6-modda. Psixologik yordamning turlari va shakllari

Psixologik yordam turlari jumlasiga quyidagilar kiradi:

psixologik profilaktika;

psixologik koʻrik;

psixologik reabilitatsiya;

psixologik korreksiya;

psixologik maslahat;

psixologik trening.

Psixologik muammolarni keltirib chiqaruvchi omillar va shart-sharoitlarning oldini olish hamda ularni bartaraf etishga doir chora-tadbirlar psixologik profilaktikadir.

Psixologik koʻrik shaxsning normal hayot kechirishiga xalal beruvchi, uning xulq-atvoriga va boshqa shaxslar bilan oʻzaro munosabatlariga salbiy taʼsir qiluvchi muammolarni aniqlash, shaxsga koʻrsatilishi kerak boʻlgan psixologik yordamning turini, shaklini, hajmini va muddatlarini belgilash uchun zarur boʻlgan xususiyatlarni baholash maqsadida oʻtkaziladi.

Psixologik reabilitatsiya psixologik muammolari mavjud boʻlgan shaxsning ijtimoiy moslashishiga yordam koʻrsatishga hamda unga ushbu sohadagi qobiliyatlarini tiklashda koʻmaklashishga qaratilgandir.

Psixologik korreksiya shaxsning psixologik muammolarga olib keluvchi oʻziga xos shaxsiy xususiyatlari va xulq-atvorini tuzatishga (oʻzgartirishga) qaratilgan tadbirlar majmuidan iborat.

Shaxsning psixologik muammolarini tushunishga va ularni yechishda koʻmaklashishga qaratilgan psixologik yordam psixologik maslahatdir.

Psixologik trening insonda shaxsiy rivojlanishi uchun zarur boʻlgan muayyan koʻnikmalarni, xulq-atvorni yoki psixologiya sohasiga taalluqli yangi bilimlarni shakllantirishga yoki uni tang (krizisli) vaziyatlardan chiqarishga, shuningdek shaxsning maʼnaviy kamol topishini psixologik jihatdan qoʻllab-quvvatlashga qaratilgan tadbirlardan, shu jumladan mashgʻulotlardan iborat boʻladi.

Aholiga psixologik yordam koʻrsatish bevosita yoki axborot-kommunikatsiya texnologiyalaridan foydalangan holda, shuningdek yakka tartibda yoki guruhlarda amalga oshirilishi mumkin.

Aholiga psixologik yordam koʻrsatish shoshilinch, bir martalik, qisqa muddatli va uzoq muddatli boʻlishi mumkin.

Psixologik yordamning aniq turi va shakli psixologik yordam koʻrsatilishini soʻrab murojaat qilgan shaxsning ruhiy holatidan hamda psixologik muammolarining oʻziga xos xususiyatlaridan kelib chiqqan holda, psixologning tavsiyalariga asosan ushbu shaxs tomonidan tanlanadi.