202-modda. Tovarlarni (ishlarni, xizmatlarni) realizatsiya qilish joyi

Tovarlarni (ishlarni, xizmatlarni) realizatsiya qilish oborotlariga, agar ularni realizatsiya qilish joyi Oʻzbekiston Respublikasi hududi boʻlsa, qoʻshilgan qiymat soligʻi solinadi.

Quyidagi shartlar yoxud ulardan biri mavjud boʻlgan taqdirda, Oʻzbekiston Respublikasi hududi tovarlarni realizatsiya qilish joyi deb eʼtirof etiladi:

tovar Oʻzbekiston Respublikasi hududida turgan boʻlsa va bitim natijasida Oʻzbekiston Respublikasi hududidan tashqariga chiqarilmaydigan boʻlsa (yuklab joʻnatilmaydigan va tashilmaydigan boʻlsa);

joʻnatish yoki tashish boshlangan paytda tovar Oʻzbekiston Respublikasi hududida turgan boʻlsa.

Quyidagi hollarda Oʻzbekiston Respublikasi hududi ishlarni, xizmatlarni realizatsiya qilish joyi deb eʼtirof etiladi, agar:

1) ishlar, xizmatlar Oʻzbekiston Respublikasi hududida boʻlgan koʻchmas mulk bilan bogʻliq boʻlsa. Bunday ishlar, xizmatlar jumlasiga, xususan, qurilish, montaj, qurilish-montaj, ishga tushirish-sozlash, taʼmirlash, restavratsiya qilish, koʻkalamzorlashtirish ishlari, shuningdek koʻchmas mulkni ijaraga berish kiradi;

2) ishlar, xizmatlar Oʻzbekiston Respublikasi hududida boʻlgan koʻchar mulk bilan bogʻliq boʻlsa. Bunday ishlarga, xizmatlarga montaj qilish, sozlash, yigʻish, qayta ishlash, ishlov berish, taʼmirlash va texnik xizmat koʻrsatish kiradi

3) xizmatlar haqiqatda Oʻzbekiston Respublikasi hududida turizm, madaniyat, sanʼat, taʼlim, jismoniy tarbiya va sport sohasida koʻrsatilayotgan boʻlsa;

4) ishlarni, xizmatlarni sotib oluvchi faoliyatini Oʻzbekiston Respublikasi hududida amalga oshirayotgan boʻlsa. Ishlarni (xizmatlarni) sotib oluvchi yuridik shaxs davlat roʻyxatidan oʻtkazilganligi asosida, bunday asos boʻlmagan taqdirda esa, yuridik shaxsning taʼsis hujjatlarida koʻrsatilgan joy, yuridik shaxsning doimiy faoliyat koʻrsatadigan ijro etuvchi organi joylashgan yer, agar ishlar (xizmatlar) muayyan doimiy muassasa orqali bajarilgan (koʻrsatilgan) boʻlsa, ushbu doimiy muassasa joylashgan yer asosida Oʻzbekiston Respublikasining hududida haqiqatda hozir boʻlib turgan boʻlsa, Oʻzbekiston Respublikasining hududi sotib oluvchining faoliyati amalga oshiriladigan joy hisoblanadi. Ushbu bandning qoidalari quyidagi hollarda qoʻllaniladi:

intellektual mulk obyektlariga boʻlgan huquq oʻtkazilgan yoki ulardan foydalanish huquqi berilganda;

maslahat berish, auditorlik, yuridik (advokatlik), buxgalterlik, reklama, injiniring xizmatlari, shuningdek axborotga ishlov berish xizmatlari koʻrsatilganda. Injiniring xizmatlari jumlasiga mahsulotni (ishlarni, xizmatlarni) ishlab chiqarish va realizatsiya qilish jarayoniga tayyorgarlik, sanoat, qishloq xoʻjaligi va boshqa obyektlar qurilishi hamda ulardan foydalanilishga tayyorgarlik boʻyicha muhandislik-maslahat berish yoʻsinidagi xizmatlar, loyihalash oldi va loyihalash xizmatlari (texnik-iqtisodiy asoslarni, loyiha-konstruktorlik yechimlarini tayyorlash va boshqa shunga oʻxshash xizmatlar) kiradi. Axborotga ishlov berish xizmatlari jumlasiga axborot massivlarini toʻplash va umumlashtirish, tizimlashtirish hamda bu axborotga ishlov berish natijalarini foydalanuvchilar tasarrufiga taqdim etish xizmatlari kiradi;