17-modda. Davlat sirlarini tashkil etuvchi maʼlumotlarning maxfiylik darajalari va ushbu maʼlumotlarni tashuvchilarning maxfiylik griflari

Davlat sirlarini tashkil etuvchi maʼlumotlar maxfiyligining quyidagi uchta darajasi va ushbu darajalarga muvofiq boʻlgan mazkur maʼlumotlarni tashuvchilar uchun maxfiylik griflari belgilanadi:

maxfiylikning birinchi darajasi — “Alohida ahamiyatli” (birinchi shakldagi davlat sirlaridan foydalanishga doir ruxsatnomaga muvofiq boʻladi);

maxfiylikning ikkinchi darajasi — “Mutlaqo maxfiy” (ikkinchi shakldagi davlat sirlaridan foydalanishga doir ruxsatnomaga muvofiq boʻladi);

maxfiylikning uchinchi darajasi — “Maxfiy” (uchinchi shakldagi davlat sirlaridan foydalanishga doir ruxsatnomaga muvofiq boʻladi).

Davlat ahamiyatiga ega boʻlgan sirni tashkil etuvchi maʼlumotlarga “Alohida ahamiyatli” yoki “Mutlaqo maxfiy” maxfiylik griflaridan biri beriladi.

Xizmat sirini tashkil etuvchi maʼlumotlarga “Mutlaqo maxfiy” yoki “Maxfiy” maxfiylik griflaridan biri berilishi mumkin.

Davlat sirlari jumlasiga kiritilmagan maʼlumotlar uchun yuqorida koʻrsatilgan maxfiylik griflaridan foydalanishga yoʻl qoʻyilmaydi.

“Alohida ahamiyatli”, “Mutlaqo maxfiy” va “Maxfiy” maxfiylik darajalariga ega boʻlgan davlat sirlaridan foydalanish birinchi shakldagi davlat sirlaridan foydalanishga doir ruxsatnoma mavjud boʻlganda amalga oshiriladi.

“Mutlaqo maxfiy” va “Maxfiy” maxfiylik darajalariga ega boʻlgan davlat sirlaridan foydalanish ikkinchi shakldagi davlat sirlaridan foydalanishga doir ruxsatnoma mavjud boʻlganda amalga oshiriladi.

“Maxfiy” maxfiylik darajasiga ega boʻlgan davlat sirlaridan foydalanish uchinchi shakldagi davlat sirlaridan foydalanishga doir ruxsatnoma mavjud boʻlganda amalga oshiriladi.

Davlat sirlarini tashkil etuvchi maʼlumotlarning maxfiylik darajasi ushbu maʼlumotlar oshkor etilishi natijasida Oʻzbekiston Respublikasining xavfsizligiga yoki davlat sirlaridan foydalanuvchi tashkilotlarning manfaatlariga yetkazilishi mumkin boʻlgan zararning ogʻirlik darajasiga muvofiq boʻlishi kerak.