127-modda. Kolleksiya materiallarining namunalarini toʻplash boʻyicha ishlarni amalga oshirish

Kolleksiya materiallarining namunalarini toʻplash quyidagi maqsadlarda amalga oshiriladi:

1) geologiya, mineralogiya, paleontologiya va oʻlkashunoslik muzeylarining ilmiy kolleksiyalarini butlash hamda toʻldirish;

2) taʼlim muassasalarining oʻquv kolleksiyalarini butlash va toʻldirish;

3) ilmiy-maʼrifiy va estetik maqsad uchun moʻljallangan xususiy geologiya hamda paleontologiya kolleksiyalarini butlash hamda toʻldirish (bundan tarkibida qimmatbaho metallar va toshlar mavjud boʻlgan namunalar mustasno).

Yer qaʼridan foydalanuvchidan kolleksiya materiallarining namunalarini toʻplash uchun loyiha taqdim etish talab qilinmaydi.

Kolleksiya materiallarining namunalarini toʻplash uchun kadastr kvadrati yuzasining yer uchastkalari berilishiga yoʻl qoʻyilmaydi.

Kolleksiya materiallarining namunalarini toʻplash chogʻida kon-burgʻilash ishlarini amalga oshirish hamda yer qaʼrining yaxlitligini buzadigan turli asbob-uskunalardan foydalanish taqiqlanadi.

Kolleksiya materiallarining namunalarini toʻplash, agar qonunchilik hujjatlarida boshqacha qoida nazarda tutilmagan boʻlsa, davlat ekologik ekspertizasini hamda Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasi bilan kelishishni talab etmaydi.

Kolleksiya materiallarining namunalarini toʻplash uchun yer qaʼri uchastkasidan foydalanish tugatilganda yer qaʼridan foydalanish oqibatlarini bartaraf etish ishlarini amalga oshirish talab qilinmaydi.

Kolleksiya materiallarining namunalarini toʻplashga doir ruxsatnomadan boshqa shaxs foydasiga voz kechilmaydi. Kolleksiya materiallarining namunalarini toʻplashga doir ruxsatnomaning amal qilish muddati tugaguniga qadar yer qaʼridan foydalanuvchi istalgan vaqtda Yer qaʼridan foydalanish markazini bu haqda yozma yoki elektron shaklda xabardor qilib kadastr kvadratlaridan voz kechish huquqiga ega.

Ruxsatnoma berilgan yer qaʼri uchastkasining bir qismini qaytarib berish qolgan yonma-yon boʻlishi kerak boʻlgan kadastr kvadratlariga kolleksiya materiallarining namunalarini toʻplashga doir ruxsatnomani qayta rasmiylashtirish orqali amalga oshiriladi.