214-modda. Qoʻshimcha hal qiluv qarori

Ish boʻyicha hal qiluv qarori chiqargan sud ishda ishtirok etayotgan shaxslarning arizalariga koʻra yoki oʻz tashabbusi bilan quyidagi hollarda qoʻshimcha hal qiluv qarori chiqarishi mumkin:

1) huquq toʻgʻrisidagi masalani hal qilib, undiriladigan summa miqdorini, topshirilishi lozim boʻlgan mulkni yoki javobgar bajarishi lozim boʻlgan harakatlarni koʻrsatmagan boʻlsa;

2) arz qilingan talablarning birortasi boʻyicha ishda ishtirok etuvchi shaxslar dalillar keltirgan va tushuntirishlar bergan boʻlsalar-u, lekin bu xususda hal qiluv qarori chiqarilmagan boʻlsa;

3) hal qiluv qarorida sud xarajatlarini taqsimlash koʻrsatilmagan boʻlsa.

Qoʻshimcha hal qiluv qarori chiqarish masalasi hal qiluv qarori chiqarilgan kundan eʼtiboran oʻn kundan kechiktirmay qoʻzgʻatilishi mumkin.

Qoʻshimcha hal qiluv qarori sud tomonidan masala ishda ishtirok etuvchi shaxslar xabardor qilingan holda sud majlisida koʻrib chiqilganidan soʻng qabul qilinadi va uning ustidan apellatsiya tartibida shikoyat berilishi hamda unga nisbatan protest keltirilishi mumkin.

Qoʻshimcha hal qiluv qarori chiqarish toʻgʻrisidagi talabni rad etish haqidagi sudning ajrimi ustidan xususiy shikoyat berilishi yoki xususiy protest keltirilishi mumkin.