Chorva mollari, binolar va asbob-anjomlarni tanlov-kimoshdi savdosi asosida sotish (136-son)

20.04.1995

tartibi

[Oʻzbekiston Respublikasi Adliya vazirligi tomonidan 1995-yil 20-aprelda 136-son bilan davlat roʻyxatidan oʻtkazilgan]

1.UMUMIY QOIDALAR

1.1. Ushbu Tartib Oʻzbekiston Respublikasi Prezidentining “Xususiy tadbirkorlikda tashabbus koʻrsatish va uni ragʻbatlantirish toʻgʻrisida”gi Farmoni, Vazirlar Mahkamasining 1995-yil 24-martdagi “Chorvachilikda xususiylashtirishni davom ettirish va xususiy tadbirkorlikni qoʻllab-quvvatlash chora-tadbirlari toʻgʻrisida” 96-sonli qarori asosida ishlab chiqilgan.

1.2. Tartib tanlov-kimoshdi savdosiga tayyorgarlik, uni oʻtkazish, savdoda qatnashish, gʻolib chiqqan xaridorga mulkka egalik qilish huquqini rasmiylashtirish, xaridorlar bilan hisob-kitob qilish shartlarini belgilaydi.

1.3. Tanlov — kimoshdi savdosi ushbu tartib bilan chorva mollari, binolar va asbob-anjomlarni ochiq savdolarda erkin baholar asosida sotilishi tushuniladi.

1.4. Chorva mollari, binolar va asbob-anjomlarni tanlov-kim oshdi savdosida sotish, jamoa xoʻjaligi umumiy yigʻilishining qarori tasdiqlangandan soʻng amalga oshirilishi mumkin.

1.5. Chorvachilik mahsulotlari yetishtirishga ixtisoslashtirilmagan har bir xoʻjalikda bu ishlarni amalga oshirish uchun tuman Hokimligi, xoʻjalik, “Agroxizmat” uyushmasi, davlat veterinariya xizmati Davlat mulki qoʻmitasining hududiy boshqarmasi va jamoatchilik vakillaridan iborat komissiya tuziladi.

1.6. Komissiya qoramolchilik fermerlarining mol-mulklarini, jumladan qoramollar, molxonalar, binolar, omborxonalar, xoʻjaliklarning balansida turgan suv inshootlari, chorvachilik mahsulotlarini qayta ishlash sexlari, qishloq xoʻjalik mashinalari, ot-ulov jihozlari, inventarlar, yem-xashaklar, konsentrat ozuqalar va hokazolarni toʻliq inventarizatsiyadan oʻtkazadi (davlat vetobyektlaridan tashqari).

1.7. Kimoshdi savdosiga qoʻyiladigan ferma mol-mulkining dastlabki (start) bahosi quyidagicha aniqlanadi:

1). Asosiy vositalar va tez eskiradigan buyumlar — 1995-yil 1-yanvarga qayta baholangan balans qiymatidan eskirish summasi chegirib tashlanadi;

2). Qoramollar — nasli, yoshi va mahsuldorligiga qarab ferma joylashgan hududdagi bozor baholaridan 10 foizdan 20 foizgacha kam miqdorda baholanadi, bu baholar amaldagi shartnomaviy narxlardan kam boʻlmasligi kerak;

3). Omixta yem, konsentrat ozuqa, silos, senaj, lavlagi, xashaklar (somon, beda, tibbiy pichan) — balans bahosida beriladi.

Izoh: Asosiy vositalar, chorva mollar, yem-xashak va boshqa moddiy qiymatliklarni sanoqdan oʻtkazish dalolatnomasining nusxasi 1-2 ilovalarda berilgan.

1.8. Yuqoridagi tartibda aniqlangan va mulk egaligiga beriladigan fermaning moddiy boyliklari rasmiylashtirilgan hujjatlar xoʻjaliklarning umumiy yigʻilish qarori bilan tasdiqlangandan keyin tanlov — kimoshdi savdosi orqali sotish uchun xoʻjalikda tuzilgan komissiyaga topshiriladi.

