30-modda. Konsullikning Oʻzbekiston Respublikasining farzandlikka olingan voyaga yetmagan fuqarolariga, shuningdek Oʻzbekiston Respublikasining vasiylik yoki homiylik belgilanishiga muhtoj boʻlgan fuqarolariga taalluqli funksiyalari

Konsullik muassasalari Oʻzbekiston Respublikasi hududidan tashqarida yashayotgan, yetim bolalar va ota-ona qaramogʻidan mahrum boʻlgan bolalar, ijtimoiy jihatdan xavfli ahvolda boʻlgan voyaga yetmagan shaxslar, Oʻzbekiston Respublikasining muomalaga layoqatsiz yoki muomala layoqati cheklangan fuqarolari ustidan, shuningdek sogʻligʻining holatiga koʻra oʻz huquqlarini mustaqil ravishda amalga oshirishga hamda oʻz majburiyatlarini bajarishga qodir boʻlmagan voyaga yetgan Oʻzbekiston Respublikasi fuqarolariga nisbatan vasiylik yoki homiylik belgilash choralarini koʻradi.

Oʻzbekiston Respublikasi hududida yashayotgan yetim qolgan yoki ota-ona qaramogʻidan mahrum boʻlgan, ijtimoiy jihatdan xavfli ahvolda boʻlgan voyaga yetmagan Oʻzbekiston Respublikasi fuqarosini farzandlikka, vasiylikka va homiylikka olishni xohlaydigan, konsullik okrugi hududida doimiy yashayotgan Oʻzbekiston Respublikasi fuqarolarining, chet el fuqarolarining yoki fuqaroligi boʻlmagan shaxslarning iltimosiga koʻra konsullikning mansabdor shaxsi ularni farzandlikka, vasiylikka va homiylikka olishning Oʻzbekiston Respublikasi qonunchiligida belgilangan tartibi toʻgʻrisida xabardor qiladi.

Konsullikning mansabdor shaxsi ushbu moddaning birinchi qismida nazarda tutilgan fuqarolar haqida xabar berishni soʻrab konsullik muassasasi joylashgan davlatning vakolatli organlariga murojaat qiladi.

Oʻzbekiston Respublikasining fuqarosi konsullik okrugi hududida yetim yoki ota-ona qaramogʻidan mahrum boʻlib qolganligi, ijtimoiy jihatdan xavfli ahvolda boʻlganligi, muomalaga layoqatsizligi yoki muomala layoqati cheklanganligi, shuningdek sogʻligʻining holatiga koʻra oʻz huquqlarini mustaqil ravishda amalga oshirishga hamda oʻz majburiyatlarini bajarishga qodir boʻlmay qolganligi holatlari toʻgʻrisidagi maʼlumotlarni qabul qilib olgan yoxud mazkur holatlar oʻziga maʼlum boʻlib qolgan konsullikning mansabdor shaxsi bu haqda Oʻzbekiston Respublikasi Tashqi ishlar vazirligini xabardor qiladi, Oʻzbekiston Respublikasining bunday fuqarosi ustidan vasiylik yoki homiylik belgilanishiga koʻmaklashadi hamda uning mulkiy va shaxsiy nomulkiy huquqlarini himoya qilish choralarini koʻradi.