“Radiochastota spektri toʻgʻrisida”gi Oʻzbekiston Respublikasi Qonuniga oʻzgartishlar kiritish haqida (O‘RQ-858-son)

02.08.2023

Oʻzbekiston Respublikasining Qonuni

Qonunchilik palatasi tomonidan 2023-yil 31-yanvarda qabul qilingan Senat tomonidan 2023-yil 23-iyunda maʼqullangan

Keyingi yillarda borish qiyin boʻlgan va olis hududlarda mobil aloqa hamda mobil internet qamrovini kengaytirish, koʻrsatilayotgan aloqa xizmatlarining sifatini oshirish yuzasidan keng koʻlamli ishlar amalga oshirilmoqda.

Biroq radiochastota spektridan foydalanuvchilarning oʻz radiochastota spektridan foydalanish huquqini boshqa shaxsga berishiga nisbatan mavjud taqiq radiochastota spektridan yanada samarali foydalanish imkoniyatlarini cheklamoqda. Bundan tashqari axborot xavfsizligi taʼminlanishini yanada kuchaytirish maqsadida, shuningdek mamlakatimizda amalga oshirilayotgan maʼmuriy islohotlarni inobatga olib, “Radiochastota spektri toʻgʻrisida”gi Oʻzbekiston Respublikasi Qonuniga tegishli oʻzgartishlar kiritish zarurati yuzaga kelmoqda.

Mazkur Qonun bilan “Radiochastota spektri toʻgʻrisida”gi Oʻzbekiston Respublikasi Qonuniga radiochastota spektridan foydalanuvchilarga oʻzlariga biriktirilgan radiochastota spektridan boshqa foydalanuvchilar bilan birgalikda foydalanish huquqi berilishini va undan foydalanish tartibi belgilanishini, shuningdek axborot xavfsizligini taʼminlash masalalari tartibga solinishini nazarda tutuvchi oʻzgartishlar kiritilmoqda. Bundan tashqari maʼmuriy islohotlar natijasida qayta tashkil etilgan davlat boshqaruvi organlarining nomlari aniqlashtirilmoqda.

Ushbu Qonun radiochastota spektridan yanada samarali foydalanilishiga, telekommunikatsiya tarmoqlarining rivojlanishiga, shuningdek aholining yanada sifatli telekommunikatsiya xizmatlari bilan taʼminlanishiga xizmat qiladi.

1-modda. Oʻzbekiston Respublikasining 1998-yil 25-dekabrda qabul qilingan “Radiochastota spektri toʻgʻrisida”gi 725-I-sonli Qonuniga (Oʻzbekiston Respublikasi Oliy Majlisining Axborotnomasi, 1999-yil, № 1, 16-modda; 2003-yil, № 5, 67-modda; Oʻzbekiston Respublikasi Oliy Majlisi palatalarining Axborotnomasi, 2013-yil, № 4, 98-modda; 2014-yil, № 5, 130-modda; 2015-yil, № 6, 228-modda; 2017-yil, № 4, 137-modda; 2019-yil, № 2, 47-modda; 2021-yil, 4-songa ilova) quyidagi oʻzgartishlar kiritilsin:

1) 2-moddaning oʻn ikkinchi xatboshisidagi “radiochastota berish” degan soʻzlar “biriktirilgan radiochastota” degan soʻzlar bilan almashtirilsin;

2) 5-moddaning birinchi qismi quyidagi tahrirda bayon etilsin:

“Radiochastota spektridan foydalanish sohasida davlat tomonidan tartibga solish sertifikatlashtirish, ruxsat etish xususiyatiga ega hujjatlarni berish, soliq solish, yagona ilmiy-texnika siyosatini shakllantirish orqali, shuningdek qonunchilikda nazarda tutilgan boshqa vositalar bilan amalga oshiriladi”;

3) 7-modda birinchi qismining ikkinchi xatboshisidagi “Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi” degan soʻzlar “Oʻzbekiston Respublikasi Raqamli texnologiyalar vazirligi” degan soʻzlar bilan almashtirilsin;

