Muayyan hududda (notarial okrugda) notarial harakatlarni amalga oshirish vakolatlarini berish boʻyicha tanlov oʻtkazish tartibi toʻgʻrisidagi nizomni tasdiqlash haqida (1521-son)

12.11.2005

Oʻzbekiston Respublikasi Adliya vazirligi hAYʼATINING

Qarori

[Oʻzbekiston Respublikasi Adliya vazirligi tomonidan 2005-yil 12-noyabrda 1521-son bilan davlat roʻyxatidan oʻtkazilgan]

Oʻzbekiston Respublikasida notarial harakatlarni amalga oshirish vakolatlarini berish boʻyicha tanlov oʻtkazishga doir masalalarni yanada takomillashtirish maqsadida hamda “Notariat toʻgʻrisida”gi Oʻzbekiston Respublikasi Qonunining 15-moddasiga muvofiq Adliya vazirligi hayʼati, qaror qiladi:

1. Muayyan hududda (notarial okrugda) notarial harakatlarni amalga oshirish vakolatlarini berish boʻyicha tanlov oʻtkazish tartibi toʻgʻrisidagi Nizom ilovaga muvofiq tasdiqlansin.

2. Qoraqalpogʻiston Respublikasi Adliya vaziri, viloyatlar va Toshkent shahar adliya boshqarmalari boshliqlari:

Muayyan hududda (notarial okrugda) notarial harakatlarni amalga oshirish vakolatlarini berish boʻyicha oʻtkaziladigan tanlovlarni toʻgʻri tashkil etilishi va mazkur Nizom talablariga qatiy rioya etgan holda oʻtkazilishini;

malaka komissiyalari tomonidan tanlovga oid qabul qilingan qarorlarni va boshqa maʼlumotlarni Oʻzbekiston Respublikasi Adliya vazirligiga belgilangan muddatlarda qatʼiy yuborilishini taʼminlasinlar.

3. Belgilansinki, Qoraqalpogʻiston Respublikasi Adliya vaziri, viloyatlar va Toshkent shahar adliya boshqarmalari boshliqlari hamda joylardagi malaka komissiyalari raislari va aʼzolari muayyan hududda (notarial okrugda) notarial harakatlarni amalga oshirish vakolatlarini berish boʻyicha tanlovlarning odilona va qonuniy oʻtkazilishiga shaxsan javobgardirlar.

4. Oʻzbekiston Respublikasi Adliya vazirligi qoshidagi Apellatsiya komissiyasi (E. Kanyazov) malaka komissiyalari tomonidan muayyan hududda (notarial okrugda) notarial harakatlarni amalga oshirish vakolatlarini berish boʻyicha tanlovlarni oʻtkazilishida yoʻl qoʻyilgan har bir qonunbuzilishni chuqur va har tomonlama oʻrganib chiqilishini hamda bunday qonunbuzilishga yoʻl qoʻygan mansabdor shaxslarni javobgarlikka tortish boʻyicha Adliya vaziriga aniq takliflar kiritilishini taʼminlasin.

5. Notariat, FHDY va advokatura boshqarmasi (P. Samatov):

2005-yilning dekabr oyida mazkur Nizom qoidalarini qoʻllash boʻyicha oʻquv seminari oʻtkazsin;

muayyan hududda (notarial okrugda) notarial harakatlarni amalga oshirish vakolatlarini berish uchun tanlovlar oʻtkazish boʻyicha malaka komissiyalarining faoliyatini muntazam ravishda umumlashtirib borsin va bu haqda har yarim yilda Adliya vaziriga axborot berib borsin.

6. Idoraviy meʼyoriy hujjatlarni davlat roʻyxatidan oʻtkazish boshqarmasi (N. Burxonov) ushbu hayʼat qarorini davlat roʻyxatidan oʻtkazsin va Oʻzbekiston Respublikasi vazirliklari, davlat qoʻmitalari va idoralari normativ-huquqiy hujjatlarining Davlat reyestriga tegishli yozuv kiritsin.

7. Qonun hujjatlarini turkumlash va huquqiy axborot boshqarmasi (U. Ayubov) ushbu hayʼat qarorini “Oʻzbekiston Respublikasi Qonun hujjatlari toʻplami” — “Sobraniye zakonodatelstva Respubliki Uzbekistan”da nashr etishni taʼminlasin.

