Oʻzbekiston Respublikasi Vazirlar Mahkamasining ish tartibi toʻgʻrisida (575-son)

27.11.1993

Oʻzbekiston Respublikasi Vazirlar Mahkamasining

qarori

Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasining ilova qilinayotgan Ish tartibi tasdiqlansin.

2. Oʻzbekiston SSR Ministrlar Sovetining 1990-yil 18-yanvardagi 38-son qarori bilan tasdiqlangan, Oʻzbekiston SSR Ministrlar Sovetining 1990-yil 3-maydagi 201-son qarori bilan oʻzgartirishlar va toʻldirishlar kiritilgan Oʻzbekiston SSR Ministrlar Sovetining Reglamenti (OʻzSSR QT, 1990-y., 1-son, 1-modda) oʻz kuchini yoʻqotgan deb hisoblansin.

Vazirlar Mahkamasining Raisi I. KARIMOV

Toshkent sh.,

1993-yil 27-noyabr,

575-son

Vazirlar Mahkamasining 1993-yil 27-noyabrdagi 575-son qarori bilan TASDIQLANGAN

Oʻzbekiston Respublikasi Vazirlar Mahkamasining*

* Keyingi oʻrinlarda Vazirlar Mahkamasi deb ataladi.

ISh TARTIBI

I. Umumiy qoidalar

1. “Oʻzbekiston Respublikasi Vazirlar Mahkamasi toʻgʻrisida” Oʻzbekiston Respublikasi Qonuniga muvofiq ushbu Ish tartibi Oʻzbekiston Respublikasi Hukumati faoliyatini tashkil etish tartibini belgilaydi.

2. Vazirlar Mahkamasi iqtisodiyot, ijtimoiy va maʼnaviy sohaning samarali faoliyat koʻrsatishiga rahbarlik qilishni, qonunlar, Oliy Majlisning boshqa qarorlari, Oʻzbekiston Respublikasi Prezidentining farmonlari, qarorlari va farmoyishlari ijrosini taʼminlaydi.

3. Vazirlar Mahkamasiga yuklatilgan vazifalarni amalga oshirish Vazirlar Mahkamasi Raisining, Bosh vazirning, uning oʻrinbosarlarining, vazirlarning, davlat qoʻmitalari raislarining, idoralar, korporatsiyalar, konsernlar, uyushmalar, Vazirlar Mahkamasining tarkibiga kiruvchi davlat va xoʻjalik boshqaruvining boshqa organlari rahbarlarining faoliyati, shuningdek, Vazirlar Mahkamasi apparatining, doimiy, vaqtinchalik komissiyalarining, Hukumatning boshqa ishchi organlarining tashkiliy-amaliy ishi bilan taʼminlanadi.

4. Vazirlar Mahkamasi faoliyatiga rahbarlikni Oʻzbekiston Respublikasi Prezidenti — Vazirlar Mahkamasining Raisi amalga oshiradi. Vazirlar Mahkamasi Raisining topshirigʻiga binoan Bosh vazir Vazirlar Mahkamasi ishini tashkil qiladi.

5. Vazirlar Mahkamasi apparati va uning tarkibiy boʻlinmalarining ish tartibi Vazirlar Mahkamasi tomonidan tasdiqlanadigan tegishli nizomlar bilan belgilanadi.

II. Vazirlar Mahkamasi ishini rejalashtirish

1. Vazirlar Mahkamasining ishi yil choragi yoki yarim yillik rejalarga muvofiq olib boriladi.

Muhim davlat, xoʻjalik va ijtimoiy-madaniy muammolarni hal etish uchun Vazirlar Mahkamasining kompleks yoki maqsadli tadbirlari ishlab chiqiladi, ular Bosh vazirning oʻrinbosarlari tomonidan Vazirlar Mahkamasiga koʻrib chiqish uchun kiritiladi.

2. Ish rejasi loyihasiga masalalarni kiritish toʻgʻrisidagi takliflarni Vazirlar Mahkamasi Rayosati aʼzolari vazirliklar, davlat qoʻmitalari va idoralar, korporatsiyalar, konsernlar, uyushmalari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining takliflarini hisobga olgan holda kiritadilar.

