Bahouddin naqshband yodgorlik majmuasi markazini tashkil etish toʻgʻrisida (244-son)

27.05.2004

Oʻzbekiston Respublikasi Vazirlar Mahkamasining

qarori

Islom olamining benazir namoyandasi Bahouddin Naqshbandning jahon tafakkur xazinasiga va muqaddas dinimiz rivojiga qoʻshgan ulkan hissasini inobatga olib, uning merosini chuqur oʻrganish va keng targʻib qilish, ezgulik, maʼnaviy komillikka chorlovchi gʻoyalarini vatandoshlarimiz, ayniqsa yosh avlod qalbi va ongiga singdirish hamda buyuk allomalar yodgorlik majmualarini asrab-avaylash va yanada obodonlashtirish borasidagi ishlarni takomillashtirish maqsadida Vazirlar Mahkamasi qaror qiladi:

1. Oʻzbekiston musulmonlari idorasining Buxoro viloyatida mustaqil yuridik shaxs maqomiga ega boʻlgan Bahouddin Naqshband yodgorlik majmuasi markazini (keyingi oʻrinlarda Markaz deb ataladi) tashkil etish toʻgʻrisidagi taklifi maʼqullansin. Qayd etilsinki, ushbu Markaz tarkibiga Abduxoliq Gʻijduvoniy yodgorlik majmuasi ham kiritiladi.

Markaz faoliyatini boshqarish va muvofiqlashtirish, belgilangan vazifalarning samarali ijrosini nazorat qilish maqsadida tashkil etilgan Boshqaruv kengashi tarkibi ilovaga* muvofiq maʼqullansin.

* Ilova berilmaydi.

2. Quyidagilar Markazning asosiy vazifalari etib belgilangani maʼlumot uchun qabul qilinsin:

noyob meʼmoriy inshoot hisoblangan Bahouddin Naqshband va Abduxoliq Gʻijduvoniy yodgorlik majmualarini talab darajasida saqlash, asrab-avaylash va yanada obodonlashtirish, ularning infratuzilmalarini rivojlantirish;

ushbu muqaddas qadamjolarning musulmon dunyosidagi nufuzini yanada oshirish, bu yerga mahalliy va xorijiy fuqarolarning keng koʻlamdagi ziyoratlarini uyushtirish, ziyoratchilar uchun barcha zarur shart-sharoitlarni yaratish;

Bahouddin Naqshband va uning ustoz-shogirdlarining ilmiy-nazariy merosi, ibratli hayotini har tomonlama oʻrganish, ularning asarlarida targʻib etilgan insonparvarlik, halollik, poklik, maʼnaviy barkamollik kabi azaliy qadriyatlarni xalqimizga yetkazish;

diniy-maʼrifiy ishlarni tashkil etishda, ayniqsa yoshlarni mehnatsevarlik, bunyodkorlik, Vatanga sadoqat ruhida tarbiyalashda ularning hayotbaxsh oʻgitlaridan samarali foydalanishga doir tadbirlarni ishlab chiqish va amalga oshirish.

3. Oʻzbekiston musulmonlari idorasiga bir oy muddatda Markaz Nizomini tasdiqlash, uni belgilangan tartibda roʻyxatdan oʻtkazish hamda boshqa tashkiliy masalalarni hal qilish tavsiya etilsin.

4. Markazning Oʻzbekiston Respublikasi Tashqi iqtisodiy faoliyat milliy bankining Buxoro viloyat boʻlimida ochiladigan hisob raqami Oʻzbekistondagi yuridik va jismoniy shaxslar, xalqaro tashkilotlar va xorijiy fuqarolarning xayriya mablagʻlari uchun ochiq ekani qayd etilsin.

Mazkur mablagʻlar Markaz faoliyatini tashkil etish va doimiy takomillashtirib borish, yodgorlik majmualarini talab darajasida saqlash, asrab-avaylash va yanada obodonlashtirish, ularning infratuzilmalarini rivojlantirish uchun yoʻnaltirilishi koʻzda tutilsin.

5. Buxoro viloyati hokimligi, Qishloq va suv xoʻjaligi vazirligi, Madaniyat ishlari vazirligi, “Oʻzkommunxizmat” agentligi Bahouddin Naqshband va Abduxoliq Gʻijduvoniy yodgorlik majmualarini asrab-avaylash, joriy taʼmirlash, obodonlashtirish va koʻkalamzorlashtirish ishlarini amalga oshirishda Markazga tegishli yordam koʻrsatsinlar.

6. Tashqi ishlar vazirligi, “Oʻzbekturizm” milliy kompaniyasi, “Oʻzbekiston havo yoʻllari” milliy aviakompaniyasi, Din ishlari boʻyicha qoʻmita hamda Buxoro viloyati hokimligi yurtdoshlarimiz va xorijlik mehmonlarning Bahouddin Naqshband yodgorlik majmuasiga ziyoratlarini tashkil etish boʻyicha nufuzli xalqaro tashkilotlar bilan aloqa oʻrnatish va hamkorlik qilishda Markazga har tomonlama koʻmaklashsinlar.

7. Oʻzbekiston matbuot va axborot agentligi, “Oʻzteleradio” kompaniyasi, Oʻzbekiston Milliy axborot agentligi, “Jahon” axborot agentligiga respublika va xorijiy ommaviy axborot vositalarida Bahouddin Naqshband va uning ustoz-shogirdlari maʼnaviy merosining ahamiyati va mohiyatini ochib berish, bu ulugʻ zotlarning hayotini oʻrganish, nomlarini ulugʻlash, ezgu oʻgitlarini targʻib qilish borasida yurtimizda amalga oshirilayotgan ishlarni yanada kengroq yoritib borish tavsiya etilsin.

8. Mazkur qarorning bajarilishini nazorat qilish Oʻzbekiston Respublikasi Prezidentining davlat maslahatchisi Z. Husnidinov va Bosh vazir oʻrinbosari A. Azizxoʻjayev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 27-may,

244-son