Shaharlar va tumanlar hokimliklari apparati tuzilmasini takomillashtirish toʻgʻrisida (459-son)

30.09.1997

Oʻzbekiston Respublikasi Vazirlar Mahkamasining

qarori

Hududlarda ijtimoiy-iqtisodiy jarayonlarni boshqarishni takomillashtirish va markaziy boshqaruv organlari vakolatlarining bir qismini asta-sekin mahalliy boshqaruv organlariga berish, mahalliy hokimiyat organlari faoliyatining samaradorligini yanada oshirish maqsadida, Oʻzbekiston Respublikasi Konstitutsiyasining XXI bobi va “Mahalliy davlat hokimiyati toʻgʻrisida”gi Qonunga muvofiq Vazirlar Mahkamasi qaror qiladi:

1. Shaharlar va tumanlar hokimliklari apparatining boshqaruv tarmoq tizimidan funksional tizimiga oʻtishi maqsadga muvofiq deb hisoblansin.

2. Shaharlar va tumanlar hokimliklari apparatining namunaviy tuzilmasi 1-4-ilovalarga* muvofiq mehnatga haq toʻlash boʻyicha guruhlar roʻyxati va masʼul xodimlarning cheklangan soni 5—8-ilovalarga* muvofiq tasdiqlansin.

* 1—8-ilovalar rus tilidagi matnda berilgan.

3. Birinchi chaqiriq Oʻzbekiston Respublikasi Oliy Majlisining toʻqqizinchi sessiyasida “Mahalliy davlat hokimiyati toʻgʻrisida”gi Qonunga kiritilgan tuzatishlarga muvofiq Qoraqalpogʻiston Respublikasi Vazirlar Kengashi va viloyatlar hokimliklarining Qoraqalpogʻiston Respublikasiga hamda viloyatlarga boʻysunuvchi bir qator shaharlar va tegishli qishloq tumanlari hokimliklari apparatlarini birlashtirish boʻyicha takliflari qabul qilinsin.

Viloyatga boʻysunuvchi shaharlar hamda qishloq tumanlari hokimliklari apparatlari tuzilmalarining birlashtirilishi munosabati bilan vazirliklar va idoralar Qoraqalpogʻiston Respublikasi Vazirlar Kengashi, viloyatlar hokimliklari bilan birgalikda bir oy muddatda ushbu hududlardagi oʻz tasarruflarida boʻlgan boshqaruv organlari tuzilmasini va xodimlarining cheklangan sonini qayta koʻrib chiqsinlar.

4. Shaharlar va tumanlar hokimliklari apparati zimmasiga quyidagi asosiy vazifalarni hal etish yuklansin:

hududlarni ijtimoiy-iqtisodiy rivojlantirish yuzasidan kompleks dasturlarni ishlab chiqish hamda xalq xoʻjaligi tarmoqlarida islohotlarni chuqurlashtirish va xalq farovonligini oshirishni taʼminlash yuzasidan hukumat va hududlar dasturlarini amalga oshirish;

mahalliy oʻzini oʻzi boshqarish organlari faoliyatini muvofiqlashtirish va ularga rahbarlik qilish;

fuqarolarni ijtimoiy va huquqiy himoya qilish, tabiiy va mehnat resurslaridan oqilona foydalanish hamda atrof muhitni muhofaza qilish boʻyicha tadbirlarni amalga oshirish;

qonunlar, Oliy Majlis qarorlari, Oʻzbekiston Respublikasi Prezidenti farmonlari va farmoyishlari, Vazirlar Mahkamasi, xalq deputatlari viloyatlar va Toshkent shahar Kengashlari va ularning hokimliklarining qarorlari va farmoyishlari ijrosini taʼminlash;

tadbirkorlik va xususiy tashabbusni qoʻllab-quvvatlash va sogʻlom raqobat muhitini yaratish.

5. Shaharlar va tumanlar hokimliklari apparati, ularning mustaqil boshqarmalari (boʻlimlari) rahbar xodimlari va mutaxassislari mehnatiga haq toʻlashning Yagona tarif setkasi boʻyicha tarif razryadlari 9 — 12-ilovalarga* muvofiq tasdiqlansin.

* 9—12-ilovalar rus tilidagi matnda berilgan.

6. Vazirlar Mahkamasining 1996-yil 12-apreldagi 147-son qaroriga 5-ilovaning viloyatlar va Toshkent shahar hokimliklari mutaxassislari mehnatiga haq toʻlash boʻyicha razryadlar va tarif koeffitsiyentlariga oid qismi hamda 6, 7, 11, 12, 13, 14-ilovalar oʻz kuchini yoʻqotgan deb hisoblansin.

7. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov, Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1997-yil 30-sentabr,

459-son