Umumlashtirilgan takliflar rejalashtiriladigan davr boshlangungacha 20 kundan kechikmay Rayosatga koʻrib chiqish uchun kiritiladi.

3. Rejalashtirilgan masalalarni koʻrib chiqish muddatlarini oʻzgartirishga yoki ularni chiqarib tashlashga Vazirlar Mahkamasining Raisi ruxsat beradi.

4. Vazirlar Mahkamasining Rayosati ish rejasining oʻtgan davr mobaynida qanday bajarilayotganligi toʻgʻrisidagi hisobotlarni muntazam ravishda eshitib boradi.

III. Vazirlar Mahkamasiga masalalarni kiritish tartibi

1. Vazirlar Mahkamasining koʻrib chiqishi uchun “Oʻzbekiston Respublikasi Vazirlar Mahkamasi toʻgʻrisida”gi Qonun bilan uning vakolatiga kiritilgan masalalar kiritiladi.

Masalalar vazirlar, davlat qoʻmitalarining raislari, idoralar, korporatsiyalar, konsernlar, uyushmalarning rahbarlari, Qoraqalpogʻiston Respublikasi Vazirlar Kengashining raisi, viloyatlar va Toshkent shahar hokimlari, ular boʻlmagan (xizmat safarida, mehnat taʼtilida boʻlgan) hollarda esa ularning birinchi oʻrinbosarlari tomonidan kiritiladi.

Tuman va shaharlarning hokimlari, respublikaning vazirliklar, idoralar, korporatsiyalar, konsernlar va uyushmalar, ittifoqlar tarkibiga kiradigan birlashmalari, korxonalari, muassasalari va tashkilotlarining rahbarlari masalalarni Vazirlar Mahkamasiga faqat oʻzlarining yuqori idoralari orqali, davlat sektoriga kirmagan korxonalar esa — oʻzlari joylashgan hudud hokimliklari yoki oʻzlarining respublika organlari orqali kiritadilar.

2. Vazirlar Mahkamasiga kiritiladigan har bir masala boʻyicha, odatda, davlat tilida aniq bayon qilingan, asoslangan qaror yoki farmoyish loyihasi, shuningdek, masalaning mohiyati bayon etilgan va mazkur hujjatni qabul qilish zarurligi asoslab berilgan qisqacha xat taqdim etiladi.

Qarorlar, farmoyishlarning loyihalari amaldagi qonun hujjatlariga mos boʻlishi, ularda koʻrib chiqilayotgan masala puxta tahlil qilingan va xolis baholangan ijrochilar oldiga aniq ifodalangan maqsad va vazifalar qoʻyilgan boʻlishi, ularda amalga oshirsa boʻladigan muddatlar belgilanishi kerak.

Qarorlar va farmoyishlarning loyihalarida, zaruriyat boʻlganda, ilgari qabul qilingan qarorlarga oʻzgartirishlar kiritish yoki ularni oʻz kuchini yoʻqotgan deb hisoblash toʻgʻrisidagi taklif nazarda tutiladi.

3. Aynan shu masalalar boʻyicha ilgari qabul qilingan qarorlar bajarilmagan hollarda (yangi vaziyatlar paydo boʻlgan hollar bundan mustasno) Vazirlar Mahkamasiga ana shu masalalar boʻyicha qarorlar va farmoyishlar loyihalari kiritilishiga yoʻl qoʻyilmaydi.

4. Oliy Majlisga kiritiladigan qonun loyihalari Vazirlar Mahkamasi majlisida koʻrib chiqilgunga qadar barcha manfaatdor tashkilotlar bilan kelishib olinishi shart.

Boshqa vazirliklar, davlat qoʻmitalari, idoralar, korporatsiyalar, konsernlar, uyushmalar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining manfaatlariga yoki vakolatiga daxldor boʻlgan qarorlar va farmoyishlarning loyihalari, shuningdek, ularga ilovalar Vazirlar Mahkamasiga kiritilgunga qadar davlat va xoʻjalik boshqaruvining mana shu organlari bilan kelishib olinadi.

