15-modda. Psixologik yordam koʻrsatilishini soʻrab murojaat qilgan shaxsning huquq va majburiyatlari

Psixologik yordam koʻrsatilishini soʻrab murojaat qilgan shaxs quyidagi huquqlarga ega:

psixologni, psixologik yordamning shakli va turini, uning koʻrsatilish shartlarini mustaqil tanlash, shuningdek psixologning malaka sertifikati bilan tanishish;

psixolog tomonidan oʻziga nisbatan insoniy muomalada boʻlinishini, shaʼni, qadr-qimmati va ishchanlik obroʻsi hurmat qilinishini talab qilish;

yoshi, jinsi, irqi, millati, tili, dini, eʼtiqodi, ijtimoiy kelib chiqishi, ijtimoiy mavqeyidan qatʼi nazar, malakali psixologik yordam olish;

psixologik yordam koʻrsatish vaqtida foto-, video- va ovoz yozilishini rad etish;

psixologik yordam koʻrsatishning istalgan bosqichida uni rad etish;

oʻziga koʻrsatilgan psixologik yordamning shakli, turi va boshqa maʼlumotlar koʻrsatilgan hujjatdan koʻchirma olish;

psixologik yordam koʻrsatilishi natijasida maʼlum boʻlib qolgan shaxsga doir maʼlumotlarining sir saqlanishi.

Psixologik yordam koʻrsatilishini soʻrab murojaat qilgan shaxs qonunchilikka muvofiq boshqa huquqlarga ham ega boʻlishi mumkin.

Psixologik yordam koʻrsatilishini soʻrab murojaat qilgan shaxs:

psixologga nisbatan insoniy munosabatda boʻlishi, uning shaʼni, qadr-qimmatini va ishchanlik obroʻsini hurmat qilishi;

psixologik yordam olganlik uchun psixologik yordam koʻrsatish toʻgʻrisidagi shartnomaga muvofiq toʻlovni amalga oshirishi shart.

Psixologik yordam koʻrsatilishini soʻrab murojaat qilgan shaxsning zimmasida qonunchilikka muvofiq boshqa majburiyatlar ham boʻlishi mumkin.