Axborot almashish sohasida hamkorlik toʻgʻrisida

25.06.2004

Oʻzbekiston Respublikasi Davlat mulkini boshqarish va tadbirkorlikni qoʻllab-quvvatlash Davlat qoʻmitasi bilan Ukraina Davlat mulki jamgʻarmasi oʻrtasida

Bitim

Oʻzbekiston Respublikasi Davlat mulkini boshqarish va tadbirkorlikni qoʻllab-quvvatlash Davlat qoʻmitasi bilan Ukraina Davlat mulki jamgʻarmasi, bundan keyin “Tomonlar” deb ataluvchilar,

Tomonlar davlatlarining xoʻjalik yurituvchi subyektlari oʻrtasida oʻzaro manfaatli munosabatlarni oʻrnatishga intilib,

oʻz vakolatlari va Oʻzbekiston Respublikasi bilan Ukrainaning milliy qonunlari meʼyorlari doirasida faoliyat olib borib,

ikki davlat xoʻjalik yurituvchi subyektlarining xususiylashtirish dasturlarida oʻzaro ishtirok etishlari uchun shart-sharoitlarni yaratishga koʻmaklashib,

quyidagilar toʻgʻrisida ahdlashib oldilar:

1-modda

Tomonlar xususiylashtirish jarayoni, hukumatning tegishli meʼyoriy-huquqiy hujjat va qarorlari, Oʻzbekiston Respublikasi bilan Ukraina hududlarida xususiylashtirilayotgan korxonalar hamda obyektlarning tavsifi toʻgʻrisida, shu jumladan amaliy uchrashuvlar, seminarlar, maslahatlashuvlar va boshqa qoʻshma tadbirlar oʻtkazish orqali, shuningdek Tomonlarning soʻrovlariga koʻra axborot almashadilar.

2-modda

Tomonlar, Oʻzbekiston Respublikasi bilan Ukrainaning ommaviy axborot vositalarida xususiylashtirish masalalari boʻyicha axborotni joylashtirishga koʻmaklashadilar.

3-modda

Tomonlarning oʻzaro roziliklariga koʻra ushbu Bitimga alohida bayonnomalar bilan rasmiylashtiriladigan va uning ajralmas qismi hisoblanadigan oʻzgartish va toʻldirishlar kiritilishi mumkin.

4-modda

Ushbu Bitimning qoidalarini talqin qilish va qoʻllash bilan bogʻliq barcha masalalar Tomonlar oʻrtasida maslahatlashuv hamda muzokaralar orqali hal qilinadi.

5-modda

Ushbu Bitim imzolangan kundan boshlab kuchga kiradi.

Ushbu Bitim besh yil davomida amal qiladi va Tomonlarning birontasi uning amal qilishini toʻxtatish niyati toʻgʻrisida kamida olti oy ilgari boshqa Tomonni diplomatik kanallar orqali yozma ravishda xabardor qilmasa, u keyingi besh yillik muddatlarga oʻz-oʻzidan uzayaveradi.

Toshkent shahrida 2004-yil 25-iyunda ikki nusxada, har biri oʻzbek, ukrain va rus tillarida tuzildi, bunda barcha matnlar bir xil kuchga ega.

Ushbu Bitimning qoidalarini talqin qilish maqsadida rus tilidagi matndan foydalaniladi.

(imzolar)