Normativ tusdagi qarorlarning loyihalari Oʻzbekiston Respublikasi Adliya vazirligi bilan ham kelishib olinadi.

Oʻzbekistonni ijtimoiy-iqtisodiy rivojlantirish dasturlarini amalga oshirish hamda respublika budjeti bilan bogʻliq boʻlgan qarorlar, farmoyishlarning loyihalari yoki takliflar tegishli ravishda Istiqbolni belgilash va statistika davlat qoʻmitasi, Moliya vazirligi va Mehnat vazirligi bilan moddiy-texnika taʼminoti masalalari boʻyicha — “Oʻzshartnomasavdo” davlat uyushmasi bilan, tashqi iqtisodiy faoliyat bilan bogʻliq boʻlgan masalalar boʻyicha — Tashqi iqtisodiy aloqalar vazirligi bilan kelishib olinishi kerak.

Qonunlar, qarorlar (farmoyishlar)ning loyihalari yuborilgan rahbarlar, agar boshqa muddat belgilanmagan boʻlsa, oʻzlari bilan kelishilayotgan qonun loyihalari boʻyicha 10 kalendar kun mobaynida, qaror loyihalari boʻyicha 3 kalendar kun, farmoyishlarning loyihalari boʻyicha esa koʻpi bilan 2 kalendar kun mobaynida xulosa berishlari lozim.

5. Vazirliklar, davlat qoʻmitalari, idoralar, korporatsiyalar, konsernlar, uyushmalar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining rahbarlari Vazirlar Mahkamasiga kiritilayotgan qonunlar, qarorlar, farmoyishlar loyihalarining asoslanganligi va sifati, keltirilgan maʼlumotlar va boshqa materiallarning toʻgʻriligi, shuningdek, ularning manfaatdor tashkilotlar bilan tegishli ravishda kelishib olinganligi uchun shaxsan javob beradilar.

Ushbu Ish tartibida koʻrsatilgan talablarga rioya qilinmasdan Vazirlar Mahkamasiga kiritilgan qonun, qaror, farmoyishlar loyihalari va respublikadagi tashkilotlarning murojaatlari zarur tartibda rasmiylashtirish uchun qaytariladi.

6. Tayyorlangan va kelishilgan qonun, qaror, farmoyishlarning loyihalari ularni Vazirlar Mahkamasi majlisida koʻrib chiqish uchun kiritish toʻgʻrisidagi masalani hal etish maqsadida Bosh vazir oʻrinbosarlari kotibiyatlari mudirlari tomonidan Bosh vazirning tegishli oʻrinbosariga taqdim etiladi.

7. Hujjatlarning boshqa turlarini tayyorlash va Vazirlar Mahkamasi rahbariyatiga bildirish tartibi, shuningdek, ular boʻyicha ijrochilarga topshiriqlar (koʻrsatmalar, rezolyutsiyalar)ni yetkazish tartibi Vazirlar Mahkamasi apparatida Ish yuritish boʻyicha yoʻriqnoma bilan belgilanadi.

IV. Vazirlar Mahkamasi va uning Rayosati majlislarini tayyorlash va oʻtkazish

1. Vazirlar Mahkamasining majlislari yilning har choragida kamida bir marta oʻtkaziladi. Vazirlar Mahkamasining doimiy organi sifatida Rayosat majlislari muntazam, har oyda kamida bir marta oʻtkaziladi. Majlislarni Vazirlar Mahkamasining Raisi yoki uning topshirigʻiga koʻra Oʻzbekiston Respublikasining Bosh vaziri olib boradi.

Zaruriyat tugʻilganda shoshilinch masalalarni koʻrib chiqish uchun Vazirlar Mahkamasi va uning Rayosatining rejadan tashqari majlislar oʻtkazilishi mumkin.

2. Vazirlar Mahkamasining Rayosati majlislariga Vazirlar Mahkamasining vakolatiga kiruvchi har qanday masalalar kiritiladi, “Oʻzbekiston Respublikasi Vazirlar Mahkamasi toʻgʻrisida” Oʻzbekiston Respublikasi Qonuniga muvofiq faqat Vazirlar Mahkamasi majlislarida koʻrib chiqiladigan masalalar bundan mustasnodir.