8. Oʻzbekiston Respublikasi Adliya vazirligi hayʼatining 1997-yil 28-apreldagi 33-sonli qarori bilan tasdiqlangan “Notarius lavozimini taʼsis etish va tugatish hamda notarius vakolatlarini berish boʻyicha tanlov oʻtkazish tartibi toʻgʻrisida”gi Nizom oʻz kuchini yoʻqotgan deb hisoblansin.

9. Ushbu qarorning ijrosini nazorat qilish vazir oʻrinbosari E. Kanyazov zimmasiga yuklatilsin.

Hayʼat raisi, vazir B. MUSTAFOYEV

Toshkent sh.,

2005-yil 12-noyabr,

35-son

Adliya vazirligi hayʼatining 2005-yil 12-noyabrdagi 35-son qarori bilan TASDIQLANGAN

Muayyan hududda (notarial okrugda) notarial harakatlarni amalga oshirish vakolatlarini berish boʻyicha tanlov oʻtkazish tartibi toʻgʻrisidagi

NIZOM

Muayyan hududda (notarial okrugda) notarial harakatlarni amalga oshirish vakolatlarini berish boʻyicha tanlov oʻtkazish tartibi toʻgʻrisidagi Nizom (bundan buyon matnda Nizom deb yuritiladi) “Notariat toʻgʻrisida”gi Oʻzbekiston Respublikasi Qonunining 15-moddasiga muvofiq notariusga muayyan hududda (notarial okrugda) notarial harakatlarni amalga oshirish vakolatlarini berish boʻyicha tanlov oʻtkazish tartibini belgilaydi.

Tanlovning asosiy maqsadi notariuslik lavozimiga chuqur kasbiy bilimga ega boʻlgan, jismoniy va yuridik shaxslarning huquq va qonuniy manfaatlarini himoya qilishga munosib mutaxassislarni tanlab olishdan iborat.

I. Umumiy qoidalar

1. Muayyan hududda (notarial okrugda) notarial harakatlarni amalga oshirish vakolatlarini berish Oʻzbekiston Respublikasi Adliya vazirligi (bundan keyingi oʻrinlarda Adliya vazirligi deb yuritiladi) tomonidan tanlov asosida amalga oshiriladi.

2. Tanlov Adliya vazirligi qoshidagi apellatsiya komissiyasi (bundan keyingi oʻrinlarda komissiya deb yuritiladi) tomonidan oʻtkaziladi.

Komissiya faoliyatini tashkil etish Adliya vazirligi tomonidan tasdiqlanadigan Apellatsiya komissiyasi toʻgʻrisidagi nizomga muvofiq amalga oshiriladi.

Komissiyaning ishchi organi boʻlib Adliya vazirligining Notariat, FHDY va advokatura boshqarmasi (bundan keyingi oʻrinlarda ishchi organi deb yuritiladi) hisoblanadi.

3. Muayyan hududda (notarial okrugda) notarial harakatlarni amalga oshirish vakolatlarini berish boʻyicha tanlov (bundan buyon matnda tanlov deb yuritiladi) notarius lavozimi boʻsh boʻlgan taqdirda yoki qoʻshimcha (yangi) notarius lavozimi taʼsis etilganda oʻtkaziladi.

Notariusning homiladorlik va tugʻish taʼtillariga, shuningdek, bolalarni parvarishlash taʼtillariga chiqishi munosabati bilan notarius lavozimi vaqtincha boʻshagan hollarda ham tanlov oʻtkazilishi mumkin.

4. Notarial harakatlarni amalga oshirish vakolatlarini faqat mazkur Nizomda belgilangan tartibda oʻtkazilgan tanlov natijalariga koʻra beriladi.

Notarial harakatlarni amalga oshirish vakolatlarini boshqa tartibda berish yoki tanlov oʻtkazmasdan berishga yoʻl qoʻyilmaydi.

5. Komissiya majlisining bayonnomalari har bir notarius lavozimi uchun alohida yuritilishi mumkin.

II. Tanlov oʻtkazishni tashkil etish

6. Notarius lavozimi boʻshagandan (vaqtincha boʻshagandan) keyin Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari (bundan keyingi oʻrinlarda adliya boshqarmasi deb yuritiladi) bu haqda buyruq chiqarilgan kunning ertasidan kechiktirmay Adliya vazirligini (buyruqni ilova qilgan holda) xabardor qiladi.

