“Oʻzbekiston Respublikasining pul tizimi toʻgʻrisida”gi Oʻzbekiston Respublikasi qonunini amalga kiritish haqida (836-XII-son)

06.05.1993

Oʻzbekiston Respublikasi Oliy Kengashining

Qarori

Rasmiy toʻlov vositasi sifatida rubldan foydalanayotgan davlatlarning yagona iqtisodiy maydonini saqlab qolish, integratsiyalash va xoʻjalik aloqalarini tiklashga qaratilgan kelishilgan kredit, pul, budjet, narx-navo, boj va soliq siyosatini yuritish ishiga sodiq ekanligini taʼkidlab, Oʻzbekiston Respublikasi Oliy Kengashi qaror qiladi:

1. “Oʻzbekiston Respublikasining pul tizimi toʻgʻrisida”gi Oʻzbekiston Respublikasi Qonuni eʼlon qilingan paytdan boshlab amalga kiritilsin.

2. Muomalada boʻlgan 1961—1992-yillarda chiqarilgan SSSR Davlat bankining banknotlari, SSSR davlat xazinasi biletlari va tangalari, shuningdek 1992-1993-yillarda chiqarilgan Rossiya Federatsiyasi Markaziy bankining pul belgilari Oʻzbekiston Respublikasining butun hududida barcha turdagi toʻlovlarda, hisoblarga, jamgʻarmalarga, akkreditivlarga kiritish uchun va oʻtkazish uchun amaldagi qiymati boʻyicha qabul qilinishi shart.

3. Oʻzbekiston Respublikasi Vazirlar Mahkamasi va Oʻzbekiston Respublikasi Markaziy banki naqd pullarga boʻlgan ehtiyoj qisqartirilishini taʼminlovchi naqd pulsiz hisob-kitob qilish usulini toʻlov oborotiga keng joriy etish, shuningdek savdo tushumlari inkassatsiyasini yaxshilash tadbirlarini koʻrsin.

4. Oʻzbekiston Respublikasining qonunlarini bundan keyin “Oʻzbekiston Respublikasining pul tizimi toʻgʻrisida”gi Oʻzbekiston Respublikasi Qonuniga muvofiq holga keltirilgunga qadar avval chiqarilgan qonun hujjatlari ushbu Qonunga zid kelmasligi sababli qoʻllanilaveradi.

5. Oʻzbekiston Respublikasi Vazirlar Mahkamasi “Oʻzbekiston Respublikasining pul tizimi toʻgʻrisida”gi Oʻzbekiston Respublikasi Qonuni qabul qilinishi munosabati bilan Oʻzbekiston Respublikasi qonun hujjatlariga oʻzgartishlar va qoʻshimchalar kiritish haqidagi takliflarni belgilangan tartibda taqdim etsin hamda Hukumatning, vazirliklar va idoralarning meʼyoriy hujjatlarini ushbu Qonunga muvofiq holga keltirsin.

Oʻzbekiston Respublikasi Oliy Kengashining Raisi Sh. YOʻLDOShEV

Toshkent sh.,

1993-yil 6-may,

836-XII-son