3. Vazirlar Mahkamasi va uning Rayosati majlislarida koʻrib chiqish uchun masalalarni tayyorlashni Bosh vazir oʻrinbosarlarining rahbarligida Bosh vazir oʻrinbosarlarining kotibiyatlari tegishli vazirliklar, davlat qoʻmitalari, idoralar, korporatsiyalar, konsernlar, uyushmalar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, mazkur Ish tartibiga muvofiq Vazirlar Mahkamasiga masala kiritish huquqiga ega boʻlgan davlat va xoʻjalik boshqaruvining boshqa organlari birgalikda amalga oshiradilar. Zarur hollarda masalalarni tayyorlashni Vazirlar Mahkamasi yoki uning Rayosati tomonidan tuziladigan komissiyalar amalga oshiradilar.

4. Majlis kun tartibi loyihasi Bosh vazir oʻrinbosarlarining kotibiyatlari takliflariga binoan majlis boshlanishidan kamida 10 kalendar kun oldin tayyorlanadi hamda Vazirlar Mahkamasining Raisi yoki uning topshirigʻiga binoan Bosh vazir bilan kelishiladi. Kun tartibi kelishilgandan keyin unga qoʻshimcha masalalar faqat ularning roziligi bilan kiritilishi mumkin.

5. Vazirlar Mahkamasi yoki uning Rayosati majlisiga kiritiladigan masalalar boʻyicha materiallar Bosh vazirning tegishli oʻrinbosari tomonidan koʻrib chiqiladi, u tayyorlangan masalalarning sifati uchun javob beradi.

Qaror loyihasi Bosh vazirning tegishli oʻrinbosari, yuridik boʻlim, boshqa manfaatdor boʻlimlar va Bosh vazir oʻrinbosarlarining kotibiyatlari tegishli vazirliklar, idoralar tomonidan imzolangan va Vazirlar Mahkamasining Axborot-tahlil boshqarmasida albatta muhokama (aprobatsiya)dan oʻtgan boʻlishi kerak.

Loyiha bilan bir vaqtda quyidagilar taqdim etiladi: muhokama qilish tartibi, majlisga taklif etiladigan mansabdor shaxslar roʻyxati, qaror loyihasining manfaatdor vazirliklar va idoralar bilan kelishilganligi toʻgʻrisidagi maʼlumotnoma, Bosh vazir oʻrinbosarlari kotibiyatining kiritilgan masalaning mohiyati qisqacha bayon qilingan xati.

Qaror loyihasini toʻliq kelishib olish imkoni boʻlmagan favqulotda hollarda kelishilmagan masalalar asoslashlar, mulohazalar va takliflar bilan birgalikda kelishilganlik toʻgʻrisidagi maʼlumotnomada koʻrsatilishi kerak.

6. Vazirlar Mahkamasi va uning Rayosati majlislarida koʻrib chiqish uchun kiritiladigan materiallar Bosh vazir oʻrinbosarlarining kotibiyatlari tomonidan majlisdan 7 kun oldin topshiriladi.

7. Vazirlar Mahkamasi yoki uning Rayosati majlisiga taklif etiladigan mansabdor shaxslar roʻyxati Vazirlar Mahkamasining Rayosati yoki uning topshirigʻiga binoan — Bosh vazir bilan kelishiladi.

Vazirliklar, davlat qoʻmitalari va idoralar, korporatsiyalar, konsernlar, uyushmalar, davlat va xoʻjalik boshqaruvi boshqa organlari rahbarlarini, Qoraqalpogʻiston Respublikasi Vazirlar Kengashi raisini, viloyatlar va Toshkent shahar hokimliklarini hamda majlisga taklif etiladigan boshqa shaxslarni xabardor qilish, shuningdek, ularning majlisga ketgan-kelmaganliklarini nazorat qilish tegishliligi boʻyicha Bosh vazir oʻrinbosarlari kotibiyatlari tomonidan amalga oshiriladi.

