Kadrlar tayyorlash uchun stipendiyalar berish loyihasi boʻyicha Yaponiya Hukumatining begʻaraz yordamidan samarali foydalanish chora-tadbirlari toʻgʻrisida (556-son)

22.12.2003

Oʻzbekiston Respublikasi Vazirlar Mahkamasining

qarori

Kadrlar tayyorlash uchun stipendiyalar berish loyihasini amalga oshirish uchun Yaponiya Hukumatining 134 mln Yaponiya yeni miqdoridagi begʻaraz yordamidan samarali foydalanilishini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Tashqi ishlar vaziri S.S. Safoyev Oʻzbekiston Respublikasi Hukumati nomidan Ayirboshlash notasi sifatidagi bitimni imzolasin.

2. Quyidagilarga:

Oʻzbekiston Respublikasi Oliy va oʻrta maxsus taʼlim vazirligiga va Tashqi iqtisodiy aloqalar agentligiga begʻaraz yordamni olish uchun barcha tartib-qoidalarni Yaponiya tomoni bilan kelishilgan muddatlarda rasmiylashtirish, shu jumladan stipendiatlarni tanlash va Yaponiyaga yuborish;

Oʻzbekiston Respublikasi Tashqi iqtisodiy faoliyat milliy bankiga yuqorida koʻrsatib oʻtilgan begʻaraz yordamga hisob-kitob xizmati koʻrsatish yuklansin.

3. Begʻaraz yordam doirasida Oʻzbekiston Respublikasiga kelayotgan asbob-uskunalar va xizmatlar bojxona toʻlovlari toʻlashdan ozod etilsin.

4. Oʻzbekiston Respublikasi Tashqi ishlar vazirligi Oliy va oʻrta maxsus taʼlim vazirligining buyurtmanomalari boʻyicha loyihani amalga oshirishda qatnashadigan xorijiy mutaxassislarga kirish vizalari konsullik yigʻimlari undirilmasdan belgilangan tartibda rasmiylashtirilishini taʼminlasin.

5. Oʻzbekiston Respublikasi Ichki ishlar vazirligi Oliy va oʻrta maxsus taʼlim vazirligining buyurtmanomalari boʻyicha loyihani amalga oshirishda qatnashadigan xorijiy mutaxassislarni yashash joyi boʻyicha davlat boji undirilmasdan vaqtincha roʻyxatdan oʻtkazsin va vaqtincha roʻyxatdan oʻtkazish muddatini uzaytirsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari E.M. Gʻaniyev va A.A. Azizxoʻjayev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2003-yil 22-dekabr,

556-son