108-modda. Bir hududda turli yer qaʼridan foydalanuvchilar tomonidan yer qaʼridan foydalanish

Yer qaʼrining turli foydalanuvchilari, agar ushbu Qonunda boshqacha qoida nazarda tutilmagan boʻlsa, ayni bir kadastr kvadratlari (bundan buyon matnda birlashtirilgan hudud deb yuritiladi) doirasida yer qaʼridan foydalanish ishlarini amalga oshirishga haqli emas.

Yer qaʼri uchastkasidan foydalanish huquqiga doir ruxsatnoma ayni bir kadastr kvadratlariga yer qaʼridan foydalanishning boshqa turiga doir oʻzga ruxsatnoma sifatida berilishi mumkin boʻlib, bunda ikkinchi ruxsatnoma doirasida amalga oshiriladigan faoliyat mavjud ruxsatnoma doirasida amalga oshiriladigan faoliyatga taʼsir koʻrsatmaydigan chuqurlikda amalga oshirilishi shart. Har qanday holda, biror-bir yer osti inshootlaridan (quduqlar, shurflardan) va ularning kommunikatsiya yoʻlaklaridan besh yuz metr radiusda joylashgan uchastkalarda yer qaʼridan foydalanishga doir mavjud ruxsatnomada nazarda tutilgan kadastr kvadratlariga oid boshqa ruxsatnoma berish taqiqlanadi.

Boshqa ruxsatnomada koʻrsatilgan ayni bir kadastr uchastkalariga yer qaʼridan foydalanishga doir ruxsatnoma, agar ikkinchi ruxsatnoma boʻyicha amalga oshirilayotgan faoliyat faqat bunday ruxsatnoma boʻyicha faoliyat mavjud ruxsatnomaga taʼsir qilmaydigan chuqurlikda amalga oshirilsa, berilishi mumkin. Yer osti inshootlaridan (quduqlar, shurflardan) va ularning kommunikatsiya yoʻlaklaridan besh yuz metr radiusda joylashgan uchastkalarda har qanday hollarda, ilgari amalda boʻlgan ruxsatnomada ham nazarda tutilgan ayni oʻsha kadastr maydonlarini qamrab oluvchi boshqa ruxsatnoma berish taqiqlanadi.

Bunday hollarda arizachi ilgari berilgan ruxsatnoma amal qilayotgan kadastr uchastkalariga doir ruxsatnoma olish uchun Yer qaʼridan foydalanish markaziga va faoliyat koʻrsatayotgan yer qaʼridan foydalanuvchiga amaldagi ruxsatnomada nazarda tutilgan kadastr uchastkasiga bunday yangi ruxsatnomani berish mavjud yer qaʼridan foydalanuvchining faoliyatiga monelik qilmasligining oqilona taʼminotini berishi kerak.

Birlashtirilgan hududda yer qaʼridan foydalanuvchilar uchun faoliyatni amalga oshirish tartibi ular oʻrtasida tuzilgan kelishuvda belgilanadi. Kelishuvda birlashtirilgan hududda yer qaʼridan foydalanish boʻyicha barcha yoki ayrim turlardagi ishlarni olib borish shartlari va tartibi belgilanadi.

Kelishuv oddiy qogʻozda tuziladi hamda yer qaʼridan foydalanuvchilar tomonidan Yer qaʼridan foydalanish markaziga va tegishli mahalliy ijro etuvchi hokimiyat organlariga kelishuv tuzilgan kundan eʼtiboran besh ish kuni ichida taqdim etiladi.