8. Vazirlar Mahkamasi majlisiga Konstitutsiyaviy sud raisi, bosh prokuror, Oʻzbekiston Respublikasi Oliy sudining raisi, Oliy xoʻjalik sudi raisi, Oʻzbekiston Respublikasi Prezidenti apparati Nazorat inspeksiyasi rahbari, Oʻzdavteleradio kompaniyasi, Markaziy bank, Tashqi iqtisodiy faoliyat milliy banki boshqaruvlarining raislari, OʻzA Bosh direktori, Makroiqtisodiyot va statistika vazirining oʻrinbosarlari, Qoraqalpogʻiston Respublikasi Vazirlar Kengashining Vazirlar Mahkamasi huzuridagi doimiy vakili, Oʻzbekiston Kasaba uyushmalari Federatsiyasi Kengashi raisi doimiy ravishda, viloyatlar va Toshkent shahar hokimlari va ularning oʻrinbosarlari, ommaviy axborot vositalari vakillari esa — zaruriyat boʻlganda taklif etiladilar. Boshqa mansabdor shaxslar majlisga faqat ularga daxldor masalalar boʻyicha taklif etiladilar.

9. Vazirlar Mahkamasi va uning Rayosati majlislarida Ishlar Boshqaruvchisining oʻrinbosarlari, Bosh vazir oʻrinbosarlari kotibiyatlari qatnashadilar. Vazirlar Mahkamasi apparatining boshqa masʼul xodimlari majlislarda tayyorlashda oʻzlari qatnashgan masalalar koʻrib chiqilayotganda ishtirok etadilar.

10. Majlis materiallari Vazirlar Mahkamasi yoki uning Rayosati aʼzolariga, tegishli masalalar boʻyicha materiallar esa majlisga taklif etiladigan boshqa mansabdor shaxslarga ham majlisdan kamida 3 kalendar kun oldin tarqatiladi.

Kun tartibi va majlis materiallarini tarqatish, Vazirlar Mahkamasi yoki uning Rayosati aʼzolarini, majlislarda doimiy ravishda qatnashadigan respublika idoralari rahbarlarini xabardor qilish, taklif etilganlarni roʻyxatga olish va majlisga xizmat koʻrsatish tegishli Bosh vazir oʻrinbosarlari kotibiyatlari bilan birgalikda Ishlar Boshqarmasi tomonidan amalga oshiriladi.

11. Vazirlar Mahkamasi yoki uning Rayosati majlislarida masalalar boʻyicha axborotlar Bosh vazirning oʻrinbosarlari, vazirlar, davlat qoʻmitalarining raislari, idoralar, davlat va xoʻjalik boshqaruvi boshqa organlarining rahbarlari, Qoraqalpogʻiston Respublikasi Vazirlar Kengashining raisi, viloyatlar va Toshkent shahar hokimlari, Bosh vazir oʻrinbosarlarining kotibiyatlari mudirlari tomonidan bayon qilinadi.

Muhokama etilayotgan masala boʻyicha maʼruza qilish uchun 10 minutgacha (rivojlanish istiqbollarini belgilash va respublika budjeti masalalari boʻyicha — 30 minutgacha), qoʻshimcha maʼruzalar va nutqlar uchun — 7 minutgacha, maʼlumot berish uchun — 3 minutgacha vaqt belgilanadi. Zarur hollarda majlisga raislik qiluvchi boshqa vaqtni belgilaydi.

12. Majlislarda qarorlar Vazirlar Mahkamasi va uning Rayosati aʼzolarining koʻpchilik ovozi bilan qabul qilinadi. Majlis tamom boʻlgandan keyin qabul qilingan qarorning aniq ifodalangan matni Bosh vazir oʻrinbosarlari kotibiyati mudiri tomonidan imzolangan holda majlis bayoniga kiritish uchun Umumiy boʻlimga beriladi. Majlis bayoni raislik qiluvchi tomonidan imzolanadi.

Vazirlar Mahkamasi va uning Rayosati majlislarida qabul qilingan hujjatlar qarorlar va farmoyishlar shaklida chiqariladi.

Shoshilinch tusdagi masalalar boʻyicha Vazirlar Mahkamasi yoki uning Rayosati ularning majlislari bayonida qayd etiladigan qarorlar qabul qilishi mumkin. Bunday qarorlar ijrochilarga majlis bayonidan koʻchirma holida yetkaziladi.