4) 8-modda birinchi qismining:

ikkinchi xatboshisi quyidagi tahrirda bayon etilsin:

“radiochastota spektri boʻyicha davlat boshqaruvi organi tomonidan ajratilgan radiochastotalar polosalari doirasida radioelektron vositalar va yuqori chastotali qurilmalarni olish (berish) va (yoki) oʻrnatish (qurish), Oʻzbekiston Respublikasi hududiga olib kirish hamda radioelektron vositalardan foydalanish uchun ruxsatnomalar beradi”;

beshinchi xatboshisi quyidagi tahrirda bayon etilsin:

“radiochastota spektridan foydalanuvchilarga biriktirilgan radiochastotalarning hisobini yuritadi, shuningdek radiochastota spektridan radiochastota spektri boʻyicha davlat boshqaruvi organi tomonidan belgilangan tartibga muvofiq foydalanilishi ustidan nazoratni amalga oshiradi”;

5) 9-moddaning matni quyidagi tahrirda bayon etilsin:

“Radiochastota spektri radiochastota spektridan foydalanuvchilar tomonidan davlat, jamoat ehtiyojlarini va shaxsiy ehtiyojlarni taʼminlash uchun foydalaniladi.

Radioelektron vositalar va yuqori chastotali qurilmalarni olish (berish) va (yoki) oʻrnatish (qurish), Oʻzbekiston Respublikasi hududiga olib kirish hamda radioelektron vositalardan foydalanish belgilangan tartibda radiochastota organi tomonidan beriladigan ruxsatnomaga asosan amalga oshiriladi.

Radiochastota spektridan foydalanuvchilarga muayyan radiochastotalarni biriktirish Oʻzbekiston Respublikasining radiochastotalarni taqsimlash jadvaliga muvofiq amalga oshiriladi. Biriktirilgan radiochastota oʻta muhim davlat ehtiyojlarini taʼminlash maqsadida oʻzgartirilishi mumkin.

Radiochastota spektridan foydalanuvchilarga radiochastotalar polosalarini ajratish foydalanuvchidan kelib tushgan ariza boʻyicha yoki tanlov asosida yoxud kim oshdi savdosi natijalariga koʻra amalga oshirilishi mumkin.

Radiochastota organi va radiochastota spektridan foydalanuvchi oʻrtasidagi oʻzaro munosabatlar shartnoma asosida amalga oshiriladi.

Radiochastotalar polosalaridan birdan ortiq radiochastota spektridan foydalanuvchilar tomonidan foydalanilishi radiochastota spektridan birgalikda foydalanishdir. Radiochastota spektridan foydalanuvchilar tomonidan radiochastota spektridan birgalikda foydalanish ular oʻrtasida radiochastota organining tegishli ruxsatnomasi asosida shartnoma tuzish orqali amalga oshiriladi. Mazkur ruxsatnoma radiochastota spektri boʻyicha davlat boshqaruvi organi tomonidan belgilanadigan radiochastotalar polosalariga binoan beriladi”;

6) 10-moddadagi “beriladi” degan soʻz “biriktiriladi” degan soʻz bilan almashtirilsin;

7) 13-modda ikkinchi qismi oʻzbekcha matnining:

toʻrtinchi xatboshisidagi “berilgan” degan soʻz “biriktirilgan” degan soʻz bilan almashtirilsin;

beshinchi xatboshisidagi “berilgan” degan soʻz “biriktirilgan” degan soʻz bilan almashtirilsin;

8) 14-moddaning:

nomidagi “loyihalash” degan soʻz chiqarib tashlansin;

birinchi qismi quyidagi tahrirda bayon etilsin:

“Radioelektron vositalar va yuqori chastotali qurilmalarni yaratish hamda ishlab chiqarish, shuningdek radiochastotalardan foydalangan holda ilmiy-tadqiqot va tajriba-konstruktorlik ishlarini bajarish faqat radiochastota spektridan foydalanuvchi radiochastota organining tegishli ruxsatnomasini olganidan va tashkilotning yaratishga doir standartlari kelishilganidan keyin amalga oshiriladi”;

