24-modda. Beriladigan kompensatsiya turlari va manbalari
Yer uchastkalarini kompensatsiya evaziga jamoat ehtiyojlari uchun olib qoʻyish tartib-taomillari toʻgʻrisida (O‘RQ-781-son) · Sana: 29.06.2022 · Amalda
Beriladigan kompensatsiya turlari quyidagilardan iborat:
pul mablagʻlari, shu jumladan turar joylarni va yashash uchun moʻljallanmagan joylarni vaqtinchalik ijaraga olish uchun pul mablagʻlari;
boshqa koʻchmas mulk obyektini mulk qilib berish;
kelishuvda nazarda tutilgan kompensatsiyaning boshqa turlari.
Taraflarning kelishuviga koʻra huquq egasiga koʻchmas mulk obyektlarining baholash qiymati hisobga olingan holda kompensatsiyaning bir necha turlari berilishi mumkin.
Buzib tashlanadigan koʻchmas mulk oʻrniga yangi qurilgan koʻchmas mulk obyektini berish muddati boshqa koʻchmas mulk obyekti vaqtincha foydalanishga berilgan kundan eʼtiboran yigirma toʻrt oydan oshmasligi kerak. Koʻrsatilgan muddatda yangi koʻchmas mulk obyekti berilmagan taqdirda, Qoraqalpogʻiston Respublikasi Vazirlar Kengashi, tegishli viloyat, Toshkent shahar yoki tumanlar (shaharlar) hokimligi huquq egasiga har bir kechiktirilgan kun uchun buzib tashlangan yoki buzib tashlanadigan koʻchmas mulk obyekti baholash qiymatining 0,05 foizi miqdorida penya toʻlaydi.
Bitta mahallada yoki bitta koʻchada yashovchi huquq egalari va ularning oila aʼzolari uchun qulay shart-sharoitlar yaratish, shuningdek madaniy qadriyatlarni saqlab qolish maqsadida, huquq egalarining xohishiga koʻra ularga bitta mahallada yoki koʻchada joylashgan yangi uylar (bitta koʻp kvartirali uydagi kvartiralar) berilishi mumkin.
Kompensatsiya ushbu Qonunning 8-moddasida nazarda tutilgan tartibda tegishli markazlashtirilgan jamgʻarma mablagʻlari va qonunchilikda taqiqlanmagan boshqa manbalar hisobidan beriladi.