8-modda. Xalqaro shartnomalarni tuzish toʻgʻrisidagi takliflar

Oʻzbekiston Respublikasi nomidan xalqaro shartnomalarni tuzish toʻgʻrisidagi takliflar — Oʻzbekiston Respublikasi Prezidentiga, Oʻzbekiston Respublikasi Hukumati tasarrufidagi masalalar boʻyicha Oʻzbekiston Respublikasi nomidan xalqaro shartnomalarni tuzish toʻgʻrisidagi takliflar esa — Oʻzbekiston Respublikasi Hukumatiga kiritiladi.

Oʻzbekiston Respublikasi nomidan xalqaro shartnomalarni tuzish toʻgʻrisidagi takliflar Oʻzbekiston Respublikasi Prezidentiga Tashqi ishlar vazirligi tomonidan kiritiladi. Boshqa vazirliklar va idoralar oʻzlarining vakolatlariga kiradigan masalalar boʻyicha Oʻzbekiston Respublikasi nomidan xalqaro shartnomalar tuzish toʻgʻrisidagi takliflarini Tashqi ishlar vazirligi bilan birga yoki u bilan kelishilgan holda Oʻzbekiston Respublikasi Prezidentiga kiritadilar.

Oʻzbekiston Respublikasi Hukumati nomidan Oʻzbekiston Respublikasining xalqaro shartnomalarini tuzish toʻgʻrisidagi takliflar Oʻzbekiston Respublikasi Hukumatiga Tashqi ishlar vazirligi tomonidan kiritiladi.

Boshqa vazirliklar va idoralar Oʻzbekiston Respublikasining xalqaro shartnomalarini tuzish toʻgʻrisidagi takliflarini Oʻzbekiston Respublikasi Hukumatiga Tashqi ishlar vazirligi bilan birga yoki u bilan kelishilgan holda, mustaqil ravishda esa ushbu Qonunda nazarda tutilgan hollardagina kiritadilar.

Vazirliklar va idoralar tomonidan idoralararo shartnomalar tuzish toʻgʻrisida takliflar kiritish tartibini Oʻzbekiston Respublikasi Hukumati belgilaydi.

Oʻzbekiston Respublikasining xalqaro shartnomalarini tuzish toʻgʻrisidagi takliflar Oʻzbekiston Respublikasi Prezidentiga yoki Oʻzbekiston Respublikasi Hukumatiga kiritilgunga qadar Adliya vazirligi, shuningdek boshqa manfaatdor vazirliklar va idoralar bilan kelishib olinadi.

Xalqaro shartnomani tuzish toʻgʻrisidagi taklif shartnoma loyihasini yoki uning asosiy qoidalarini, uni tuzish maqsadga muvofiq ekanligining asoslarini, shuningdek zarurat boʻlganda, shartnoma tuzishdan kelib chiqishi mumkin boʻlgan moliyaviy-iqtisodiy oqibatlarga berilgan bahoni oʻz ichiga olishi kerak.

Zarur hollarda xalqaro shartnoma loyihasini tuzish yoki koʻrib chiqish uchun manfaatdor vazirliklar va idoralarning vakillari, mutaxassislar va mustaqil ekspertlardan iborat komissiya tuziladi.