21-modda. Bolalarni zoʻravonlikning barcha shakllaridan himoya qilishga doir faoliyatni amalga oshiruvchi davlat organlari va tashkilotlarning hamkorligi

Bolalarni zoʻravonlikning barcha shakllaridan himoya qilishga doir faoliyatni amalga oshiruvchi davlat organlari va tashkilotlar bolalarni zoʻravonlikning barcha shakllaridan himoya qilish sohasidagi tadbirlarni oʻtkazishda quyidagi yoʻnalishlar boʻyicha hamkorlik qiladi:

axborotning maxfiyligi talablariga rioya etgan holda oʻzaro xabardor qilish, shuningdek bolalarga nisbatan aniqlangan zoʻravonlik faktlari yoki oʻziga nisbatan zoʻravonlik sodir etilishi xavfi ostida boʻlgan bolalar toʻgʻrisida vakolatli davlat organini xabardor qilish;

bolalarga nisbatan zoʻravonlik hollarini va ularning oqibatlarini kompleks baholash hamda zoʻravonlikdan jabrlanuvchilarga tegishli yordam koʻrsatish;

bolalarga nisbatan zoʻravonlikning oldini olish, uni bartaraf etish hamda unga qarshi kurashish sohasidagi chora-tadbirlarni birgalikda amalga oshirish va tajriba almashish;

bolalarga nisbatan zoʻravonlikning oldini olish, uni bartaraf etish hamda unga qarshi kurashish boʻyicha idoralararo qoʻshma qarorlar qabul qilish;

bolalarga nisbatan zoʻravonlikning oldini olish, uni bartaraf etish hamda unga qarshi kurashish sohasidagi faoliyatni amalga oshiradigan mutaxassislarni tayyorlash va ularning malakasini oshirish;

bolalarni zoʻravonlikning barcha shakllaridan himoya qilish toʻgʻrisidagi qonunchilikka rioya etilishi yuzasidan monitoringni amalga oshirish, qonunchilikni va huquqni qoʻllash amaliyotini takomillashtirish boʻyicha takliflar ishlab chiqish.