12-modda. Iqtisodiyot, taʼlim, fan va texnika sohasidagi davlat sirlari jumlasiga kiritiladigan maʼlumotlar

Iqtisodiyot, taʼlim, fan va texnika sohasidagi davlat sirlari jumlasiga quyidagilar kiradi:

1) Oʻzbekiston Respublikasi iqtisodiyotining urush davrida barqaror ishlashiga tayyorgarligini belgilovchi koʻrsatkichlar toʻgʻrisidagi maʼlumotlar;

2) iqtisodiyotning turli tarmoqlarida prinsipial jihatdan yangi buyumlarni, texnologik jarayonlarni yaratishda foydalanilishi mumkin boʻlgan, shuningdek qurol-yarogʻ va harbiy texnika imkoniyatlarining, ularning jangovar samaradorligini oshirishning sifat jihatidan yangi bosqichini belgilovchi fan va texnika sohasidagi yangi yutuqlarning mohiyatini fosh etuvchi maʼlumotlar;

3) Oʻzbekiston Respublikasining mudofaasi va xavfsizligi manfaatlarini koʻzlab olib boriladigan ilmiy-tadqiqot, tajriba-konstruktorlik yoki loyihalash ishlarining mazmunini va yoʻnaltirilganligini fosh etuvchi maʼlumotlar;

4) Oʻzbekiston Respublikasining xavfsizligini taʼminlash manfaatlarini koʻzlab olib boriladigan gidrometeorologiya yoki geliogeofizika sohasidagi ishlarning natijalarini, shuningdek maxsus geologik-geofizik tadqiqotlar natijalarini fosh etuvchi maʼlumotlar;

5) metallurgiya sanoati tomonidan ayrim turdagi nodir metallarni va strategik ahamiyatga ega boʻlgan boshqa materiallarni ishlab chiqarish haqidagi maʼlumotlar;

6) yer qaʼridagi resurslar potensialini, balans zaxiralarni yoki ayrim turdagi foydali qazilmalarni qazib olish toʻgʻrisidagi axborotni fosh etuvchi maʼlumotlar;

7) davlat organlari smetalarining alohida moddalari boʻyicha qoʻshinlarni saqlash uchun sarflanadigan xarajatlarni fosh etuvchi maʼlumotlar;

8) davlat hujjatlarini qalbakilashtirishdan himoya qilish usullari va ularning haqiqiyligini aniqlash usullari toʻgʻrisidagi maʼlumotlar;

9) umumiy foydalanishdagi mahsulotni, xomashyoning strategik turlarini ishlab chiqarishga doir safarbarlik quvvatlari hamda ushbu quvvatlarni yaratish va rivojlantirish haqidagi maʼlumotlar;

10) indikatsiya, gazdan tozalash, aholini ommaviy qirgʻin qurolidan kimyoviy himoya qilish vositalarini yoki ushbu vositalar uchun yangi sorbsion va boshqa materiallarni yaratish maqsadida amalga oshiriladigan ishlarni fosh etuvchi maʼlumotlar;

11) muhim mudofaa yoki iqtisodiy ahamiyatga ega boʻlgan topografik, geodezik yoki kartografik faoliyat natijalarini fosh etuvchi maʼlumotlar;