2006-yil 28-30-mart kunlari boʻlib oʻtgan Oʻzbekiston-Koreya sammiti davomida imzolangan bitimlar va erishilgan ahdlashuvlarni amalga oshirish boʻyicha birinchi navbatdagi chora-tadbirlar toʻgʻrisida (PQ-321-son)

11.04.2006

Oʻzbekiston Respublikasi Prezidentining

Qarori

Oʻzbekiston Respublikasi Prezidentining Koreya Respublikasiga Davlat tashrifi (2006-yil 28—30-mart) davomida Oʻzbekiston Respublikasi bilan Koreya Respublikasi oʻrtasida imzolangan Strategik sheriklik toʻgʻrisidagi qoʻshma deklaratsiya, ikki tomonlama hukumatlararo va idoralararo bitimlar, siyosiy, savdo-iqtisodiy, investitsiyaviy va madaniy-gumanitar sohalardagi hamkorlikni rivojlantirish toʻgʻrisida erishilgan ahdlashuvlar keng miqyosda va oʻz vaqtida amalga oshirilishini taʼminlash maqsadida:

1. Davlat tashrifi davomida imzolangan Koreya Respublikasi bilan ikki tomonlama hamkorlikni yanada chuqurlashtirishga qaratilgan bitimlar va erishilgan ahdlashuvlarni amalga oshirish boʻyicha birinchi navbatdagi tadbirlar Dasturi 1-ilovaga* muvofiq;

* Ilova rus tilidagi matnda berilgan.

Koreyaning toʻgʻridan toʻgʻri investitsiyalari hisobiga va bank-moliya hamkorligi doirasida amalga oshirish taklif etilayotgan investitsiya loyihalari roʻyxati 2-ilovaga* muvofiq tasdiqlansin.

* Ilova rus tilidagi matnda berilgan.

Mazkur qarorning ilovalarida koʻrsatilgan vazirliklar va idoralar, masʼul ijrochilar Koreya Respublikasi bilan hamkorlikni yanada rivojlantirish boʻyicha tasdiqlangan tadbirlarning belgilangan muddatlarda ijro etilishini taʼminlasinlar.

2. Oʻzbekiston Respublikasi Vazirlar Mahkamasining Iqtisodiyot va tashqi iqtisodiy aloqalar masalalari yigʻma axborot-tahlil departamenti, Tashqi ishlar vazirligi, Iqtisodiyot vazirligi, Moliya vazirligi hamda Tashqi iqtisodiy aloqalar, investitsiyalar va savdo vazirligi Koreya Respublikasining tegishli hukumat muassasalari bilan strategik sheriklik toʻgʻrisidagi Qoʻshma deklaratsiyani toʻlaqonli amalga oshirishga qaratilgan hamkorlikning uzoq muddatli rejalarini ishlab chiqish boʻyicha doimiy faoliyat yuritadigan ishchi guruhlarni tashkil etsin, shuningdek Koreya Respublikasiga Davlat tashrifi davomida imzolangan hujjatlar va bitimlar ijrosi ustidan tizimli nazorat oʻrnatsin.

3. Mazkur qarorning ijrosini nazorat qilish Oʻzbekiston Respublikasi moliya vaziri R.S. Azimov va Tashqi ishlar vaziri E.M. Gʻaniyev zimmalariga yuklansin.

Oʻzbekiston Respublikasi Prezidenti I. KARIMOV

Toshkent sh.,

2006-yil 11-aprel,

PQ–321-son