43-modda. Ruhiy holati buzilgan shaxslarni koʻchirish va chiqarish asoslari

Ruhiy holati buzilgan shaxsni ruhiy holati buzilgan shaxslar uchun moʻljallangan davlat ixtisoslashtirilgan taʼlim muassasasidan yoki tibbiy-ijtimoiy muassasadan umumiy turdagi xuddi shunday muassasaga koʻchirish uchun shifokor-psixiatr ishtirokidagi tibbiy komissiyaning mazkur shaxsda ushbu muassasada turish uchun tibbiy koʻrsatmalar mavjud emasligi haqidagi xulosasi asos boʻladi.

Ruhiy holati buzilgan shaxsni ruhiy holati buzilgan shaxslar uchun moʻljallangan davlat ixtisoslashtirilgan taʼlim muassasasidan yoki tibbiy-ijtimoiy muassasadan chiqarish:

shifokor-psixiatr ishtirokidagi tibbiy komissiyaning ruhiy holati buzilgan shaxs sogʻligʻining holatiga koʻra mustaqil ravishda yashashga layoqatli ekanligi toʻgʻrisidagi xulosasi mavjud boʻlgan taqdirda, ushbu shaxsning arizasiga binoan;

chiqarilayotgan voyaga yetmagan shaxsni parvarish qilish majburiyatini olayotgan uning ota-onasidan birining yoki boshqa qonuniy vakilining arizasiga binoan;

sud tomonidan muomalaga layoqatsiz deb topilgan shaxs qonuniy vakilining arizasi boʻyicha, basharti uning qonuniy vakili oʻz vasiyligidagi shaxsni shaxsan parvarish qilish va (yoki) parvarish qilishni taʼminlash majburiyatini oʻz zimmasiga olayotgan boʻlsa, amalga oshiriladi.