2. TANLOV — KIMOShDI SAVDOSINI TAYYORLASh VA OʻTKAZISh ShARTLARI

2.1. Xususiylashtirilayotgan chorvachilik fermalarining moddiy boyliklari yuridik va jismoniy shaxslarga tanlov— kimoshdi savdosi asosida sotiladi.

Tanlov — kimoshdi savdosiga yuqumli kasalliklardan xoli boʻlgan chorvachilik fermalari qoʻyiladi.

2.2. Tanlov — kimoshdi savdosini tuman Hokimligi, xoʻjalik, “Agrokimyo” uyushmasi, davlat veterinariya xizmati, Davlat mulki qoʻmitasining hududiy boshqarmasi va jamoatchilik vakillaridan tuzilgan maxsus komissiya oʻtkazadi.

2.3. Komissiya qaysi ferma tanlov — kimoshdi savdosi orqali sotilishi, qachon, qayerda savdoning oʻtkazilishi haqida toʻliq axborotlarni belgilangan tartibda ommaviy axborot vositalari orqali bir oy muddatda kam boʻlmagan vaqtda eʼlon qiladi.

2.4. Axborotnomada quyidagi maʼlumotlar koʻrsatilishi shart:

savdoga qoʻyilgan qoramollarni soni, zoti, jinsi, yoshi va naslining qisqacha xarakteristikasi;

chorvachilik fermasining joyi, egallangan maydoni, ozuqa yetishtirishga ajratilgan yer maydoni, ferma hududidagi molxonalar, binolar, omborxonalar, xoʻjalik balansida boʻlgan suv inshootlari, mahsulotni qayta ishlash sexlari, qishloq xoʻjalik mashinalari, inventarlar va boshqa maʼlumotlar;

moddiy boyliklarni boshlangʻich baholari;

savdoni oʻtkazish shakli;

toʻlov shartlari;

savdoga qoʻyilgan ferma bilan tanishtirish tartibi;

savdoga qatnashish uchun taqdim qilinadigan ariza va boshqa hujjatlarni qabul qilishning oxirgi muddati;

qatnashuvga toʻlov miqdori va oʻtkazish lozim boʻlgan hisob raqamining nomeri;

savdoning oʻtkazilish joyi, kuni, vaqti;

savdoni oʻtkazuvchi komissiyaning manzilgohi va telefon nomeri.

3. TANLOV-KIM OShDI SAVDOSIDA QATNAShISh ShARTLARI

3.1. Tanlov — kimoshdi savdosiga qatnashish huquqi birinchi navbatda shu xoʻjalikning aʼzosiga beriladi. Xaridorlar shu fermaning mahsulot ishlab chiqarishga ixtisoslashtirilgan yoʻnalishini besh yil mobaynida oʻzgartirmasligi, mahsulot ishlab chiqarish hajmlarini kamaytirmasligi haqida yozma ravishda kafolat beradi, Ushbu tartibga rioya qilgan holda talab qilingan hujjatlarni taqdim etishi shart.

3.2. Tanlov kimoshdi savdosida qatnashish uchun komissiyaga quyidagi hujjatlar taqdim etiladi:

xaridorning savdoda qatnashishi uchun arizasi;

savdoga qoʻyilgan ferma moddiy boyliklari dastlabki qiymatining 10 foiz badal pulini toʻlaganligini tasdiqlovchi hujjat.

3.3. Xaridor deb tan olingan shaxslarga quyidagi hujjatlar beriladi:

tartib raqamli yozilgan taxtacha;

savdoga qoʻyilgan ferma moddiy boyliklari toʻgʻrisida qisqacha maʼlumotnoma;

tanlov — kimoshdi savdosining shartlari.

3.4. Tanlov — kimoshdi savdosida qatnashishga arizalar qabul qilish savdo oʻtadigan sanadan uch kun avval toʻxtatiladi.

3.5. Xaridor deb tan olingan shaxs toʻgʻrisidagi maʼlumot sir saqlanadi.

3.6. Tanlov-kim oshdi savdosi tartib-qoidalari talablariga rioya qilmagan, qonunchilik asosida xaridor deb tan olinmagan, qatnashishga oʻz vaqtida ariza bermagan shaxslar savdoda qatnashmaydilar.

