18-modda. Ommaviy axborot vositasining chiqarilishiga doir maʼlumotlar
“Ommaviy axborot vositalari toʻgʻrisida”gi Oʻzbekiston Respublikasi Qonuniga oʻzgartish va qoʻshimchalar kiritish haqida (O‘RQ-78-son) · Sana: 15.01.2007 · Amalda
Har bir davriy nashrning chiqarilishida quyidagi maʼlumotlar koʻrsatilishi shart:
davriy nashrning nomi;
davlat roʻyxatidan oʻtkazilgan sanasi va raqami;
muassisning nomi (familiyasi, ismi, otasining ismi);
bosh muharrirning familiyasi, ismi, otasining ismi;
har bir davriy nashr chiqarilishi uchun masʼul boʻlgan tahririyat xodimining familiyasi, ismi, otasining ismi;
tartib raqami va chiqarilgan sanasi, davriy bosma nashrlar uchun esa bosishga ruxsat berilib, imzo qoʻyilgan vaqt (jadvalda belgilangani va amaldagisi);
davriy bosma nashrlar uchun — indeksi, adadi, bahosi yoki “Kelishilgan narxda”, “Bepul” degan yozuvlar;
tahririyat va bosmaxonaning joylashgan yeri (pochta manzili).
Davriy bosma nashrning elektron shaklida quyidagi maʼlumotlar boʻlishi kerak:
davriy nashrning nomi;
davlat roʻyxatidan oʻtkazilganligi toʻgʻrisidagi guvohnomaning sanasi va raqami;
muassisning nomi (familiyasi, ismi, otasining ismi);
bosh muharrirning familiyasi, ismi, otasining ismi;
indeks, tahririyatning joylashgan yeri (pochta va elektron manzili).
Tele-, radio-, video-, kinoxronikal dasturlarga va ommaviy axborotni davriy tarqatishning boshqa elektron shakllariga doir maʼlumotlar qonunchilik bilan belgilanadi.