18-modda. Ish beruvchilarning aholini ish bilan taʼminlash sohasidagi davlat siyosatini amalga oshirishdagi ishtiroki

Oʻzbekiston Respublikasida ish beruvchilar ish bilan taʼminlash sohasidagi davlat siyosatini amalga oshirishga quyidagi yoʻllar bilan koʻmaklashadilar:

mehnatga oid munosabatlarni tartibga soluvchi shartnoma va kelishuvlar shartlarini bajarish;

xodimlarni kasbga tayyorlash, qayta tayyorlash va ularning malakasini oshirish uchun sharoit yaratish;

Bandlikka koʻmaklashish davlat jamgʻarmasiga moliyaviy ajratmalar oʻtkazish;

ish oʻrinlarini tashkil etish va aholi bandligini taʼminlash dasturlarini amalga oshirishda ishtirok etish;

Oʻzbekiston Respublikasi Vazirlar Mahkamasi tomonidan belgilanadigan tartibda miqdorini mahalliy davlat hokimiyati organlari belgilaydigan ish joylariga ushbu Qonunning 7-moddasida koʻrsatilgan fuqarolarni ishga joylashtirish;

boʻsh ish joylari (vakant lavozimlar) bor-yoʻqligi toʻgʻrisidagi maʼlumotlarni, oldindan (kamida ikki oy oldin) mahalliy mehnat organiga moʻljallanayotgan ishdan ozod qilishlar toʻgʻrisidagi axborotlarni boʻshab qoladigan har bir xodimni koʻrsatgan holda taqdim etish. Boʻsh ish joylari bor-yoʻqligi toʻgʻrisidagi maʼlumotlarni hamda xodimlarning ishdan ozod qilinishi toʻgʻrisidagi axborotlarni taqdim etish tartibi va muddatlari qonun hujjatlari bilan belgilanadi.

Axborotning oʻz vaqtida taqdim etilmasligida va boʻsh ish joylarini (vakant lavozimlarni) yashirganlikda aybdor boʻlgan hamda Bandlikka koʻmaklashish davlat jamgʻarmasiga ajratmalar oʻtkazishdan bosh tortgan mansabdor shaxslar qonun hujjatlariga muvofiq javobgar boʻladilar.

Mahalliy davlat hokimiyati organlarining ijtimoiy himoyaga muhtoj shaxslarni ishga joylashtirish uchun ish joylarining eng kam miqdorini yaratishga doir qarorlarini bajarmaganlik uchun, shuningdek avval talabnoma berilgan, oʻrta maxsus, kasb-hunar taʼlimi va oliy taʼlim olgan yoki kasbga tayyorlashga, qayta tayyorlashga va malakasini oshirishga yuborilgan shaxslarni ishga qabul qilish rad etilgan taqdirda, korxonalar, muassasalar va tashkilotlarning mansabdor shaxslari maʼmuriy javobgarlikka tortiladi.

Ish beruvchilarning ijtimoiy himoyaga muhtoj shaxslar uchun belgilangan eng kam miqdordan ortiqroq qoʻshimcha ish joylarini yaratish, shuningdek bunday shaxslarni kasbga tayyorlash va qayta tayyorlash, malakasini oshirish maqsadida qilgan sarf-xarajatlari mahalliy budjet mablagʻlari, Bandlikka koʻmaklashish davlat jamgʻarmasi mablagʻlari va boshqa mablagʻlar hisobidan qoplanadi.