29-modda. Kompensatsiyalar toʻlash tartibi

Tugatuvchi Agentlikka kompensatsiya toʻlash jarayoniga tayyorgarlik koʻrishga koʻmaklashishi, Agentlik oʻz vazifalarini bajarishi uchun zarur boʻlgan va soʻralgan axborot va maʼlumotlarni unga taqdim etishi shart.

Tugatuvchi kafolatlash hodisasi yuzaga kelgan sanadan eʼtiboran oʻn ish kuni ichida Agentlikka:

omonatchilarning va kafolatlash obyektlarining reyestrini hamda tugatilayotgan bankning omonatchilarga boʻlgan talablari toʻgʻrisidagi axborotni;

kafolatlash obyektlari egalariga toʻlanishi lozim boʻlgan summalar haqidagi, shu jumladan taʼminot sifatida berilgan, xatlangan, sud nizosi predmeti boʻlgan yoki uchinchi shaxslar foydasiga qoʻyilgan kafolatlash obyektlari toʻgʻrisidagi maʼlumotlarni;

tugatilayotgan bankning filial tarmogʻi toʻgʻrisidagi axborotni taqdim etishi shart. Ushbu qismga muvofiq taqdim etiladigan reyestrning, maʼlumotlarning va axborotning shakli Markaziy bank tomonidan belgilanadi.

Ushbu moddaning ikkinchi qismida nazarda tutilgan reyestr, maʼlumotlar yoki axborot oʻzgargan taqdirda, tugatuvchi oʻzgarishlarni inobatga olgan holda uni (ularni) qaytadan taqdim etadi.

Agentlik tugatuvchidan ushbu moddaning ikkinchi qismida koʻrsatilgan reyestr, maʼlumotlar va axborot olingan kundan eʼtiboran ikki ish kuni ichida:

1) ommaviy axborot vositalarida va oʻz rasmiy veb-saytida kafolatlash hodisasi yuz berganligi toʻgʻrisidagi axborotni eʼlon qiladi, axborot quyidagilarni oʻz ichiga olishi kerak:

kompensatsiyalarni toʻlash muddatini, joyini va usulini;

kompensatsiyalarni olish uchun omonatchilar tomonidan bajarilishi kerak boʻlgan shartlarni;

2) omonatchilarga kompensatsiyalarni toʻlash uchun Agentlikka taqdim etilgan reyestrdagi oʻzlariga taalluqli maʼlumotlar bilan tanishish imkoniyatini beradi.

Agentlik tugatilayotgan bank omonatchilarining kamida toʻrtdan uch qismiga kompensatsiyalarni olish imkoniyatini:

2025-yil 1-yanvardan boshlab — kafolatlash hodisasi yuzaga kelgan sanadan eʼtiboran yigirma ish kuni ichida;

2026-yil 1-yanvardan boshlab — kafolatlash hodisasi yuzaga kelgan sanadan eʼtiboran oʻn besh ish kuni ichida;

2027-yil 1-yanvardan boshlab — kafolatlash hodisasi yuzaga kelgan sanadan eʼtiboran yetti ish kunida taʼminlashi shart.

Ushbu modda beshinchi qismining uchinchi xatboshisida nazarda tutilgan holda tugatuvchi Agentlikka ushbu moddaning ikkinchi qismida nazarda tutilgan reyestrni, maʼlumotlarni va axborotni sakkiz ish kuni ichida taqdim etadi, Agentlik esa ushbu moddaning toʻrtinchi qismida nazarda tutilgan tadbirlarni ikki ish kuni ichida amalga oshiradi.