136-modda. Yer qaʼridan foydalanish chogʻida sanoat xavfsizligi

Yer qaʼridan foydalanish, shu jumladan ishlab chiqarish obyektlarini va boshqa obyektlarni rejalashtirish hamda loyihalashtirish sanoat xavfsizligi talablariga muvofiq boʻlishi kerak.

Yer qaʼridan foydalanuvchilar tomonidan ishlarni xavfsiz amalga oshirish boʻyicha qonunchilikda nazarda tutilgan qoidalar va normalarga rioya etilishi, shuningdek avariyalarning oldini olish va oqibatlarini bartaraf etish, ishlab chiqarishdagi baxtsiz hodisalar yuzaga kelishining oldini olish hamda kasb kasalliklari profilaktikasi boʻyicha tadbirlar oʻtkazilishi taʼminlanishi kerak.

Odamlarning hayoti va sogʻligʻiga xavf soladigan, yuridik va jismoniy shaxslarga moddiy zarar yetkazadigan yer qaʼridan foydalanishga doir faoliyat taqiqlanadi.

Yer qaʼridan foydalanuvchi tashkilotlarda sanoat xavfsizligi talablariga rioya etilishini taʼminlash uchun javobgarlik ularning rahbarlari zimmasiga yuklatiladi, ular tarkibiy boʻlinmalarda sanoat xavfsizligi talablariga rioya etilishi ustidan nazoratni amalga oshiruvchi shaxslarni belgilaydi.

Ushbu Qonunda nazarda tutilgan hollarda yer qaʼridan Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasi bilan kelishilmagan holda foydalanish taqiqlanadi.