26-modda. Pochta aloqasi operatorlari va provayderlarining majburiyatlari

Pochta aloqasi operatorlari va provayderlari:

pochta aloqasi sohasidagi faoliyatni pochta aloqasi toʻgʻrisidagi qonunchilikka muvofiq amalga oshirishi;

barcha foydalanuvchilarning pochta aloqasi xizmatlaridan foydalana olishini taʼminlashi;

koʻrsatilayotgan pochta aloqasi xizmatlarining sifatini taʼminlashi;

pochta aloqasining xavfsizligini taʼminlashi;

Pochta aloqasi xizmatlari koʻrsatish qoidalarida belgilangan talablar foydalanuvchi tomonidan buzilgan taqdirda, pochta aloqasi xizmatlari koʻrsatishni toʻxtatib qoʻyishi;

foydalanuvchilarga Pochta aloqasi xizmatlari koʻrsatish qoidalari toʻgʻrisida, tariflar hamda pochta va kuryerlik joʻnatmalarini joʻnatish muddatlari, pochta aloqasi obyektlarining ish rejimlari, joʻnatilishi taqiqlangan predmetlar, pochta aloqasi operatori va provayderining foydalanuvchilar oldidagi javobgarligi haqida axborot taqdim etishi;

pochta aloqasi xizmatlari koʻrsatilmaganligi yoki lozim darajada koʻrsatilmaganligi tufayli foydalanuvchilarga yetkazilgan moddiy zararlarning oʻrnini qonunchilikka muvofiq qoplashi, shuningdek ularga yetkazilgan maʼnaviy ziyonni kompensatsiya qilishi;

pochta aloqa sohasida tezkor-qidiruv tadbirlarini oʻtkazayotgan maxsus vakolatli davlat organiga qonunchilikka muvofiq tashkiliy, texnik jihatdan va boshqacha tarzda koʻmaklashishi, bunday tadbirlarni oʻtkazuvchi har qanday kuchlar, vositalar, manbalar va usullar toʻgʻrisidagi axborotning oshkor etilmasligini taʼminlashi shart.

Pochta aloqasi operatorlari va provayderlarining zimmasida qonunchilikka muvofiq boshqa majburiyatlar ham boʻlishi mumkin.