Tegishli adliya boshqarmasining xabarnomasi olingan yoki qoʻshimcha (yangi) notarius lavozimi taʼsis etilgan kundan boshlab yetti kun ichida ishchi organi tomonidan markaziy roʻznomalarda hamda adliya boshqarmalari orqali mahalliy roʻznomalarda tanlov oʻtkazish toʻgʻrisida eʼlon beriladi.

Tanlov oʻtkazish toʻgʻrisidagi eʼlonda quyidagilar koʻrsatilishi lozim:

tanlov oʻtkazilayotgan notarius vakolatlari amal qiladigan notarial okrug va davlat notarial idorasining nomi;

tanlovda ishtirok etuvchilarga qoʻyiladigan talablar. Ushbu talablar mazkur Nizomning 8-bandiga muvofiq eʼlon qilinadi;

tanlovda ishtirok etish uchun taqdim etiladigan hujjatlar va ularni taqdim etishning oxirgi sanasi. Bunda hujjatlarni taqdim etish muddati kamida bir oy etib belgilanadi;

tanlov oʻtkazish joyi va ayrim hollarda tanlov oʻtkazish sanasi.

Agar tanlov notariusning homiladorlik va tugʻish taʼtillariga, shuningdek, bolalarni parvarishlash taʼtillariga chiqishi munosabati bilan oʻtkazilayotgan boʻlsa, eʼlonda bu haqda koʻrsatib oʻtilishi lozim.

Tanlov oʻtkazish toʻgʻrisidagi eʼlon qoʻshimcha ravishda markaziy va mahalliy televideniye, radio hamda internet tarmogʻi orqali berilishi mumkin.

7. Bitta notarial idoraning ikki yoki undan ortiq notarius lavozimlariga tanlovlar komissiyaning alohida majlislarida oʻtkaziladi.

8. Tanlovda yigirma besh yoshdan kichik boʻlmagan, oliy yuridik maʼlumotga, yuridik mutaxassislik boʻyicha kamida uch yil muddatli ish stajiga ega boʻlgan, shu jumladan davlat notarial idorasida kamida ikki yil muddatli stajirovkani oʻtagan, malaka imtihonini topshirgan Oʻzbekiston Respublikasi fuqarosi ishtirok etishi mumkin.

Malaka imtihonini topshirgan, lekin notarius lavozimida uch yil mobaynida ishlamagan fuqaro malaka imtihonini qayta topshirganidan keyin tanlovda ishtirok etish huquqiga ega boʻladi.

Quyidagilar tanlovda ishtirok etishi mumkin emas:

belgilangan tartibda muomalaga layoqatsiz yoki muomala layoqati cheklangan deb topilgan shaxs;

qasddan sodir etgan jinoyati uchun sudlanganlik holati tugallanmagan yoki sudlanganligi olib tashlanmagan shaxs;

oʻz kasbiy faoliyatiga mos kelmaydigan qilmishlar sodir etganligi uchun notarius, advokat, tergovchi, prokuror, sudya yoki huquqni muhofaza qiluvchi organlarning boshqa xodimi sifatidagi vakolati belgilangan tartibda tugatilgan shaxs.

9. Tanlovda ishtirok etish istagini bildirgan shaxs (bundan buyon matnda talabgor deb yuritiladi) Adliya vazirligiga quyidagi hujjatlarni taqdim etadi:

komissiya nomiga ariza;

pasport nusxasi;

belgilangan shaklda toʻldirilgan shaxsiy varaqa;

mehnat daftarchasining notarial yoki ish joyida tasdiqlangan nusxasi;

talabgorning malaka imtihonini topshirganligi toʻgʻrisida malaka komissiyasining qaroridan koʻchirma, mazkur bandning sakkizinchi va toʻqqizinchi xatboshilarida koʻrsatilgan hollar bundan mustasno;

oxirgi ish joyidan berilgan mehnat faoliyati toʻgʻrisidagi tavsifnoma.

Mazkur Nizomning 8-bandi ikkinchi xatboshisida koʻrsatilgan talabgorlar malaka imtihonini qayta topshirganligi toʻgʻrisida malaka komissiyasining qaroridan koʻchirma taqdim etadi.

