati Oʻzbekiston Respublikasi Ekologiya va atrof-muhitni muhofaza qilish davlat qoʻmitasi tomonidan tasdiqlanadi.