27-modda. Gʻayriqonuniy ov qilish (brakonyerlik)

Quyidagi harakatlar gʻayriqonuniy ov qilish (brakonyerlik) deb eʼtirof etiladi:

ov qilish joylari boʻlmagan joylarda, shuningdek muhofaza qilinadigan tabiiy hududlarda ov qilish, bundan muhofaza qilish va foydalanish rejimiga muvofiq hududida cheklangan tarzda ov qilishga ruxsat etilgan joylarda ov qilishni amalga oshirish hollari mustasno;

ov qurollarining taqiqlangan turlaridan va ov qilishning taqiqlangan usullaridan foydalangan holda ov qilish;

taqiqlangan joylarda, ov qilish taqiqlangan mavsumlarda va muddatlarda ov qilish hamda yovvoyi hayvonlarning taqiqlangan turlarini ovlash;

ovchilik guvohnomasisiz, ov qurolini saqlash va olib yurishga doir ruxsatnomasiz, yovvoyi hayvonlarni tutishga doir ruxsatnomasiz hamda ovchilik yoʻllanmasisiz (yovvoyi hayvonlarni tutish kartochkasisiz) ov qilish (bundan tabiiy suv oqimlarida, shuningdek kanallarda va kollektor-drenaj tarmoqlarida umumiy foydalanish tartibida jismoniy shaxslar tomonidan baliq tutish mustasno);

yovvoyi hayvonlarni tutishga doir ruxsatnomada koʻrsatilgan yovvoyi hayvonlarni tutib olish yoki otish normalarini oshirib yuborish;

Ekologiya qoʻmitasi hududiy boʻlinmalarining maxsus ruxsatnomasisiz yovvoyi hayvonlarning yashash faoliyati mahsulotlarini yigʻish, qushlarning makonlariga borish, yovvoyi qushlarning uyalarini, yovvoyi hayvonlarning uychalarini, inlarini hamda boshqa uyalarini oʻzga joyga koʻchirish va vayron qilish, shuningdek yovvoyi hayvonlarning urchishiga toʻsqinlik qiladigan boshqa harakatlar.

Gʻayriqonuniy ov qilish (brakonyerlik) natijasida qoʻlga kiritilgan ov mahsuloti olib qoʻyilishi lozim. Bunda ovchilik resurslariga yetkazilgan zarar undiriladi.