Oxirgi uch yil mobaynida notarius lavozimida ishlagan shaxslardan malaka imtihonini topshirganligi yoki qayta topshirganligi toʻgʻrisida malaka komissiyasining qaroridan koʻchirma talab qilinmaydi.

10. Tanlovda ishtirok etish uchun taqdim etilgan hujjatlar ishchi organi tomonidan qabul qilinadi va talabgorga qabul qilib olingan hujjatlar roʻyxati va sanasi koʻrsatilgan tilxat beriladi. Hujjatlar Adliya vazirligining devonxonasida roʻyxatdan oʻtkaziladi.

Ishchi organi talabgor tomonidan taqdim etilgan hujjatlarni qabul qilishni rad etishga haqli emas. Hujjatlar taqdim etishning oxirgi sanasidan soʻng taqdim etilgan hujjatlar qabul qilinmaydi.

11. Ishchi organi tomonidan har bir talabgorning hujjatlari alohida oʻrganib chiqiladi. Talabgorni tanlovda ishtirok etishini rad etishga asoslar mavjud boʻlsa, ishchi organi tomonidan bu haqda xulosa tuziladi. Mazkur xulosa komissiya raisi tomonidan tasdiqlanadi.

Barcha talabgorlarning hujjatlarini oʻrganish natijalariga koʻra, ishchi organi tomonidan tanlov oʻtkazish toʻgʻrisida yoki tanlov oʻtkazishga qayta eʼlon berish toʻgʻrisida xulosa tuziladi va u komissiya raisi tomonidan tasdiqlanadi. Tanlov oʻtkazish toʻgʻrisidagi xulosada tanlov oʻtkaziladigan sana koʻrsatib oʻtilishi lozim, agar tanlov oʻtkazish toʻgʻrisidagi eʼlonda tanlov oʻtkaziladigan sana koʻrsatilmagan boʻlsa.

12. Quyidagi hollarda ishchi organi tomonidan tanlov oʻtkazishga qayta eʼlon berish toʻgʻrisida xulosa tuziladi:

a) tanlovda ishtirok etish uchun birorta ham talabgor boʻlmasa;

b) tanlovda ishtirok etish uchun faqatgina bitta talabgor tomonidan hujjatlar taqdim etilgan boʻlsa, mazkur Nizomning 13-bandida nazarda tutilgan holatlar bundan mutasno;

v) tanlovda ishtirok etish uchun taqdim etilgan hujjatlarni koʻrib chiqish natijalariga koʻra barcha talabgorlarga tanlovda ishtirok etish rad etilgan boʻlsa;

g) tanlovda ishtirok etish uchun taqdim etilgan hujjatlarni koʻrib chiqish natijalariga koʻra faqatgina bitta talabgor tanlovda ishtirok etishga qoʻyilgan boʻlsa, mazkur Nizomning 13-bandida nazarda tutilgan holatlar bundan mutasno;

d) mazkur Nizomda belgilangan boshqa hollarda.

Tanlov oʻtkazishga qayta eʼlon tegishli xulosa komissiya raisi tomonidan tasdiqlangan kundan boshlab yetti kun muddat ichida berilishi lozim. Mazkur Nizomning 20-bandi ikkinchi xatboshisi va 29-bandi uchinchi xatboshisida nazarda tutilgan hollarda, tanlov oʻtkazishga qayta eʼlon berish koʻrsatilgan muddat ichida komissiya qaroriga asosan amalga oshiriladi.

13. Agar qayta eʼlon berilgandan keyin ham tanlovda ishtirok etish uchun faqat bitta talabgor hujjat taqdim etgan boʻlsa, u muqobil nomzodsiz tanlovda ishtirok etishga qoʻyiladi.

14. Mazkur Nizomning 8-bandida belgilangan talablarga javob bermagan va tanlovda ishtirok etish uchun ushbu Nizomning 9-bandida nazarda tutilgan tegishli hujjatlarni toʻliq hajmda taqdim qilmagan talabgorga tanlovda ishtirok etish rad etiladi.

Ushbu Nizomning 35 va 37-bandlarida nazarda tutilgan asoslar mavjud boʻlgan taqdirda ham talabgorga tanlovda ishtirok etish rad etiladi.

15. Tanlovda ishtirok etishi rad etilgan har bir talabgorga komissiya raisi tomonidan tegishli xulosa tasdiqlangandan keyin ikki kunlik muddatda ishchi organi tomonidan mazkur Nizomning 1a-ilovasiga muvofiq shaklda yozma xabarnoma yuboriladi.

