1998/99 oʻquv yilida Oʻzbekiston Respublikasining oliy taʼlim muassasalariga qabul toʻgʻrisida (228-son)
25.05.1998
Oʻzbekiston Respublikasi Vazirlar Mahkamasining
qarori
[Koʻchirma]
“Taʼlim toʻgʻrisida” va “Kadrlar tayyorlash milliy dasturi toʻgʻrisida”gi Oʻzbekiston Respublikasi qonunlarini, Oʻzbekiston Respublikasi Prezidentining “Taʼlim-tarbiya va kadrlar tayyorlash tizimini tubdan isloh qilish, barkamol avlodni voyaga yetkazish toʻgʻrisida”gi Farmonini bajarish yuzasidan zamonaviy bilimlar va koʻnikmalarga ega boʻlgan yuqori malakali mutaxassislar tayyorlash, umumiy oʻrta va oʻrta maxsus, kasb-hunar taʼlimi tizimini zamonaviy talablarga javob beradigan oʻqituvchi va pedagog-muhandislar bilan taʼminlash, hamda oliy taʼlim muassasalariga qobiliyatli yoshlarni sifatli tanlab olish maqsadida Vazirlar Mahkamasi qaror qiladi:
1. 1998/99 oʻquv yilida bakalavrlar tayyorlash boʻyicha umumiy qabul soni 42 ming, shu jumladan 21 ming davlat grantlari asosidagi qabul kvotalari belgilanib, ular Oʻzbekiston Respublikasining oliy taʼlim muassasalari hamda taʼlim yoʻnalishlari boʻyicha 1 va 2-ilovalarga* muvofiq taqsimlansin.
* 1 va 2-ilovalar keltirilmaydi.
Belgilansinki:
oliy taʼlim muassasalariga oʻrnatilgan qabul rejasining 50 foizi davlat grantlari hisobidan, qolgan 50 foizi toʻlov-kontrakt asosida tashkil etilsin;
oliy taʼlim muassasalariga qabul barcha uchun (ham grantlar, ham kontrakt boʻyicha) teng huquqlilik, yagona qabul qoidalari asosida amalga oshirilib, test sinovlarida eng yuqori ball toʻplagan abituriyentlarning davlat grantlari boʻyicha birinchi navbatda qabul qilinish huquqi taʼminlansin;
qolgan abituriyentlar test ballari reytingi asosida oʻrnatilgan toʻlov-kontrakt kvotalari doirasida qabul qilinish huquqiga egadir.
2. Qabulni tashkil etish bilan bogʻliq masalalarni echish uchun Oʻzbekiston Respublikasi taʼlim muassasalariga qabul qilish boʻyicha Davlat komissiyasining tarkibi 3-ilovaga* muvofiq tasdiqlansin.
* 3-ilova keltirilmaydi.
3. Davlat komissiyasi Vazirlar Mahkamasiga:
Oʻzbekiston Respublikasining oliy taʼlim muassasalariga talabalar qabul qilish tartibi va qoidalari toʻgʻrisidagi nizomga ushbu qaror talablari asosida tegishli oʻzgartirishlar;
yuridik va jismoniy shaxslardan tushgan arizalar va test sinovlari natijalaridan kelib chiqqan holda, taʼlim muassasalariga oʻrnatilgan umumiy qabul rejasi doirasida, taʼlim yoʻnalishlari va qabul koʻrsatkichlari boʻyicha zarur boʻlgan oʻzgartirishlar toʻgʻrisida takliflar kiritsin.
4. Oliy taʼlim muassasalariga ega boʻlgan vazirlik va idoralar bir hafta muddatda oʻzlariga qarashli taʼlim muassasalariga grantlarni va toʻlov-kontrakt asosidagi oʻrinlar kvotasini taʼlim shakllari va tillari boʻyicha taqsimlash toʻgʻrisidagi takliflarni Davlat komissiyasiga tasdiqlash uchun kiritsinlar.
6. Oʻzbekiston Respublikasi Vazirlar Mahkamasining 1997-yil 1-iyuldagi 332-son qarori oʻz kuchini yoʻqotgan deb hisoblansin.
7. Mazkur qarorning bajarilishini nazorat qilish Bosh vazir oʻrinbosari A. A. Azizxoʻjayev zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1998-yil 25-may,
228-son