4. TANLOV — KIMOShDI SAVDOSINI OʻTKAZISh TARTIBI

4.1. Tanlov — kimoshdi savdosini komissiya tomonidan berilgan yoki yollangan shaxs — “auksionist” oʻtkazadi.

U xaridorlarga savdoga qoʻyilgan ferma moddiy boyliklarini qisqacha taʼriflab, ularning dastlabki bahosini va bahoni oshirish miqdorini eʼlon qiladi. Bahoni oshirish miqdori dastlabki bahoning 1—10 foizini tashkil qilishi kerak. Savdoning borishiga qarab auksionist bahoni oshirish miqdorini belgilaydi.

4.2. Kimoshdi savdosini auksionist tomonidan ferma moddiy boyliklarini dastlabki bahosiga birlamchi bahoni oshirish miqdorini qoʻshgan xolda eʼlon qilishi bilan boshlanadi. Ushbu bahorga rozi boʻlib raqamli taxtachani koʻtargan xaridorni auksionist eʼlon qiladi va ushbu bahoni uch martabagacha qaytaradi. Agar ushbu bahodan oshuvchi xaridor boʻlsa auksionist bahoni oshirish miqdorini qoʻshib eʼlon qiladi.

4.3. Kimoshdi savdosini navbatdagi bahoga rozilik bildirib raqamli taxtachani koʻtarmaguncha davom ettiriladi.

Oxirgi bahoga rozi boʻlgan xaridorning raqamli taxtachasi va koʻtarilgan baho uch martaba qayta eʼlon qilingandan soʻng xaridor gʻolib deb topiladi.

4.4. Kim oshdi savdosi gʻolibi shu kunning oʻzida savdo oʻtkazilgan bayonnomaga imzo chekishi shart — Bayonnoma gʻolib-xaridor, kim oshdi savdosi oʻtkazuvchi komissiya tomonidan ikki nusxada tuzib imzolanadi.

Shu bayonnoma rasmiylashtirilganidan soʻng fermani sotgan xoʻjalik va gʻolib-xaridorning manzili, sotilgan mulkning bahosi va unga egalik qilish huquqi berilishi toʻgʻrisida shartnoma tuziladi.

4.5. Agar gʻolib-xaridor 10 kunlik muddatda mulkning qabul qilinganligi shartnomaga imzo chekmasa, mulk xoʻjalikka qaytariladi yoki qayta kim oshdi savdosiga qoʻyiladi.

Xaridor tomonidan toʻlangan badal puli qaytarib berilmaydi.

4.6. Kim oshdi savdosi yakuni 30 kun mobaynida matbuotda va maxsus axborotnomada komissiya tomonidan eʼlon qilinadi.

5. KIMOShDI SAVDOSIDA GʻOLIB ChIQQAN XARIDORGA MULKKA EGALIK QILISh HUQUQINI RASMIYLAShTIRISh VA QOLGAN XARIDORLAR BILAN HISOB-KITOB QILISh.

5.1. Kimoshdi savdosi yakunlangandan soʻng 10 kun mobaynida xoʻjalik bilan gʻolib-xaridor orasida qonunchilikda belgilangan tartibda mulkka egalik qilish huquqini beradigan oʻzaro shartnoma tuziladi.

5.2. Kimoshdi savdosida qatnashgan boshqa xaridorlarning savdodan oldin toʻlagan badal pullari 30 kun mobaynida qaytarib beriladi.

5.3. Ferma moddiy boyliklariga (obyektga) egalik qilish huquqi xoʻjalikdan yangi mulkdorga bu haqdagi hujjat (order) berilgan vaqtdan boshlanadi.

5.4. Yangi mulkdorning ferma moddiy boyliklariga (obyektga) egalik qilish huquqi xoʻjalikdan unga bu haqdagi hujjat (order) berilgan vaqtdan boshlanadi.