Tanlov oʻtkazishga qayta eʼlon berish toʻgʻrisida xulosa tasdiqlangan taqdirda, keyingi kundan kechiktirmay bu haqda talabgorlarga mazkur Nizomning 1b-ilovasiga muvofiq shaklda yozma xabarnoma yuboriladi.

16. Tanlov tanlov oʻtkazish toʻgʻrisidagi xulosa tasdiqlangan kundan boshlab besh kundan soʻng, lekin oʻn besh kundan kechiktirmay oʻtkaziladi.

Tanlov kuni haqida talabgorlarga tanlov oʻtkaziladigan kundan kamida bir hafta oldin xabarnoma yuboriladi.

17. Tanlovda ishtirok etishga qoʻyilgan talabgorlar roʻyxati tanlov oʻtkazilishidan besh kun oldin Adliya vazirligining fuqarolarni qabul qilish xonasida osib qoʻyiladi.

III. Tanlov oʻtkazish tartibi

18. Tanlov komissiya tomonidan talabgorlarning kasbiy bilimlarini aniqlash maqsadida yozma-ogʻzaki ravishda oʻtkaziladi.

19. Tanlov komissiya aʼzolarining kamida uchdan ikki qismi qatnashganda haqiqiy hisoblanadi.

20. Agar tanlov kuni talabgorlarning barchasi kelmasa yoki talabgor (talabgorlar) kelmaganligi oqibatida bitta talabgor qolgan taqdirda, komissiya tanlov kunini kamida bir haftagacha boʻlgan muddatga kechiktirish toʻgʻrisida qaror qabul qiladi. Bu haqda tanlovda ishtirok etishga qoʻyilgan barcha talabgorlarga tanlov oʻtkazish joyi, sanasi va vaqti koʻrsatilgan yozma xabarnoma yuboriladi.

Agar keyingi tanlov kuni ham talabgorlarning barchasi kelmasa yoki talabgor (talabgorlar) kelmaganligi oqibatida bitta talabgor qolgan taqdirda, komissiya tanlov oʻtkazishga qayta eʼlon berish toʻgʻrisida qaror qabul qiladi.

21. Tanlov barcha talabgorlar uchun bir yoʻla bir xonada oʻtkaziladi.

Tanlov jarayonida komissiya aʼzolari va talabgorlardan tashqari begona shaxslarning hozir boʻlishlariga ruxsat berilmaydi.

22. Komissiyaning masʼul kotibi mazkur Nizomning 9-bandida koʻrsatilgan hujjatlar asosida talabgorlar boʻyicha maʼlumot tayyorlaydi va komissiyaning har bir aʼzosiga taqdim etadi.

Komissiya majlisida masʼul kotib unda ishtirok etayotgan komissiya aʼzolarini hamda tanlovda ishtirok etishga qoʻyilgan talabgorlar roʻyxatini, shu jumladan tanlov kuni hozir boʻlgan va tanlov kuni kelmagan talabgorlarning roʻyxatini oʻqib eshittiradi. Shuningdek, masʼul kotib tanlov oʻtkazish tartibini, shu jumladan mazkur Nizomning 26-bandida nazarda tutilgan talablarni batafsil tushuntiradi.

23. Tanlov oʻtkazish tartibi tushuntirilgandan soʻng har bir talabgorga mazkur Nizomning 2-ilovasiga muvofiq shaklda tanlov varaqasi, komissiya aʼzolariga esa mazkur Nizomning 3-ilovasiga muvofiq shaklda baholash byulletenlari tarqatiladi.

Baholash byulletenlari komissiya aʼzolariga mazkur Nizomning 4-ilovasiga muvofiq shakldagi roʻyxat asosida tarqatiladi.

har bir tanlov varaqasi tanlovda ishtirok etayotgan barcha komissiya aʼzolari tomonidan imzolangan boʻlishi shart. Tanlov varaqasining birinchi varagʻi Adliya vazirligining gerbli muhri bilan tasdiqlanadi.

Har bir baholash byulleteni komissiya raisi tomonidan imzolangan va Adliya vazirligining gerbli muhri bilan tasdiqlangan boʻlishi lozim.

