363-modda. Yagona yer soligʻini toʻlash tartibini qoʻllashning oʻziga xos xususiyatlari

Yagona yer soligʻini toʻlash tartibini qoʻllash uchun soliq toʻlovchi har yili joriy soliq davrining 1-fevraliga qadar soliq boʻyicha hisobga olish joyidagi davlat soliq xizmati organlariga oʻtgan soliq davrida qishloq xoʻjaligi mahsulotini yetishtirish va qayta ishlashning umumiy hajmida qishloq xoʻjaligi mahsulotining oʻzi yetishtirgan va qayta ishlagan ulushi koʻrsatilgan maʼlumotnomani taqdim etadi.

Qishloq xoʻjaligi mahsulotini yetishtirish va qayta ishlashning umumiy hajmida qishloq xoʻjaligi mahsulotining oʻzi yetishtirgan va qayta ishlagan ulushini aniqlashda ushbu Kodeksning 132-moddasida nazarda tutilgan boshqa daromadlar hisobga olinmaydi.

Agar oʻtgan soliq davri yakunlari boʻyicha yagona yer soligʻi toʻlovchi ushbu Kodeks 362-moddasining ikkinchi qismida belgilangan shartlarga javob bermasa, soliq toʻlovchi joriy soliq davrining boshidan boshlab ushbu Kodeksda nazarda tutilgan soliqlarni toʻlashga oʻtishi kerak.

Yagona yer soligʻini toʻlashdan umumbelgilangan soliqlarni toʻlashga oʻtgan soliq toʻlovchi umumbelgilangan soliqlarni toʻlashga oʻtgan soliq davrining birinchi choragi uchun ushbu Kodeksda nazarda tutilgan yuridik shaxslardan olinadigan foyda soligʻi boʻyicha joriy toʻlovlarni toʻlashdan ozod qilinadi.

Ushbu Kodeksda nazarda tutilgan soliqlarni toʻlashga oʻtgan yagona yer soligʻini toʻlovchi ushbu moddaning birinchi qismida nazarda tutilgan tartibga muvofiq faqat navbatdagi soliq davri boshidan boshlab yana yagona yer soligʻini toʻlashga oʻtishga haqlidir.

Ushbu Kodeks 362-moddasining ikkinchi qismida belgilangan shartlarga javob beradigan qishloq xoʻjaligi tovarlari ishlab chiqaruvchilar, shuningdek qishloq xoʻjaligi yoʻnalishidagi ilmiy-tadqiqot tashkilotlarining tajriba-eksperimental xoʻjaliklari va taʼlim muassasalarining oʻquv-tajriba xoʻjaliklari faoliyatning yagona yer soligʻini toʻlash tatbiq etiladigan qismi boʻyicha soliq solishning boshqacha tartibini tanlash huquqiga ega emas.

Qishloq xoʻjaligi mahsulotini yetishtirish va qayta ishlash bilan bogʻliq boʻlmagan faoliyat turlarini amalga oshirishda yagona yer soligʻi toʻlovchi mazkur faoliyat turlari boʻyicha alohida-alohida hisob yuritishi va ushbu Kodeksda nazarda tutilgan soliqlarni toʻlashi shart.

Yagona yer soligʻini toʻlovchilar uchun ushbu Kodeksning 132-moddasida nazarda tutilgan boshqa daromadlarga soliq solinmaydi, dividendlar va foizlar, birgalikdagi faoliyatdan olingan daromadlar bundan mustasno.