6. TANLOV — KIMOShDI SAVDOSI ASOSIDA SOTILGAN ChORVA MOLLARI VA BOShQA MULKLAR QIYMATINI TOʻLASh TARTIBI

Tanlov — kimoshdi savdolarida ferma chorva mollari va boshqa mulklar bahosi (obyekt bahosi) Oʻzbekiston Respublikasi milliy valyutasi — soʻmda belgilanib, jismoniy yoki yuridik shaxslar tomonidan sotib olinadigan obyektlar uchun toʻlovlar quyidagi tartibda amalga oshiriladi:

6.1. Obyektning pirovard qiymati tanlov — kimoshdi savdosi oʻtkazilgan kundagi belgilangan eng kam ish haqining 1000 barobarigacha boʻlgan taqdirda tanlov-kim oshdi savdosining gʻolibi badal puli toʻlangandan keyin qolgan summani xoʻjalikning tegishli hisob raqamiga oldi-sotdi shartnomasi imzolangan kundan boshlab bir oy mobaynida toʻlaydi.

6.2. Obyektning pirovard qiymati tanlov-kim oshdi savdosi oʻtkazilgan kundagi belgilangan eng kam ish haqining 1000 barobaridan 10000 barobarigacha boʻlgan taqdirda tanlov-kim oshdi savdosining gʻolibi badal puli toʻlangandan keyin qolgan summani:

pirovard qiymatning 20 foizini shartnoma imzolangan kundan boshlab bir oy mobaynida;

pirovard qiymatining 30 foizini shartnoma imzolangan kundan boshlab bir yil mobaynida;

obyekt qiymatining badal puli hamda birinchi yilda toʻlangandan keyin qolgan summasini ikkinchi yil mobaynida toʻliq toʻlaydi.

6.3. Obyektning pirovard qiymati tanlov — kimoshdi savdosi oʻtkazilgan kundagi eng kam ish haqining 10000 barobaridan ortiq boʻlgan taqdirda tanlov-kim oshdi savdosining gʻolibi badal puli toʻlangandan keyin qolgan summani:

pirovard qiymatining 20 foizini shartnoma imzolangan kundan boshlab bir oy mobaynida;

pirovard qiymatning 30 foizini shartnoma imzolangan kundan boshlab bir yil mobaynida;

pirovard qiymatning 30 foizini shartnoma imzolangan kundan boshlab ikkinchi yil mobaynida;

obyekt qiymatining badal puli va dastlabki ikki yili toʻlangandan keyin qolgan summasini shartnoma imzolangan kundan boshlab uchinchi yil mobaynida toʻliq toʻlaydi.

6.4. Tanlov — kimoshdi savdosida sotib olingan obyektning yangi egasi tegishli summani muddatidan oldin toʻliq toʻlash huquqiga egadir. Bunda toʻlov muddatlariga koʻra obyektning pirovard narxidan 10 foizgachasi chegiriladi.

6.5. Sotib olish summasi oʻz vaqtida toʻlanmagan taqdirda tanlov-kim oshdi savdosi gʻolibi badaldan tashqari toʻlangan summaning yarmini toʻlagan holda obyektga egalik qilish huquqidan mahrum etiladi.

6.6 Toʻlashga qodir emasligi tufayli tanlov-kim oshdi savdosi gʻolibi tomonidan sotib olinmagan obyekt tanlov-kim oshdi savdosiga takroran qoʻyiladi yoki komissiyaning qaroriga binoan oldingi mulkdorga qaytariladi.

6.7. Tanlov — kimoshdi oshdi savdosi gʻolibi shu xoʻjalikning aʼzosi boʻlsa xoʻjalikning umumiy majlis qarori bilan toʻlov muddati yuqorida belgilangan muddatlarga nisbatan ikki barobarigacha uzaytirilishi mumkin.

6.8. Tanlov — kimoshdi oshdi savdolarida sotiladigan mulkchilikning davlatga tegishli boʻlmagan shaklidagi obyektlarni sotib olish shartlari va muddatlarini mulkdor tomonidan obyektni sotish talabnomasi berilganda belgilanadi.

Chorva mollari, binolar va asbob-anjomlarni tanlov-kim oshdi savdosi asosida sotish Tartibiga 1-ILOVA

Chorva mollari, binolar va asbob-anjomlarni tanlov-kim oshdi savdosi asosida sotish Tartibiga 2-ILOVA