Akkreditatsiya sohasida hamkorlik toʻgʻrisida

06.10.2008

OʻZBEKISTON STANDARTLAShTIRISh, METROLOGIYA VA SERTIFIKATLAShTIRISh AGENTLIGI (“OʻZSTANDART” AGENTLIGI) BILAN LATVIYA RESPUBLIKASI IQTISODIYOT VAZIRLIGI OʻRTASIDA

Bitim

Oʻzbekiston standartlashtirish, metrologiya va sertifikatlashtirish agentligi hamda Latviya Respublikasi Iqtisodiyot vazirligi, bundan keyin Tomonlar deb ataluvchilar,

bir tomondan Oʻzbekiston Respublikasi va ikkinchi tomondan Yevropa Hamjamiyatlari va ularga aʼzo davlatlar oʻrtasida sherikchilik taʼsis etuvchi 1996-yil 21-iyunda imzolangan Sherikchilik va hamkorlik toʻgʻrisidagi Bitim qoidalariga asoslanib,

akkreditatsiya sohasidagi oʻzaro hamkorlikning foydaliligini eʼtiborga olib,

ikkala Tomonning iqtisodiy manfaatlariga amal qilib,

Oʻzbekiston Respublikasining Jahon savdo tashkiloti (JST)ga kirish uchun tayyorgarlik olib borishini eʼtiborga olib,

Latviya Respublikasining Yevropa Ittifoqiga aʼzo davlat boʻlganligini eʼtiborga olib,

oʻz vakolatlari doiralarida ikki tomonlama hamkorlikni yoʻlga qoʻyishni istab va milliy qonunchilikka muvofiq,

quyidagilar toʻgʻrisida kelishib oldilar:

1-modda.

Ushbu Bitimni amalga oshirish davomida Tomonlar mos ravishda Oʻzbekiston Respublikasi va Latviya Respublikasi qonunlariga amal qiladilar.

2-modda.

Tomonlar milliy laboratoriyalarning oʻzbek va latviya vakolatli tashkilotlari tarafidan tashkil etiladigan laboratoriyalararo solishtirishlarda oʻzaro qatnashishiga koʻmaklashadilar.

3-modda.

Tomonlardan birining taklifiga binoan, taklif etuvchi Tomon uyushtirayotgan ilmni oshiradigan turli tadbirlar (seminarlar, konferensiyalar, simpoziumlar va boshqalar)da ishtirok etadilar.

4-modda.

Tomonlardan birining (manfaatdor Tomonning) iltimosiga binoan, akkreditatsiya masalalariga tegishli boʻlgan, oʻz mamlakatlarining qonunchilik hujjatlarini rus yoki ingliz tilida taqdim etadilar.

5-modda.

Manfaatdor Tomonning taklifiga binoan akkreditatsiya sohasida auditorlarni oʻqitishda ishtirok etadilar.

6-modda.

Ushbu Bitimning 2, 3 va 5-moddalari amali bilan bogʻliq xarajatlarni alohida shartnomalarga asosan taklif qilayotgan (manfaatdor Tomon) qoplaydi.

Ushbu Bitim boʻyicha hamkorlikni amalga oshirish bilan bogʻliq barcha xarajatlarni (axborot, sharhlar, tajriba va h.k. almashish) Tomonlar mustaqil ravishda qoplaydilar.

7-modda.

Ushbu Bitimga muvofiq olingan hujjatlar yoki axborotning maxfiyligi uchun shu hujjatni yoki axborotni olgan Tomon masʼuldir.

Hujjat yoki axborot uchinchi tarafga faqat uni bergan Tomonning roziligi bilan berilishi mumkin.

Muzokaralar va ularning natijalari haqidagi axborot faqat ikkala Tomonning roziligi bilan eʼlon qilinishi mumkin.

8-modda.

Ushbu Bitim qoidalari Tomonlarning, bir tomondan, Oʻzbekiston Respublikasi va ikkinchi tomondan, Yevropa Hamjamiyatlari va ularga aʼzo davlatlar oʻrtasidagi xalqaro bitimlardan kelib chiqadigan majburiyatlariga daxl qilmaydi.

Ushbu Bitim qoidalari Latviya Respublikasining Yevropa Ittifoqiga aʼzoligidan kelib chiqadigan uning majburiyatlariga qandaydir tarzda taʼsir etadigan yoki oʻzgartiradigan qilib qoʻllanilishi yoki izohlanishi mumkin emas.

9-modda.

Ushbu Bitim qoidalarini talqin etishda va qoʻllashda yuzaga keluvchi barcha kelishmovchiliklar Tomonlar oʻrtasida maslahatlashuv va muzokaralar orqali hal qilinadi.

10-modda.

Tomonlar oʻzaro kelishuvlariga koʻra ushbu Bitimga tegishli bayonnomalar bilan rasmiylashtiriladigan oʻzgartishlar va qoʻshimchalar kiritishlari mumkin, mazkur bayonnomalar ushbu Bitimning ajralmas qismi hisoblanadi va imzolangan kundan boshlab kuchga kiradi.

11-modda.

Ushbu Bitim noaniq muddatga tuziladi va imzolangan kundan boshlab kuchga kiradi.

Tomonlardan har biri oʻz niyati toʻgʻrisida boshqa Tomonga yozma ravishda xabar berib, ushbu Bitimning amal qilishini tugatishi mumkin. Bitimning amal qilishi boshqa Tomon bunday xabarnomani olgan kundan boshlab 1 (bir) oy muddat oʻtgandan keyin tugaydi.

Toshkent shahrida 2008-yil 6-oktabrda ikki asl nusxada, har biri oʻzbek, latish va rus tillarida tuzildi, bunda barcha matnlar bir xil kuchga ega.

Bitim matnini talqin qilishda kelishmovchiliklar yuzaga kelsa, rus tilidagi matn asos qilib olinadi.

(imzolar)