24. Tanlov biletidagi savollarga yozma javob yozish va ular boʻyicha ogʻzaki javobga tayyorlanish uchun ikki soat vaqt ajratiladi.

25. Tanlov beshta savoldan iborat boʻlgan bilet asosida oʻtkazilib, bunda har bir biletning orqa tomonida komissiya raisi va masʼul kotibining imzolari boʻlishi lozim. Tanlov biletidagi savollarga yozma javoblar faqatgina tanlov varaqasiga yoziladi. Talabgorga javob yozish uchun tanlov varaqasi yetarli boʻlmagan taqdirda, unga qoʻshimcha tanlov varaqasi beriladi.

26. Tanlov biletidagi savollarga tayyorlanish jarayonida talabgorlarga quyidagilar taqiqlanadi:

1) qonunchilik hujjatlaridan, maʼlumot beruvchi va maxsus adabiyotlardan har qanday turdagi texnika vositalaridan yoki boshqa materiallardan (maʼlumotlardan) foydalanish;

2) boshqa talabgorlar bilan suhbatlashish;

3) oʻz tanlov varaqasini topshirgunga qadar tanlov oʻtkazilayotgan xonadan tashqariga chiqish.

27. Tanlov biletidagi savollarga javob tayyorlab boʻlgan talabgor komissiyaga javob beradi. Komissiya aʼzolari ayrim javoblarni aniqlashtirish maqsadida savollar berishi mumkin.

Komissiya aʼzolari baholash byulletenida talabgorning savollarga bergan javobini oʻn ballik tizimda baholaydi.

Savollarga javob berib boʻlgan talabgorga oʻz tanlov varaqasini topshirgandan soʻng xonadan chiqishga ruxsat beriladi.

28. Baholash byulletenida ballarni hisoblab chiqish uchun komissiya aʼzolari orasidan 3 kishidan iborat hisoblash guruhi tuziladi.

Baholash byulletenidagi ballar hisoblab chiqiladi, hisoblash natijasi yuzasidan hisoblash guruhi tomonidan imzolangan dalolatnoma tuziladi va komissiya aʼzolariga eʼlon qilinadi.

29. Tanlov natijasiga koʻra eng koʻp ball olgan talabgor tanlovda gʻolib deb topiladi.

Gʻolib deb topilgan talabgorning ballari tanlovda olinishi mumkin boʻlgan eng yuqori ballning 50 foizidan kam boʻlmasligi lozim.

Eng koʻp ball toʻplagan talabgorning yoki mazkur Nizomning 13-bandida belgilangan asoslarga koʻra tanlovda ishtirok etgan talabgorning ballari tanlovda olinishi mumkin boʻlgan eng yuqori ballning 50 foizidan kam boʻlsa, komissiya tanlov oʻtkazishga qayta eʼlon berish toʻgʻrisida qaror qabul qiladi.

30. Ballar teng boʻlib qolganda, tanlov gʻolibi eng koʻp bir xil ball olgan talabgorlar orasidan ovoz berish yoʻli bilan aniqlanadi.

Eng koʻp ovoz olgan talabgor tanlovda gʻolib deb topiladi. Ovozlar takroran teng boʻlib qolsa, komissiya raisining ovozi hal qiluvchi boʻlib hisoblanadi.

31. Tanlov oʻtkazish boʻyicha komissiya majlisida bayonnoma yuritiladi va u komissiya raisi, masʼul kotibi va tanlovda qatnashgan boshqa komissiya aʼzolari tomonidan imzolanadi.

Bayonnomada quyidagilar koʻrsatilishi shart:

tanlov oʻtkazish joyi va sanasi, tanlovning boshlanish va yakunlanish vaqti;

tanlovda qatnashgan komissiya aʼzolarining roʻyxati;

tanlovda hozir boʻlgan talabgorlar va tanlovga kelmagan talabgorlar roʻyxati;

har bir talabgor tomonidan olingan bilet raqami va undagi savollar mazmuni;

talabgor tomonidan biletdagi savollarga javob bergan yoki javob bera olmaganligi toʻgʻrisidagi maʼlumotlar;

ayrim javoblarni aniqlashtirish maqsadida komissiya aʼzolari tomonidan berilgan savollar va talabgorning unga bergan javoblari mazmuni;

baholash byulletenlaridagi ballarni hisoblash natijalari, shu jumladan har bir talabgor tomonidan toʻplangan ballar;

tanlov gʻolibi mazkur Nizom talablariga koʻra ovoz berish yoʻli bilan aniqlangan boʻlsa — ovoz berish natijalari;

tanlov oʻtkazish jarayoniga taalluqli boʻlgan boshqa maʼlumotlar;

tanlov yakunlari boʻyicha komissiya qarori, shu jumladan tanlovda gʻolib deb topilgan talabgor;

komissiya qarori ustidan shikoyat qilish tartibi.

