“Radiochastota spektrining texnik nazorat tizimidan foydalanish uchun asbob-uskunalar yetkazib berish, montaj qilish, sozlash va ishga tushirish (ikkinchi bosqich)” loyihasini amalga oshirish toʻgʻrisida (558-son)

22.12.2003

Oʻzbekiston Respublikasi Vazirlar Mahkamasining

qarori

Oʻzbekiston Respublikasining radiochastota resursini himoya qilish tizimini yanada takomillashtirish, undan foydalanish ustidan monitoringni taʼminlash, respublikaning butun hududida radionurlar manbalari bilan ijozat berilmagan ishlar olib borilishini oʻz vaqtida aniqlash va ularga barham berish maqsadida Vazirlar Mahkamasi qaror qiladi:

1. Oʻzbekiston aloqa va axborotlashtirish agentligining “Kurt Mitterfelner GmbX” firmasi (Germaniya) bilan birgalikda “Radiochastota spektrining texnik nazorat tizimidan foydalanish uchun asbob-uskunalar yetkazib berish, montaj qilish, sozlash va ishga tushirish (ikkinchi bosqich)” loyihasini amalga oshirish toʻgʻrisidagi taklifiga rozilik berilsin.

2. Quyidagilar:

loyihaning umumiy qiymati 6060,4 ming yevroni, shu jumladan erkin muomaladagi valyutadagi xarajatlari — 6008,6 ming yevroni va milliy valyutada — 51,8 ming yevroga teng summani tashkil etishi;

Oʻzbekiston aloqa va axborotlashtirish agentligining Elektromagnit moslik markazi tomonidan “Kurt Mitterfelner GmbX” firmasi (GFR) bilan qurilishning ikkinchi bosqichi boʻyicha radiochastota spektri texnik-nazorat tizimiga asbob-uskunalar yetkazib berish, montaj qilish, sozlash va foydalanishga topshirish uchun 5 730 ming yevro miqdorida kontrakt tuzilganligi;

Oʻzbekiston aloqa va axborotlashtirish agentligining Elektromagnit moslik markazi jalb etilayotgan kreditlar boʻyicha qarz oluvchi ekanligi maʼlumot uchun qabul qilinsin.

3. “Radiochastota spektrning texnik nazorat tizimidan foydalanish uchun asbob-uskunalar yetkazib berish, montaj qilish, sozlash va ishga tushirish (ikkinchi bosqich)” loyihasining texnik-iqtisodiy koʻrsatkichlari 1-ilovaga* muvofiq tasdiqlansin.

* 1-ilova berilmaydi.

4. Belgilansinki, koʻrsatib oʻtilgan kontraktni moliyalashtirish quyidagi tartibda amalga oshiriladi:

kontrakt qiymatining 859,5 ming yevro miqdoridagi 15 foizi KfV Bankining (Germaniya) Elektromagnit moslik markaziga 4 yil muddatda qaytarish sharti bilan berilayotgan krediti hisobiga;

kontrakt qiymatining 4870,5 ming yevro miqdoridagi 85 foizi KfV Bankining (Germaniya) Elektromagnit moslik markaziga “Germes” eksport-kredit agentligining (Germaniya) 5 yil muddatda qaytarish sharti bilan berilayotgan sugʻurta qoplamasi ostidagi krediti hisobiga.

Belgilab qoʻyilsinki, asosiy qarzni, foizlarni, vositachilik haqini va jalb etilayotgan koʻrsatib oʻtilgan kreditlarga xizmat koʻrsatish bilan bogʻliq xarajatlarni qaytarish Elektromagnit moslik markazining oʻz mablagʻlari hisobiga 2 va 3-ilovalarga* muvofiq amalga oshiriladi.

* 2, 3-ilovalar berilmaydi.

5. Oʻzbekiston aloqa va axborotlashtirish agentligining Elektromagnit moslik markazi koʻrsatib oʻtilgan loyihani moliyalashtirish boʻyicha xorijiy bank — KfV Banki (Germaniya) bilan belgilangan tartibda kredit bitimlari tuzsin.

6. Oʻzbekiston Respublikasi Moliya vaziri Markaz bilan qonun hujjatlarida belgilangan tartibda kafolat bitimi tuzib, Elektromagnit moslik markazining toʻlov majburiyatlari boʻyicha xorijiy bankka kafolat berishga vakil qilinsin.

7. Oʻzbekiston Respublikasi Adliya vazirligi xorijiy bankni qoniqtiradigan shakl boʻyicha Oʻzbekiston Respublikasi Hukumatining kafolatlari yuzasidan yuridik xulosa bersin.

8. Oʻzbekiston Respublikasi Tashqi iqtisodiy aloqalar agentligi Elektromagnit moslik markazining “Kurt Mitterfelner GmbX” firmasi bilan tuzgan kontraktini belgilangan tartibda ekspertizadan oʻtkazsin.

9. “Kurt Mitterfelner GmbX” xorijiy kompaniyasi, xorijiy bank va “Germes” eksport-kredit agentligi ushbu loyiha doirasida Oʻzbekiston Respublikasi hududidagi manbadan norezidentlardan undiriladigan daromad (foyda) soligʻi toʻlashdan ozod qilinsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.A. Aripov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2003-yil 22-dekabr,

558-son