30-modda. Patent egasining mutlaq huquqi

Seleksiya yutugʻidan oʻz xohishiga koʻra foydalanishga boʻlgan mutlaq huquq patent egasiga tegishlidir.

Manfaatdor shaxs muhofaza qilinayotgan seleksiya yutugʻining urugʻlik, koʻchat yoki nasl materialini:

yetishtirish va takror yetishtirish (koʻpaytirish);

nav yoki nasllik konditsiyasiga yetkazish;

sotish uchun taklif qilish;

sotish va boshqa usullarda oʻtkazish;

Oʻzbekiston Respublikasi hududidan olib chiqish;

Oʻzbekiston Respublikasi hududiga olib kirish;

yuqorida koʻrsatib oʻtilgan maqsadlarda saqlash uchun patent egasining ruxsatini olishi kerak

Patent egasi oʻz xohishiga koʻra ruxsat biron-bir shart va (yoki) cheklovlar bilan berilishini oldindan taʼkidlab oʻtishga haqli.

Patent egasining huquqi uning ruxsatisiz fuqarolik muomalasiga kiritilgan nav urugʻligining koʻchat materialidan yetishtirilgan oʻsimlik materialiga yoki nasldor hayvonlardan yetishtirilgan tovarbop hayvonlarga nisbatan ham amal qiladi.

Ushbu moddaning ikkinchi qismida koʻrsatilgan harakatlarni navning urugʻlik, koʻchat materialiga yoki zotning nasl materialiga nisbatan amalga oshirish uchun:

agar bu material oʻzida muhofaza qilinayotgan nav, zot belgilarini asosan saqlab qolgan boʻlsa va ana shu muhofaza qilinayotgan nav yoki zot boshqa nav yoki zotning belgilarini asosan saqlab qolgan nav yoki zot boʻlmasa;

agar bu material ushbu Qonunning 10-moddasiga muvofiq muhofaza qilinayotgan nav yoki zotdan aniq-ravshan farq qilmaydigan boʻlsa;

agar bu material muhofaza qilinayotgan nav yoki zotdan bir necha marta foydalanishni talab qilayotgan boʻlsa, patent egasining ruxsatini olish zarur.

Agar nav yoki zot:

dastlabki nav yoki zotning eng muhim belgilarini oʻzida saqlab qolgan boʻlsa va bu nav yoki zot ham oʻz navbatida oʻzidan oldingi dastlabki nav yoki zot genotipi yoxud genotiplar kombinatsiyasini aks ettiradigan asosiy belgilarni saqlagan holda ularning eng muhim belgilarini oʻzida saqlab qolgan boʻlsa;

tabiiy yoki hosil qilingan mutantni saralab olish, dastlabki nav oʻsimliklari yoki zot hayvonlaridan ayrim mutantni saralab olish, bekkross, nav yoki zotni gen injeneriyasi usullari bilan oʻzgartirish kabi turli usullarni qoʻllash tufayli yuz bergan farqlarni istisno etganda, dastlabki nav yoki zotdan aniq-ravshan ajralib tursa va oldingi nav yoki zotning genotipi yoxud genotiplar kombinatsiyasiga mos kelsa, oʻzida boshqa (dastlabki) nav yoki zotning belgilarini asosan saqlab qolgan nav yoki zot deb eʼtirof etiladi.