“Oʻzbekiston Respublikasining Tashqi iqtisodiy faoliyati toʻgʻrisida”gi Oʻzbekiston Respublikasining Qonuniga oʻzgartishlar va qoʻshimchalar kiritish haqida (627-XII-son)

02.07.1992

Oʻzbekiston Respublikasining qonuni

Oʻzbekiston Respublikasi Oliy Kengashi tomonidan 1991-yil 14-iyunda qabul qilingan “Oʻzbekiston Respublikasining tashqi iqtisodiy faoliyati toʻgʻrisida”gi Oʻzbekiston Respublikasining Qonuniga (Oʻzbekiston Respublikasi Oliy Kengashining Axborotnomasi, 1991-yil, № 8, 182-modda) quyidagi oʻzgartishlar kiritilsin:

1. Birinchi moddaning birinchi satridagi “Oʻzbekiston Respublikasining tashqi iqtisodiy faoliyati” degan soʻzlar “Tashqi iqtisodiy faoliyat” degan soʻzlar bilan, “tashqi iqtisodiy hamkorlik oʻrnatishga” degan soʻzlar esa “oʻzaro foydali hamkorlik oʻrnatishga” degan soʻzlar bilan almashtirilsin.

2. 3-modda chiqarib tashlansin. Keyingi moddalarning tartib raqami tegishli ravishda oʻzgartirilsin.

3. 4-moddadagi “va SSSR” degan soʻzlar chiqarib tashlansin.

4. 6-moddadagi “SSR Ittifoqi ixtiyoriga berilgan masalalarda SSSR Qonunlari” soʻzlari chiqarib tashlansin.

5. 7-modda quyidagi tahrirda bayon etilsin:

“7-modda. Qoraqalpogʻiston Respublikasining tashqi iqtisodiy faoliyat sohasidagi vakolatlari

Qoraqalpogʻiston Respublikasining tashqi iqtisodiy faoliyat sohasidagi vakolatlari Qoraqalpogʻiston Respublikasining Konstitutsiyasi va qonunlari bilan belgilanadi”.

6. 10-moddaning ikkinchi qismidagi “sovet fuqarolari” degan soʻzlar “Oʻzbekiston Respublikasining fuqarolari” degan soʻzlar bilan almashtirilsin.

7. 11-moddaning sarlavhasidagi va birinchi qismidagi “va SSR Ittifoqi” degan soʻzlar chiqarib tashlansin.

Shu moddaning ikkinchi qismidagi “yoxud SSSRning savdo yoki boshqa vakolatxonalari huzurida respublika vakolatxonalari” degan soʻzlar chiqarib tashlansin.

8. 12-moddaning birinchi qismi quyidagi tahrirda bayon etilsin:

“Oʻzbekiston Respublikasi hududida uning qonunlariga muvofiq chet el investitsiyasi ishtirokidagi korxonalar, Oʻzbekiston Respublikasi va xorijiy davlatlarning yuridik shaxslari hamda fuqarolari ishtirokida xalqaro iqtisodiy tashkilotlar va moliya tashkilotlari tuzilishi mumkin”.

12-moddaning toʻrtinchi qismi quyidagi tahrirda bayon etilsin:

“Oʻzbekiston Respublikasida erkin iqtisodiy zonalar tuzilishi mumkin, bu zonalarda xoʻjalik faoliyatini amalga oshirish shartlari Oʻzbekiston Respublikasi qonunlari bilan belgilanadi”.

9. 13-moddaning yettinchi xatboshisidagi “SSSR davlat chegarasi orqali” degan soʻzlar chiqarib tashlansin.

10. 17-moddaning birinchi qismidagi “6-moddasida” degan soʻzlar “5-moddasida” degan soʻzlar bilan almashtirilsin.

11. 18-moddaning birinchi qismidagi “Oʻzbekiston Respublikasi” degan soʻzlar “davlat” degan soʻz bilan almashtirilsin.

Oʻzbekiston Respublikasining Prezidenti I. Karimov

Toshkent sh.,

1992-yil 2-iyul,

627-XII-son