Talabgorlar tomonidan toʻplangan ballar, ovoz berish natijalari hamda komissiya qarori shu kunning oʻzida tanlovda ishtirok etgan talabgorlarga oʻqib eshittiriladi.

Tanlov varaqalari, baholash byulletenlari va mazkur Nizomning 23-bandiga muvofiq tuzilgan komissiya aʼzolari roʻyxati majlis bayonnomasiga ilova qilinadi.

32. Komissiyaning bayonnomasi bir nusxada tuziladi. Tanlovdan soʻng uch kun ichida bayonnomadan koʻchirma tanlov gʻolibi bilan mehnat shartnomasini tuzish va uni notarius lavozimiga tayinlash toʻgʻrisidagi buyruq qabul qilish uchun adliya boshqarmasiga yuboriladi. Bayonnoma tanlov boʻyicha yigʻmajildga tikib qoʻyiladi.

Komissiya bayonnomasidan koʻchirma unda ishtirok etgan barcha talabgorlarga beriladi.

III1. Talabgordan notarius qasamyodini qabul qilish

321. Tanlovda gʻolib deb topilgan talabgor komissiya majlisida Oʻzbekiston Respublikasining “Notariat toʻgʻrisida”gi Qonunining 3-moddasiga asosan quyidagi mazmunda qasamyod qabul qiladi:

“Notarius vazifasini halol va vijdonan bajarishga, Oʻzbekiston Respublikasining Konstitutsiyasi va qonunlariga qatʼiy rioya etishga tantanali qasamyod qilaman”.

322. Talabgor notarius qasamyodi matnini ovoz chiqarib oʻqiydi va talabgor toʻgʻrisidagi maʼlumotlar, qasamyod qabul qilingan sana va joy bayon etilgan tegishli hujjatni imzolaydi.

Mazkur hujjat ham komissiya majlisining bayonnomasiga ilova qilinadi.

323. Tanlovda gʻolib deb topilgan talabgorning notarius qasamyodini qabul qilishdan bosh tortishi uning notarius lavozimiga tayinlanishdan voz kechishi deb hisoblanadi.

IV. Notarius lavozimiga tayinlash

33. Komissiyaning tanlov yakunlari boʻyicha qabul qilgan qarori adliya boshqarmasi tomonidan tanlovda gʻolib deb topilgan talabgor bilan mehnat shartnomasini tuzish va uni adliya boshqarmasi tomonidan notarius lavozimiga tayinlash uchun asos boʻladi.

Agar tanlov notariusning homiladorlik va tugʻish taʼtillariga, shuningdek, bolalarni parvarishlash taʼtillariga chiqishi munosabati bilan oʻtkazilgan boʻlsa, tanlov gʻolibi bilan muddatli mehnat shartnomasi tuziladi va adliya boshqarmasi tomonidan tegishli buyruq chiqariladi.

34. Tanlov gʻolibi bilan mehnat shartnomasini tuzish va uni notarius lavozimiga tayinlash haqidagi adliya boshqarmasining buyrugʻi komissiya bayonnomasidan koʻchirma olingan kundan boshlab uch kundan kechiktirmay chiqariladi.

Tanlov gʻolibini notariuslik lavozimiga tayinlash haqidagi adliya boshqarmasining buyrugʻi nusxasi uch kun ichida Oʻzbekiston Respublikasi Adliya vazirligiga yuboriladi.

V. Tanlovda ishtirok etishdan yoki notarius lavozimiga tayinlanishdan voz kechish

35. Talabgor tanlovning har qanday bosqichida, shuningdek notarius lavozimiga tayinlash toʻgʻrisidagi adliya boshqarmasining buyrugʻi qabul qilingunga qadar tanlovda ishtirok etishdan yoki notarius lavozimiga tayinlanishdan voz kechishga haqli.