Majlis tamom boʻlgach qarorlar, farmoyishlar, majlis qarorlarining loyihalari hamda ular bilan bogʻliq boʻlgan boshqa materiallar Umumiy boʻlimga topshiriladi.

V. Vazirlar Mahkamasi qarorlarini rasmiylashtirish, tarqatish, eʼlon qilish va kuchga kiritish

1. Vazirlar Mahkamasi qarorlar, farmoyishlar va majlis qarorlarini qabul qiladi. Vazirlar Mahkamasining normativ tusdagi yoki muhim ahamiyatga ega boʻlgan hujjatlari qarorlar shaklida chiqariladi, shoshilinch va boshqa joriy masalalar boʻyicha hujjatlar Vazirlar Mahkamasining farmoyishlari yoki majlisning qarori shaklida chiqariladi.

2. Vazirlar Mahkamasi yoki uning Rayosati majlislarida muhokama etish davomida mulohazalar bildirilgan, qoʻshimchalar yoki oʻzgartirishlar kiritilgan qaror loyihalari tegishli Bosh vazir oʻrinbosarlari kotibiyatlari yoki majlislarda tuzilgan komissiyalar tomonidan puxta ishlanadi hamda, agar boshqa muddat belgilanmagan boʻlsa, majlis boʻlib oʻtgan kunning ertasiga imzolash uchun taqdim etiladi. Loyihalarga kiritiladigan oʻzgartirishlar Bosh vazirning tegishli oʻrinbosarlari va birinchi oʻrinbosari bilan kelishilishi kerak.

3. Ayrim shoshilinch masalalar yoki Vazirlar Mahkamasi Rayosatida muhokama etilishi zarur boʻlmagan masalalar boʻyicha qaror loyihalari Vazirlar Mahkamasi Rayosati aʼzolari bilan soʻrab bilish tartibida kelishiladi va rasmiylashtiriladi.

4. Vazirlar Mahkamasining qarorlari va farmoyishlari ular imzolangan sana boʻyicha rasmiylashtiriladi hamda tegishli Bosh vazir oʻrinbosarlarining kotibiyatlari tomonidan tuziladigan tarqatish roʻyxati boʻyicha darhol ijrochilarga tarqatiladi.

5. Vazirlar Mahkamasining normativ tusdagi qarorlari Oʻzbekiston Respublikasi Hukumatining Qarorlari toʻplamida eʼlon qilinadi.

Vazirlar Mahkamasining muhim yoki ularda nazarda tutilgan tadbirlar tezda amalga oshirilishi zarur boʻlgan qarorlari keng ommaga darhol yetkazilishi zarur boʻlganda, Vazirlar Mahkamasining Raisi yoki Bosh vazirning koʻrsatmasi bilan ommaviy axborot vositalari orqali umumxalqqa maʼlum qilinadi.

6. Vazirlar Mahkamasining normativ tusdagi qarorlarida ularni kuchga kiritish muddatlari koʻrsatiladi, boshqa hollarda ular imzolangan kundan boshlab kuchga kiradi.

Vazirlar Mahkamasining farmoyishlari ular imzolangan vaqtdan boshlab kuchga kiradi.

7. Vazirlar Mahkamasining eʼlon qilinishi kerak boʻlgan qarorlarining asl nusxalarida quyidagi yozuvlar boʻladi: “Oʻzbekiston Respublikasi Hukumatining qarorlari toʻplamida eʼlon qilinadi”, “Oʻzbekiston Respublikasi Hukumatining qarorlari toʻplamida va gazetalarda eʼlon qilinadi” va hokazo.

VI. Vazirlar Mahkamasining doimiy, vaqtinchalik komissiyalari va boshqa ishchi organlari

1. Davlat hokimiyati va boshqaruvi yuqori organlarining qarorlarini hayotga tatbiq etishga koʻmaklashish, Vazirlar Mahkamasi qabul qilgan hujjatlarning qanday bajarilayotganligini nazorat qilish hamda vazirliklar, davlat qoʻmitalari, idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, davlat va xoʻjalik boshqaruvining boshqa organlari faoliyatini muvofiqlashtirib borish maqsadida Vazirlar Mahkamasi tomonidan uning doimiy komissiyalari tuzilishi mumkin.

