129-modda. Yer qaʼridan foydalanish chogʻida ekologik xavfsizlikni taʼminlash boʻyicha umumiy qoidalar

Yer qaʼridan foydalanish, shu jumladan ishlab chiqarish obyektlarini va boshqa obyektlarni rejalashtirish hamda loyihalashtirish ekologiya toʻgʻrisidagi hamda boshqa qonunchilik talablariga muvofiq amalga oshirilishi kerak.

Yer qaʼrining ekologik holati eng yuqori yoʻl qoʻyiladigan tashlanmalarni, chiqindilarni normalashtirish, shuningdek yer qaʼridan foydalanish boʻyicha faoliyatning ayrim turlarini cheklash yoxud taqiqlash orqali taʼminlanadi.

Yer qaʼridan foydalanishga faqat tegishli ekologik ekspertiza oʻtkazilganidan keyin yoʻl qoʻyiladi. Yer qaʼri uchastkasida faoliyatni amalga oshirayotgan har qanday shaxs atrof-muhitga qasddan yoki ehtiyotsizlik tufayli biror-bir moddiy yoxud jiddiy zarar yetkazmasligi yoki yer qaʼri uchastkasida yoxud uning doirasida atrof-muhitning muhofaza qilinishini taʼminlash maqsadida berilgan biror-bir materiallar yoki uskunalardan belgilanganidan boshqacha maqsadda foydalanmasligi kerak.

Yer qaʼridan va foydali qazilmalar resurslaridan foydalanishga faqat quyidagi shart bilan yoʻl qoʻyiladi:

1) qazib olish chogʻida yer qaʼridan va foydali qazilmalardan hamda ular bilan bogʻliq tabiiy resurslardan kompleks va tejamli foydalanilishini taʼminlash, shuningdek atrof-muhit va yer qaʼri ifloslanishining oldini olish;

2) foydali qazilmalarni qazib olish chogʻida buzilgan yerlarni rekultivatsiya qilish;

3) qoplama togʻ jinslari va aralashma togʻ jinslarining toʻkindi uyumlarini, chiqindi saqlash joylarini, terrikonlarni atrof-muhitga eng kam zararli taʼsir koʻrsatilishini taʼminlaydigan holda joylashtirish;

4) suvdan maxsus foydalanishga yoki maxsus suv isteʼmoliga doir ruxsatnomalar olish.

Barcha yer qaʼridan foydalanuvchilar oʻzlari tomonidan yer qaʼridan foydalanish chogʻida buzilgan kadastr kvadrati yuzasidagi yer uchastkalarini keyinchalik foydalanish uchun yaroqli holatga keltirishi shart.

Qattiq holdagi foydali qazilmalarni yoki uglevodorodlarni qazib olish chogʻida yer osti suvlarining kon qazishmalariga yoki infratuzilma obyektlariga texnologik jihatdan muqarrar ravishda kirishiga qonunchilik hujjatlariga muvofiq berilgan suvdan maxsus foydalanish yoki maxsus suv isteʼmoliga doir ruxsatnomalar talab qilinmaydi.

Kon qazishmalariga yoki infratuzilma obyektlariga kirayotgan yer osti suvlaridan foydalanish qonunchilik hujjatlariga muvofiq amalga oshiriladi.