Buning uchun talabgor tegishli adliya boshqarmasiga ariza bilan murojaat etishi lozim. Ariza kelib tushgan tegishli adliya boshqarmasi bu haqda shu kunning oʻzida Adliya vazirligini xabardor qiladi. Bunday talabgor bir yil davomida keyingi tanlovlarga qoʻyilmaydi.

36. Agar tanlovda gʻolib deb topilgan talabgor notarius lavozimiga tayinlash toʻgʻrisidagi adliya boshqarmasining buyrugʻi qabul qilingunga qadar notarius lavozimiga tayinlanishdan voz kechsa, tanlovda mazkur talabgordan soʻng eng yuqori ball olgan talabgor komissiya qarori asosida notarius lavozimiga tayinlanadi.

37. Mazkur Nizomning 20-bandiga muvofiq tanlov kuni kelmaganligi sababli tanlovda ishtirok etmagan talabgorlar bir yil davomida keyingi tanlovlarga qoʻyilmaydi, kelmaganlik sababini uzrli deb topilgan hollar bundan mustasno.

VI. Tanlov boʻyicha hujjatlarni yuritish

38. Oʻtkazilgan har bir tanlov boʻyicha materiallar ishchi organining alohida yigʻma jildida yuritiladi.

Tanlovni oʻtkazish bilan bogʻliq boʻlgan barcha hujjatlar, har bir tanlov boʻyicha yigʻma jildlarga tikilgan holda Adliya vazirligida (doimiy saqlanishi nazarda tutilgan komissiya qarori va bayonnomasidan tashqari) oʻn yil mobaynida saqlanadi.

VII. Yakuniy qoidalar

39. Komissiya qarorlari ustidan sudga shikoyat qilinishi mumkin.

40. Mazkur Nizom talablarining buzilishida aybdor shaxslar qonun hujjatlarida belgilangan tartibda javobgarlikka tortiladi.

Muayyan hududda (notarial okrugda) notarial harakatlarni amalga oshirish vakolatlarini berish boʻyicha tanlov oʻtkazish tartibi toʻgʻrisidagi nizomga 1a-ILOVA

(1a-ilova matni Oʻzbekiston Respublikasi adliya vazirining 2010-yil 15-noyabrdagi 264-mh-sonli buyrugʻi (roʻyxat raqami 1521-3 15.11.2010-y.) tahririda — OʻR QHT, 2010-y., 46-son, 424-modda)

Muayyan hududda (notarial okrugda) notarial harakatlarni amalga oshirish vakolatlarini berish boʻyicha tanlov oʻtkazish tartibi toʻgʻrisidagi nizomga 1b-ILOVA

* Tanlovda ishtirok etish kuni kelmagan yoki tanlovda ishtirok etishdan voz kechgan talabgorlarga yuborilgan xabarnomada mazkur xatboshi yozilmaydi.

Muayyan hududda (notarial okrugda) notarial harakatlarni amalga oshirish vakolatlarini berish boʻyicha tanlov oʻtkazish tartibi toʻgʻrisidagi nizomga 2-ILOVA

(2-ilova Oʻzbekiston Respublikasi Adliya vazirligi Hayʼati majlisining 2010-yil 8-iyundagi 12/10-sonli bayoni (roʻyxat raqami 1521-1, 08.06.2010-y.) tahririda — OʻR QHT, 2010-y., 23-son, 189-modda)

Muayyan hududda (notarial okrugda) notarial harakatlarni amalga oshirish vakolatlarini berish boʻyicha tanlov oʻtkazish tartibi toʻgʻrisidagi nizomga 3-ILOVA

(3-ilova Oʻzbekiston Respublikasi adliya vazirining 2010-yil 18-sentabrdagi 195-mh-sonli buyrugʻi (roʻyxat raqami 1521-2, 18.09.2010-y.) tahririda — OʻR QHT, 2010-y., 38-son, 332-modda)

Muayyan hududda (notarial okrugda) notarial harakatlarni amalga oshirish vakolatlarini berish boʻyicha tanlov oʻtkazish tartibi toʻgʻrisidagi nizomga 4-ILOVA

(4-ilova Oʻzbekiston Respublikasi Adliya vazirligi Hayʼati majlisining 2010-yil 8-iyundagi 12/10-sonli bayoni (roʻyxat raqami 1521-1, 08.06.2010-y.) tahririda — OʻR QHT, 2010-y., 23-son, 189-modda)