Vazirlar Mahkamasi ularning vazifalarini va xizmatlarni hamda faoliyat tartibini belgilaydi.

2. Davlat va xoʻjalik boshqaruvining alohida masalalari boʻyicha takliflar tayyorlash, Vazirlar Mahkamasi hujjatlari loyihalarini ishlab chiqish yuzasidan, shuningdek, Vazirlar Mahkamasining alohida topshiriqlarini bajarish uchun Vazirlar Mahkamasining vaqtinchalik komissiyalari va ishchi organlari tuzilishi mumkin.

3. Vazirlar Mahkamasining doimiy, vaqtinchalik komissiyalarining hamda ishchi organlarining hujjatlari majlis bayonlari bilan rasmiylashtiriladi hamda tegishli ijrochilarga yetkaziladi. Koʻrsatib oʻtilgan komissiyalar va ishchi organlarning majlis bayonlari ularga boshchilik qilayotgan rahbarlar tomonidan imzolanadi.

4. Doimiy komissiyalar tomonidan koʻrib chiqilishi kerak boʻlgan materiallarni tayyorlash hamda komissiyalar qarorlarining bajarilishini nazorat qilish Bosh vazir oʻrinbosarlari kotibiyatlari, ularga tashkiliy-texnikaviy xizmat koʻrsatish esa Ishlar Boshqarmasining boʻlinmasi tomonidan amalga oshiriladi. Zarurat boʻlganda bu materiallarni tayyorlashga vazirliklar, davlat qoʻmitalari, idoralar va boshqa manfaatdor tashkilotlarning mutaxassislari jalb qilinishi mumkin.

VII. Vazirlar Mahkamasida boshqa masalalarning koʻrib chiqilishi

Vazirlar Mahkamasining topshiriqlari vazirliklar, davlat qoʻmitalari, idoralar, korporatsiyalar, konsernlar, uyushmalar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, davlat va xoʻjalik boshqaruvining boshqa organlari tomonidan hujjat joʻnatilgan kundan boshlab 10 kalendar kun mobaynida (agar boshqa muddat belgilanmagan boʻlsa) bajarilishi kerak.

Bosh vazir oʻrinbosarlari kotibiyatlari kiritilgan materiallarni Vazirlar Mahkamasi rahbariyatiga bildirish uchun zarur hollarda oʻrganishni va puxta ishlab chiqishni 3 kun mobaynida, respublikani ijtimoiy-iqtisodiy rivojlantirish dasturlarini amalga oshirish bilan bogʻliq boʻlgan bir necha vazirliklar, davlat qoʻmitalari, idoralar va boshqalarning manfaatlariga tegishli puxta ishlab chiqishni talab qiladigan hujjatlar boʻyicha esa 10 kungacha muddatda (boshqa muddat belgilanmagan boʻlsa) taʼminlaydilar. Bajarish muddatlarini faqat topshiriqni imzolagan rahbar uzaytirishi mumkin.

Agar topshiriq bir necha ijrochiga taalluqli boʻlsa, u holda uni bajarishga masʼul boʻlgan vazirlik, davlat qoʻmitasi, idora, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Bosh vazir oʻrinbosarlari kotibiyatlari yoki muvofiqlashtirish (chaqirish) topshirilgan mansabdor shaxs uning bajarilishini tashkil etishga majburdir. Ijrochilar topshiriqlarning oʻz vaqtida bajarilishi uchun bab-baravar javob beradilar.

Topshiriqda qoʻyilgan masalalar hal qilingan yoki asosiy masala boʻyicha javob berilgan taqdirda u bajarilgan hisoblanadi.

VIII. Oʻzbekiston Respublikasining MDHdagi Muxtor vakolatxonasi

1. Oʻzbekiston Respublikasining MDHdagi Muxtor vakolatxonasi (Minsk shahridagi Muxtor vakolatxona) MDHda Oʻzbekiston Respublikasi nomidan vakillik qiladi hamda MDH davlat boshliqlari Kengashi va hukumat boshliqlari Kengashi majlislarini tashkiliy-texnik jihatdan tayyorlash va oʻtkazishni taʼminlash boʻyicha doimiy tezkor aloqani amalga oshiradi.

