35-modda. Milliy gvardiya harbiy xizmatchilarining (xodimlarining) sogʻligʻini saqlash

Milliy gvardiyaning harbiy xizmatchilariga, katta ofitserlar tarkibining oila aʼzolariga (eri, xotini, oʻn sakkiz yoshga toʻlguniga qadar nogironligi boʻlgan shaxs boʻlib qolgan oʻn sakkiz yoshdan oshgan farzandlari, taʼlim muassasalarida taʼlimning kunduzgi shaklida tahsil olayotgan yigirma uch yoshgacha boʻlgan farzandlari), harbiy taʼlim muassasalari kursantlari va tinglovchilariga Milliy gvardiyaning hamda Oʻzbekiston Respublikasi Mudofaa vazirligining harbiy-tibbiy muassasalari tomonidan bepul tibbiy taʼminot beriladi.

Milliy gvardiya xodimlariga va ularning oila aʼzolariga Oʻzbekiston Respublikasi Ichki ishlar vazirligining davolash-profilaktika muassasalarida qonunchilikda ichki ishlar organlari xodimlari uchun belgilangan tartibda bepul tibbiy taʼminot beriladi.

Milliy gvardiya pensionerlariga (kontrakt boʻyicha sobiq harbiy xizmatchilar, generallar va xodimlar) hamda ularning oila aʼzolariga bepul tibbiy taʼminot qonunchilikda belgilangan tartibda beriladi.

Milliy gvardiyaning harbiy xizmatchilari (xodimlari), pensionerlari bir yilda bir marta imtiyozli shartlarda sanatoriy-kurort sharoitida davolanish huquqiga ega.

Milliy gvardiya harbiy xizmatchilarining (xodimlarining), pensionerlarining va ular oila aʼzolarining sogʻligʻini saqlash hamda mustahkamlash boʻyicha tadbirlarni amalga oshirish uchun zarur boʻlgan dori vositalari, tibbiy buyumlar va asbob-uskunalar Oʻzbekiston Respublikasi Davlat budjeti mablagʻlari hisobidan olinadi.

Zarur boʻlgan hollarda, shoshilinch tibbiy yordam va rejali ixtisoslashtirilgan tibbiy yordam Oʻzbekiston Respublikasi Sogʻliqni saqlash vazirligining davolash-profilaktika muassasalari tomonidan amalga oshiriladi.

Alohida hollarda, Milliy gvardiyaning harbiy xizmatchilarini (xodimlarini) tibbiy koʻrsatmalar boʻyicha tibbiy yordam olish uchun Oʻzbekiston Respublikasidan tashqariga yuborish Oʻzbekiston Respublikasi Sogʻliqni saqlash vazirligining Maxsus komissiyasi xulosasi asosida amalga oshiriladi.

Xodimlarni tibbiy tekshiruvdan va harbiy-tibbiy ekspertizadan oʻtkazish, harbiy xizmatchilarning (xodimlarning) tibbiy-sanitariya hamda sanatoriy-kurort taʼminotini tashkil etish tartibi Oʻzbekiston Respublikasi Vazirlar Mahkamasi tomonidan belgilanadi.

Harbiy xizmatchilarni tibbiy koʻrikdan oʻtkazish tartibi Oʻzbekiston Respublikasi Prezidenti tomonidan belgilanadi.