34-modda. Ovchilik xoʻjaligini yuritish uchun ov qilish joylarini berish toʻgʻrisidagi shartnoma

Ovchilik xoʻjaligini yuritish uchun ov qilish joylarini berish toʻgʻrisidagi shartnoma ovchilik xoʻjaliklarini tashkil etish uchun elektron onlayn-auksion orqali ajratilgan yer uchastkalarining ijara muddatiga mutanosib boʻlgan muddatga tuziladi.

Ovchilik xoʻjaligini yuritish uchun ov qilish joylarini berish toʻgʻrisidagi shartnomaning asosiy qoidalari quyidagilardan iborat:

ovchilik xoʻjaligining nomi;

yuridik shaxsning nomi va rekvizitlari;

jismoniy shaxsning pasportiga yoki identifikatsiyalovchi ID-kartasiga oid maʼlumotlar;

shartnomaning amal qilish muddati;

ovchilik xoʻjaligining joylashgan yeri, chegaralari va maydoni, shu jumladan biotoplar boʻyicha — togʻlar, choʻl, oʻrmon yoki suv bilan qoplanganligi toʻgʻrisidagi maʼlumotlar;

ov qilish joylari hududida yashayotgan yovvoyi hayvonlar turlarining shartnomani tuzish sanasidagi soni haqidagi maʼlumotlar;

ov qilish uchun yopiq boʻlgan takror koʻpaytirish uchastkasining tavsifi (ovchilik xoʻjaligi umumiy maydonining kamida 10 foizi);

shartnomani tuzgan shaxsning ushbu Qonunning 19-moddasida nazarda tutilgan majburiyatlari;

davlat organining shartnomani tuzgan shaxsga yovvoyi hayvonlarni tutishga doir ruxsatnomani berish majburiyati;

taraflarning shartnoma shartlarini bajarmaganlik yoki lozim darajada bajarmaganlik uchun javobgarligi;

chegaralari, borish yoʻllari, takror koʻpaytirish uchastkasining, kordonlar hamda boshqa inshootlar va obyektlarning joylashuvi koʻrsatilgan holda ovchilik xoʻjaligi hududining xarita-sxemasi;

ovchilik xoʻjaligini yuritish chogʻida ov qilish joylaridan foydalanganlik uchun haq toʻlash miqdori;

shartnomani muddatidan ilgari bekor qilish asoslari.

Ovchilik xoʻjaligini yuritish uchun ov qilish joylarini berish toʻgʻrisidagi shartnomaning namunaviy shakli Oʻzbekiston Respublikasi Ekologiya va iqlim oʻzgarishi milliy qoʻmitasi tomonidan tasdiqlanadi.