2. Oʻzbekiston Respublikasining MDHdagi Muxtor vakolatxonasi oʻz faoliyatini Vazirlar Mahkamasi tomonidan tasdiqlanadigan Nizomga, MDH davlat boshliqlari va hukumat boshliqlari Kengashi qabul qilgan normativ hujjatlarga muvofiq amalga oshiradi.

3. Oʻzbekiston Respublikasining MDHdagi Muxtor vakolatxonasi Vazirlar Mahkamasini Oʻzbekiston Respublikasiga taalluqli qarorlarning loyihalari, boshqa hujjatlar va tadbirlar haqida muntazam xabardor qilib turadi.

IX. Vazirlar Mahkamasi tomonidan nazorat qilish vakolatlarining amalga oshirilishi

1. Vazirlar Mahkamasi oʻzining vakolatiga kiruvchi masalalar boʻyicha vazirliklar, davlat qoʻmitalari, idoralar, davlat va xoʻjalik boshqaruvining boshqa organlari, viloyatlar va Toshkent shahar hokimliklari faoliyati ustidan muntazam nazoratni amalga oshiradi.

2. Vazirlar Mahkamasi qarorlarining, farmoyishlarining, majlis qarorlarining bajarilishini tashkil etish va nazorat qilish Bosh vazir oʻrinbosari kotibiyati tomonidan taʼminlanadi.

3. Vazirlar Mahkamasi vazirlarning, davlat qoʻmitalari raislarining, idoralar, korporatsiyalar, konsernlar, uyushmalar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari rahbarlarining Oʻzbekistonni ijtimoiy-iqtisodiy rivojlantirish boʻyicha topshiriqlarning qanday bajarilayotganligi, davlat budjetining ijrosi, shuningdek, davlat hokimiyati va boshqaruvi yuqori organlari qarorlarining bajarilishi toʻgʻrisidagi hisobotlarini muntazam ravishda eshitib boradi, ularning soʻzsiz roʻyobga chiqarilishini taʼminlash choralarini koʻradi.

4. Vazirlar Mahkamasi apparati, vazirliklar, davlat qoʻmitalari, idoralar, korporatsiyalar, konsernlar, uyushmalar, mahalliy boshqaruv organlari, korxonalar va tashkilotlarning nazorat ishi samaradorligini oshirish va tartibga solish maqsadida hujjatlar ijrosini nazorat qilishning yagona tartibi joriy qilinadi.

Hujjatlarning ijrosini nazorat qilish ishlarini tashkil etish Vazirlar Mahkamasi tomonidan tasdiqlanadigan Ish yuritish boʻyicha yoʻriqnoma hamda Hujjatlarning ijrosini va nazoratini tashkil etish tartibi bilan belgilanadi.

5. Bajarilgan qarorlarni nazoratdan chiqarish toʻgʻrisidagi qaror Vazirlar Mahkamasi Rayosati tomonidan qabul qilinadi.

X. Fuqarolarning xatlari, arizalari va shikoyatlarini koʻrib chiqish hamda keluvchilarni qabul qilish

1. Vazirlar Mahkamasi apparatida fuqarolarning xatlari, arizalari va shikoyatlari bilan ishlash hamda keluvchilarni qabul qilish tartibi tegishli Nizom bilan belgilanadi.

2. Fuqarolarning xatlari arizalari va shikoyatlari bilan ishlashni va keluvchilarni qabul qilishni tashkil etish uchun masʼuliyat Vazirlar Mahkamasining Fuqarolarni qabul qilish, xat va arizalarni koʻrib chiqish boʻlimi mudiriga, Bosh vazir oʻrinbosarlari kotibiyatlari mudirlariga yuklatiladi.

XI. Ish yuritish

Vazirlar Mahkamasi apparatida ish yuritish Bosh vazir tomonidan tasdiqlanadigan Yoʻriqnomaga muvofiq amalga oshiriladi.