Korxonalar va tashkilotlarning zarar koʻrib ishlashini bartaraf etish chora-tadbirlari toʻgʻrisida (574-son)

27.11.1993

Oʻzbekiston Respublikasi Vazirlar Mahkamasining

qarori

Korxona va tashkilotlarning zarar koʻrib ishlashini bartaraf etish, respublika xalq xoʻjaligini iqtisodiy isloh qilishni yanada chuqurlashtirish maqsadida Vazirlar Mahkamasi qaror qiladi:

1. Vazirliklar, idoralar, korporatsiyalar, konsernlar, uyushmalar va birlashmalar:

xoʻjasizlik, ishlab chiqarish xarajatlarini kamaytirishni taʼminlamaydigan asosiy fondlardan samarasiz foydalanish oqibatida zarar koʻrishga yoʻl qoʻygan korxona va tashkilotlarning rahbarlariga nisbatan lavozimidan boʻshatishga qadar qattiq choralar koʻrsinlar;

Davlat mulki qoʻmitasi bilan birgalikda zarar koʻrib ishlayotgan, past rentabelli korxona va tashkilotlarni 1-ilovaga* muvofiq xususiylashtirish va tugatishni bir oy mobaynida nihoyasiga yetkazsinlar;

* 1-ilova berilmaydi.

bir-birini takrorlagan holda ishlayotgan boʻgʻinlarni tugatish maqsadida tarmoqlarning tashkiliy tuzilmasini tartibga solsinlar;

ishlab chiqarish quvvatlaridan samarali foydalanish va koʻrsatiladigan xizmatlar uchun mablagʻlarning toʻliq tushishi, ortiqcha, foydalanilmayotgan asbob-uskunalar, tovar-moddiy boyliklar zaxiralarini sotish ustidan qattiq nazoratni taʼminlasinlar;

mahsulotlar (ishlar va koʻrsatiladigan xizmatlar) sifatini yaxshilasinlar, koʻrsatiladigan pulli xizmatlar doirasini kengaytirsinlar, ichki va tashqi bozorda raqobatga bardoshli tovarlar ishlab chiqarishni koʻpaytirsinlar.

2. Oʻzbekiston Respublikasi Moliya vazirligi (Boqiboyev):

zarar koʻrib ishlayotgan korxona va tashkilotlarga asossiz ravishda moliyaviy yordam koʻrsatishni toʻxtatsin;

2-ilovada* koʻrsatilgan korxonalar va tashkilotlarning zarar koʻrib ishlashi sabablarini muntazam ravishda tahlil qilib borsin, 1993-yil yakunlari boʻyicha ularning bundan buyon faoliyat koʻrsatishi toʻgʻrisida takliflar kiritsin.

* 2-ilova berilmaydi.

3. Oʻzbekiston Respublikasi Markaziy banki (Mullajonov) va Moliya vazirligi (Boqiboyev):

zarar koʻrib ishlayotgan korxonalar faoliyatini ikki hafta muddatda tahlil qilsinlar va ularga kreditlar berishni toʻxtatsinlar;

shu yilning 15-dekabrigacha oʻtkazilgan tahlillar yakunlariga koʻra, xoʻjasizlik, ishlab chiqarish xarajatlarini kamaytirish chora-tadbirlarini koʻrmaganlik tufayli zarar koʻrishga yoʻl qoʻygan korxonalarning hisob raqamlarini yopsinlar hamda ushbu korxonalar roʻyxatini respublika matbuotida eʼlon qilsinlar;

respublika ichida xoʻjalik organlari oʻrtasidagi hisob-kitoblarni tezlashtirish va soddalashtirish maqsadida ularning amaldagi tartibiga oʻzgartishlarni ishlab chiqsinlar hamda joriy etsinlar.

4. Vazirlar Mahkamasining majmuilari Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda vazirliklar, idoralar, korporatsiyalar, konsernlar va uyushmalarning tasarruflaridagi korxonalarning zarar koʻrib ishlashini bartaraf etish, moliyaviy ahvolini yaxshilash boʻyicha amalga oshirgan ishlari toʻgʻrisidagi hisobotlarini yilning har choragida koʻrib chiqsinlar.

5. “Oʻzavtotrans” davlat korporatsiyasi (Axmetov), Kommunal xizmat koʻrsatish vazirligi (Mixaylov), “Toshshahartranskorxona” davlat uyushmasi (Fayzullayev), “Oʻzdavkinokompaniya” (Joʻrayev) narx omilini hisobga olgan holda iqtisodiy ragʻbatlantirish va amaliy yordam koʻrsatish maqsadida zarar koʻrib ishlovchi korxonalar va tashkilotlarni mulkchilikning boshqa shakllariga aylantirish boʻyicha ularning tuzilmalarini qayta tashkil etish toʻgʻrisida ikki hafta muddatda Vazirlar Mahkamasiga takliflar kiritsinlar.

6. Mazkur qarorning bajarilishini nazorat qilish Vazirlar Mahkamasi majmuilari rahbarlari zimmasiga yuklatilsin.

Vazirlar Mahkamasining Raisi I. KARIMOV

Toshkent sh.,

1993-yil 27-noyabr,

574-son