Oʻzbekiston Respublikasining Maʼmuriy huquqbuzarlik toʻgʻrisidagi kodeksiga, Jinoyat kodeksiga va Jinoyat-protsessual kodeksiga oʻzgartishlar va qoʻshimchalar kiritish haqida (1085-XII-son)

06.05.1994

Hujjat kuchini yo‘qotgan 15.07.1995

Oʻzbekiston Respublikasining qonuni

Oʻzbekiston Respublikasi Oliy Kengashi qaror qiladi:

Oʻzbekiston Respublikasining quyidagi qonunlariga oʻzgartishlar va qoʻshimchalar kiritilsin:

I. Oʻzbekiston Respublikasining 1985-yil 13-dekabrdagi Qonuni bilan tasdiqlangan Oʻzbekiston Respublikasining Maʼmuriy huquqbuzarlik toʻgʻrisidagi kodeksiga (Oʻzbekiston Respublikasi Oliy Sovetining Vedomostlari, 1985-yil, № 35, 411-modda):

1) 170-modda quyidagi mazmundagi ikkinchi qism bilan toʻldirilsin:

“Yonilgʻi-moylash materiallari bilan qoʻlda savdo qilish, —

sotilayotgan buyumlarni musodara qilib, eng kam oylik ish haqining uch barobaridan yetti barobarigacha miqdorda shtraf solishga sabab boʻladi”.

Belgilab qoʻyilsinki, 170-moddaning ikkinchi qismida nazarda tutilgan maʼmuriy huquqbuzarliklar toʻgʻrisidagi protokollar davlat soliq organlarining, “Oʻzneftgaznazorati” va ichki ishlar (militsiya) organlarining vakolatli mansabdor shaxslari tomonidan tuziladi;

2) 174-moddaning jazo belgilovchi qismi quyidagi tahrirda bayon etilsin:

“fuqarolarga eng kam oylik ish haqining ikki barobaridan besh barobarigacha miqdorda, mansabdor shaxslarga esa — eng kam oylik ish haqining besh barobaridan oʻn barobarigacha miqdorda shtraf solishga sabab boʻladi”;

3) Kodeks quyidagi mazmundagi 174-2-modda bilan toʻldirilsin:

“174-2-modda. Neft mahsulotlarini qabul qilish, saqlash, berish va hisobga olish qoidalarini buzish

Neft mahsulotlari bazalarida, omborlarida va avtomobillarga yonilgʻi quyish stansiyalarida neft mahsulotlarini qabul qilish, saqlash, berish va hisobga olishning belgilangan qoidalarini buzish, —

eng kam oylik ish haqining uch barobaridan yetti barobarigacha miqdorda shtraf solishga sabab boʻladi.

Xuddi shunday xatti-harakatlar maʼmuriy jazo berilganidan keyin bir yil mobaynida takror sodir etilsa, —

eng kam oylik ish haqining yetti barobaridan oʻn barobarigacha miqdorda shtraf solishga sabab boʻladi”.

Belgilab qoʻyilsinki, 174-2-moddada nazarda tutilgan maʼmuriy huquqbuzarliklar toʻgʻrisidagi protokollar “Oʻzdavneftmahsulot” tizimi va davlat soliq organlarining vakolatli mansabdor shaxslari tomonidan tuziladi;

4) 232-modda “170” raqamidan keyin “174-2”- raqami bilan toʻldirilsin.

II. Oʻzbekiston Respublikasining 1959-yil 21-maydagi Qonuni bilan tasdiqlangan Oʻzbekiston Respublikasining Jinoyat kodeksiga (Oʻzbekiston Respublikasi Oliy Sovetining Vedomostlari, 1959-yil, № 6, 2-modda):

1) 180-2-moddada:

birinchi qismning jazo belgilovchi qismidagi “yuz soʻmdan ikki yuz soʻmgacha” degan soʻzlar “eng kam oylik ish haqining oʻn barobaridan oʻn besh barobarigacha miqdorda” degan soʻzlar bilan almashtirilsin;

ikkinchi qismning jazo belgilovchi qismidagi “yuz soʻmdan uch yuz soʻmgacha” degan soʻzlar “eng kam oylik ish haqining oʻn besh barobaridan yigirma barobarigacha miqdorda” degan soʻzlar bilan almashtirilsin;

2) Kodeks quyidagi mazmundagi 180-3-modda bilan toʻldirilsin:

“180-3-modda. Yonilgʻi-moylash materiallari bilan qoʻlda savdo qilish

Yonilgʻi-moylash materiallari bilan qoʻlda savdo qilish, basharti bu harakatlar shunday nojoʻya harakati uchun maʼmuriy jazoga tortilgan shaxs tomonidan jazo berilganidan keyin bir yil mobaynida takror sodir etilsa, —

sotilayotgan buyumlarni musodara qilib, bir yilgacha muddatga axloq tuzatish ishi bilan yoki eng kam oylik ish haqining oʻn barobaridan oʻn besh barobarigacha miqdorda shtraf solish bilan jazolanadi.

Oʻsha harakatlar shunday jinoyat qilganligi uchun ilgari sudlangan shaxs tomonidan sodir etilsa, —

sotilayotgan buyumlarni musodara qilib, ikki yilgacha muddatga ozodlikdan mahrum qilish yoki shu muddatga axloq tuzatish ishi bilan yoki eng kam oylik ish haqining oʻn besh barobaridan yigirma barobarigacha miqdorda shtraf solish bilan jazolanadi”.

III. Oʻzbekiston Respublikasining 1959-yil 21-maydagi Qonuni bilan tasdiqlangan Oʻzbekiston Respublikasining Jinoyat-protsessual kodeksi (Oʻzbekiston Respublikasi Oliy Sovetining Vedomostlari, 1959-yil, № 6, 3-modda) 108-moddasining birinchi qismi “180-2” raqamidan keyin “180-3” raqami bilan toʻldirilsin.

Oʻzbekiston Respublikasining Prezidenti I. KARIMOV

Toshkent sh.,

1994-yil 6-may,

1085-XII-son