67-modda. Uglevodorodlarni rekognossirovka qilishga doir ruxsatnomani olgan yer qaʼridan foydalanuvchilarning huquqlari

Uglevodorodlarni rekognossirovka qilishga doir ruxsatnoma yer qaʼridan foydalanuvchilarga ruxsatnomaga kiritilgan yer qaʼri uchastkasi doirasida quyidagi huquqlarni beradi:

1) uglevodorodlarning biror-bir konlarini aniqlash salohiyatini baholash maqsadida dala kuzatuvlarini, geologik, petrofizik, geofizik, geokimyoviy va geotexnik tadqiqotlarni olib borish orqali, shu jumladan masofadan zondlash usullarini qoʻllagan holda geologik qatlamlarning tuzilishi va tarkibini geologik jihatdan oʻrganishni amalga oshirish;

2) kimyoviy va boshqa tahlilni, sinovlarni, tadqiqotlarni yoki ilmiy tajribalarni amalga oshirish maqsadlari uchun ruxsatnomada nazarda tutilgan yer qaʼri uchastkasidan uglevodorodli namunalarni chiqarib olish va olish;

3) zarur boʻlgan taqdirda, ruxsatnomaning shartlarida koʻrsatilgan, tuproq yuzasidan 300 metrdan oshmasligi kerak boʻlgan chuqurlikkacha uncha chuqur boʻlmagan burgʻilashni amalga oshirish;

4) uglevodorodlarni rekognossirovka qilish uchun zarur boʻlgan va bu bilan bogʻliq istalgan boshqa ishlarni ruxsatnomaga muvofiq amalga oshirish.

Agar uglevodorodlarni rekognossirovka qilishga doir ruxsatnomaning shartlarida boshqacha qoida nazarda tutilmagan boʻlsa, ushbu moddaning birinchi qismida koʻrsatilgan huquqlar mutlaq huquq boʻlmaydi. Yer qaʼridan foydalanish markazi ushbu Qonun qoidalariga muvofiq uglevodorodlarni rekognossirovka qilishga doir ruxsatnoma doirasida yer qaʼridan foydalanuvchi tomonidan toʻlangan yigʻimlarni qaytarish boʻyicha biror-bir javobgarlik yoki majburiyat yuzaga kelmagan holda, uglevodorodlarni rekognossirovka qilishga doir berib boʻlingan ruxsatnoma tarkibiga kiradigan yer uchastkasining istalgan qismida uglevodorodlarni geologik jihatdan oʻrganishga doir ruxsatnoma berishga haqli.

Yer qaʼridan foydalanuvchi ushbu Qonun qoidalariga muvofiq uglevodorodlarni rekognossirovka qilishga doir ruxsatnomaga kiritilgan yer qaʼri uchastkasi doirasida olib boriladigan biror-bir geologik yoki boshqa tadqiqotlarni sharhlashga oid natijalar va hisobotlarni oʻz mablagʻlari hamda sarf-xarajatlari hisobidan sotish va tarqatish uchun tayyorlashga haqli.

Uglevodorodlarni rekognossirovka qilishga doir ruxsatnomaning berilishi kadastr kvadrati yuzasi yer uchastkasining yoki uglevodorodlarni rekognossirovka qilishga doir ruxsatnomaga kiritilgan yer qaʼri uchastkasining biror-bir qismiga nisbatan uglevodorodlarni geologik jihatdan oʻrganishga doir ruxsatnomani yoki uglevodorodlarni qazib olishga doir ruxsatnomani berishga oid biror-bir ustuvor huquqni bermaydi.