165-modda. Soliqni toʻlov manbaida hisoblab chiqarish va ushlab qolish tartibi

Yuridik shaxslardan toʻlov manbaida olinadigan foyda soligʻi belgilangan stavkalarni chegirmalarni amalga oshirmasdan toʻlanadigan daromad summasiga nisbatan qoʻllash orqali hisoblab chiqariladi.

Agar ushbu Kodeksning 1551-moddasida boshqacha qoida nazarda tutilmagan boʻlsa, yuridik shaxslardan toʻlov manbaida olinadigan foyda soligʻini yuridik shaxslar quyidagilarni toʻlash paytida ushlab qolishi shart:

dividendlar va foizlarni;

Oʻzbekiston Respublikasi norezidentlariga daromadlarni.

Yuridik shaxslardan olinadigan foyda soligʻining summasi toʻlov manbaida ushlab qolinmagan yoki Oʻzbekiston Respublikasi xalqaro shartnoma qoidalarining gʻayriqonuniy tarzda qoʻllanilishi mazkur soliq ushlab qolinmasligiga yoxud toʻliq ushlab qolinmasligiga sabab boʻlgan taqdirda, Oʻzbekiston Respublikasi rezidenti yoki Oʻzbekiston Respublikasida faoliyatni doimiy muassasa orqali amalga oshirayotgan Oʻzbekiston Respublikasi norezidenti yuridik shaxslardan olinadigan foyda soligʻining ushlab qolinmagan summasini va u bilan bogʻliq penya summasini qonun hujjatlariga muvofiq budjetga kiritishi shart.

Ushbu moddaning ikkinchi va uchinchi qismlarida koʻrsatilgan shaxslar:

1) yuridik shaxslardan olinadigan foyda soligʻini Oʻzbekiston Respublikasi norezidentlariga dividendlar, foizlar va toʻlovlarni toʻlash sanasidan kechiktirmay budjetga oʻtkazishi. Banklar Oʻzbekiston Respublikasining norezidentlariga amalga oshirilgan toʻlovlar (dividendlar va foizlar toʻlovidan tashqari) boʻyicha yuridik shaxslardan olinadigan foyda soligʻini toʻlov amalga oshirilgan oydan keyingi oyning beshinchi kunidan kechiktirmay budjetga oʻtkazadi;

2) yuridik shaxslardan olinadigan foyda soligʻi hisob-kitobini davlat soliq xizmati organlariga toʻlov amalga oshirilgan hisobot davri tugagandan keyin yigirma besh kundan kechiktirmay taqdim etishi;

3) davlat soliq xizmati organlariga Oʻzbekiston Respublikasi Davlat soliq qoʻmitasi va Oʻzbekiston Respublikasi Moliya vazirligi tomonidan tasdiqlanadigan shakldagi, bu shaxslarning soliq toʻlovchining identifikatsiya raqami, ularning nomi, daromadining umumiy summasi va soliq davri uchun ushlab qolingan yuridik shaxslardan olinadigan foyda soligʻining umumiy summasi koʻrsatilgan maʼlumotnomani soliq davri tugaganidan keyin oʻttiz kun ichida taqdim etishi;

4) daromad oluvchi shaxslarga ularning talabiga binoan, daromad summasi va soliq davri uchun ushlab qolingan soliqning umumiy summasi haqida Oʻzbekiston Respublikasi Davlat soliq qoʻmitasi va Oʻzbekiston Respublikasi Moliya vazirligi tomonidan tasdiqlanadigan shaklda maʼlumotnoma taqdim etishi shart.