106-modda. Yer ostida saqlashga doir ruxsatnomaga ega boʻlgan yer qaʼridan foydalanuvchilarning huquq va majburiyatlari

Yer ostida saqlash uchun geologik jihatdan oʻrganishga doir ruxsatnomasiz yoki yer ostida saqlashga doir ruxsatnomasiz yer ostida saqlash uchun yer qaʼri makonidan foydalanish taqiqlanadi.

Yer ostida saqlash uchun geologik jihatdan oʻrganishga doir ruxsatnomaga ega boʻlgan yer qaʼridan foydalanuvchi zarur ekologik ekspertizani oʻtkazganidan va davlat ekologik ekspertizasining hamda Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasining ijobiy xulosasini olganidan keyin ushbu Qonunning 102-moddasiga muvofiq taqdim etilgan geologik jihatdan oʻrganish loyihasida nazarda tutilgan faoliyatni amalga oshirishga haqli.

Yer ostida saqlashga doir ruxsatnomaga ega boʻlgan yer qaʼridan foydalanuvchi quyidagilarni taʼminlashi shart:

1) qoʻllaniladigan texnik vositalarning maqbulligi va xavfsizligini;

2) yer qaʼri xavfli texnogen jarayonlarning koʻrinishlaridan muhofaza qilinishini;

3) qattiq, suyuq holdagi va radioaktiv chiqindilarni, zararli zaharli moddalarni saqlash yoki koʻmib tashlashda, oqova suvlarni, sanoat suvlarini va texnik suvlarni oqizib yuborishda (nasos bilan haydashda) ishonchli hisobga olishni;

4) geologik axborotning, shu jumladan laboratoriya tadqiqotlari hamda tahlillarining toʻgʻriligini va but saqlanishini.

Saqlash boʻyicha yer qaʼridan foydalanuvchi yer qaʼridan foydalanish oqibatlarini tugatishga doir oʻz rejasini tuzish, yangilash va unga amal qilish yuzasidan ushbu Qonunning 15-bobi talablariga rioya etishi shart.

Yer ostida saqlashga doir ruxsatnomaga ega boʻlgan yer qaʼridan foydalanuvchi yer qaʼri uchastkasidan quyidagi ishlarni amalga oshirish uchun foydalanish huquqiga ega:

1) neft va gaz, gaz va neft mahsulotlarining yer osti omborlarini joylashtirish hamda ulardan foydalanish;

2) qattiq, suyuq holdagi va radioaktiv chiqindilarni, zararli zaharli moddalarni saqlash yoki koʻmib tashlash, yer qaʼriga oqova suvlarni, konchilik faoliyati chiqindilarini, sanoat ahamiyatidagi suvlarni va texnik suvlarni oqizib yuborish (nasos bilan haydash) uchun yer osti inshootlarini joylashtirish va (yoki) ulardan foydalanish;

3) yer osti suvlarining zaxiralarini sunʼiy ravishda toʻldirish uchun yer qaʼriga suvni nasos bilan haydab kiritish, shu jumladan shu maqsadlar uchun moʻljallangan yer osti inshootlarini qurish va (yoki) ulardan foydalanish.