“10-modda. Davlat veterinariya xizmatini boshqarish
Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida (O‘RQ-448-son) · Sana: 16.10.2017 · Amalda
Davlat veterinariya xizmati Davlat veterinariya qoʻmitasi, Qoraqalpogʻiston Respublikasi veterinariya qoʻmitasi, viloyatlar va Toshkent shahar veterinariya boshqarmalari, Davlat chegarasidagi va transportdagi davlat veterinariya nazorati boshqarmasi, tumanlar (shaharlar) veterinariya boʻlimlari, laboratoriyalar, Respublika hayvonlar kasalliklari va oziq-ovqat mahsulotlari xavfsizligi davlat tashxis markazi, Veterinariya dori vositalari va ozuqabop qoʻshimchalarning sifati va muomalasini nazorat qilish davlat ilmiy markazi, Veterinariya ilmiy-tadqiqot instituti, shuningdek veterinariya uchastkalari, bozorlardagi veterinariya-sanitariya ekspertiza laboratoriyalaridan, chegara va transport veterinariya punktlaridan (uchastkalaridan) hamda boshqa muassasalardan iboratdir.
Davlat veterinariya qoʻmitasiga rais rahbarlik qiladi. Davlat veterinariya qoʻmitasining mansabdor shaxslari quyidagi tartibda lavozimga tayinlanadi va lavozimidan ozod qilinadi:
Davlat veterinariya qoʻmitasining raisi Oʻzbekiston Respublikasi Bosh vazirining taqdimnomasiga binoan Oʻzbekiston Respublikasi Prezidenti tomonidan lavozimga tayinlanadi va lavozimidan ozod etiladi;
Davlat veterinariya qoʻmitasi raisining oʻrinbosarlari Oʻzbekiston Respublikasi Prezidenti tomonidan lavozimga tayinlanadi va lavozimidan ozod etiladi;
Qoraqalpogʻiston Respublikasi veterinariya qoʻmitasi raisi Davlat veterinariya qoʻmitasi bilan kelishilgan holda Qoraqalpogʻiston Respublikasi Joʻqorgʻi Kengesi tomonidan lavozimga tayinlanadi va lavozimidan ozod etiladi;
viloyatlar va Toshkent shahar veterinariya boshqarmalarining boshliqlari viloyatlar va Toshkent shahar hokimlarining taqdimnomasiga binoan Davlat veterinariya qoʻmitasi raisi tomonidan lavozimga tayinlanadi va lavozimidan ozod etiladi;
tumanlar (shaharlar) veterinariya boʻlimlari boshliqlari tuman (shahar) hokimlarining taqdimnomasiga binoan Qoraqalpogʻiston Respublikasi veterinariya qoʻmitasi raisi, viloyatlar va Toshkent shahar veterinariya boshqarmalarining boshliqlari tomonidan lavozimga tayinlanadi hamda lavozimidan ozod etiladi;
Respublika hayvonlar kasalliklari va oziq-ovqat mahsulotlari xavfsizligi davlat tashxis markazining, Veterinariya dori vositalari va ozuqabop qoʻshimchalarning sifati va muomalasini nazorat qilish davlat ilmiy markazining, Veterinariya ilmiy-tadqiqot institutining, Davlat chegarasidagi va transportdagi davlat veterinariya nazorati boshqarmasining, shuningdek chegara va transport veterinariya punktlarining (uchastkalarining) rahbarlari Davlat veterinariya qoʻmitasi raisi tomonidan lavozimga tayinlanadi hamda lavozimidan ozod etiladi.