9) 15-moddaning ikkinchi qismidagi “Oʻzbekiston standartlashtirish, metrologiya va sertifikatlashtirish agentligi” degan soʻzlar “Oʻzbekiston Respublikasi Investitsiyalar, sanoat va savdo vazirligi huzuridagi Oʻzbekiston texnik jihatdan tartibga solish agentligi” degan soʻzlar bilan almashtirilsin;

10) 16-moddaning birinchi qismidagi “foydalanuvchilarning” degan soʻz “radiochastota spektridan foydalanuvchilarning” degan soʻzlar bilan almashtirilsin;

11) 17-modda oʻzbekcha matnining:

nomidagi “Berilgan” degan soʻz “Biriktirilgan” degan soʻz bilan almashtirilsin;

birinchi qismidagi “Berilgan” degan soʻz “Biriktirilgan” degan soʻz bilan almashtirilsin;

ikkinchi qismidagi “Berilgan” degan soʻz “Biriktirilgan” degan soʻz bilan almashtirilsin;

12) 18-moddaning:

nomidagi “foydalanuvchilarning” degan soʻz “radiochastota spektridan foydalanuvchilarning” degan soʻzlar bilan almashtirilsin;

matnidagi “foydalanuvchilarning” degan soʻz “radiochastota spektridan foydalanuvchilarning” degan soʻzlar bilan almashtirilsin;

13) 181-moddaning matni quyidagi tahrirda bayon etilsin:

“Radiochastota spektridan foydalanish chogʻida radiochastota spektridan foydalanuvchilar tomonidan axborot xavfsizligi choralari, shu jumladan:

uzatiladigan axborotdan ruxsatsiz foydalanish, aloqa tizimlaridan nazoratsiz foydalanish va ularning ishlashini toʻxtatib qoʻyish, shuningdek ulardan shaxs, jamiyat va davlatga zarar yetkazadigan maqsadlarda foydalanish istisno etilishini;

axborotni (maʼlumotlarni) uzatish jarayonida uning (ularning) konfidensialligini, yaxlitligini va undan (ulardan) foydalanish imkoniyatini;

ruxsatsiz yoki beixtiyor aralashishga urinishlar boʻlgan taqdirda aloqa tizimining ishlash rejimi oʻzgarmasligini taʼminlovchi choralar koʻrilishi kerak”;

14) 182-modda quyidagi tahrirda bayon etilsin:

“182-modda. Radioaloqaning konfidensialligi

Boshqa shaxs uchun moʻljallangan radioxabar qabul qilingan taqdirda uni qayd qilish, uning mazmunini va mavjudligi faktini oshkor etish, tarqatish yoki oʻzgartirish taqiqlanadi, bundan qonunchilikda nazarda tutilgan hollar mustasno.

Konfidensial axborotni va (yoki) davlat sirlari mavjud boʻlgan maʼlumotlarni Oʻzbekiston Respublikasida sertifikatlashtirilgan axborotni kriptografik himoya qilish vositalaridan foydalanmagan holda radioaloqa kanallari orqali uzatish taqiqlanadi.

Radiochastota organlari tomonidan amalga oshiriladigan radiochastota spektri monitoringi radioaloqaning konfidensialligini buzish hisoblanmaydi”;

15) 19-moddaning birinchi qismidagi “Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi” degan soʻzlar “Oʻzbekiston Respublikasi Raqamli texnologiyalar vazirligi” degan soʻzlar bilan almashtirilsin.

2-modda. Oʻzbekiston Respublikasi Raqamli texnologiyalar vazirligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.

3-modda. Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

respublika ijro etuvchi hokimiyat organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

4-modda. Ushbu Qonun rasmiy eʼlon qilingan kundan eʼtiboran kuchga kiradi.

Oʻzbekiston Respublikasining Prezidenti Sh. MIRZIYOYEV

Toshkent sh.,

2023-yil 2-avgust,

OʻRQ-858-son