Oʻzbekiston Respublikasi Tashqi ishlar vazirligida alohida topshiriqlar boʻyicha elchilar lavozimini joriy etish toʻgʻrisida (429-son)

26.08.1993

Oʻzbekiston Respublikasi Vazirlar Mahkamasining

qarori

Oʻzbekiston Respublikasi oliy rahbariyatining maxsus topshiriqlari va missiyalarini tezlik bilan amalga oshirish, xorijiy davlatlar va hukumatlarning rasmiy vakillari bilan muzokaralar olib borish, shuningdek, Oʻzbekiston Respublikasining tashqi siyosat yoʻlini amalga oshirish bilan bogʻliq boʻlgan boshqa oʻta muhim topshiriqlarni bajarish maqsadida Vazirlar Mahkamasi qaror qiladi:

1. Oʻzbekiston Respublikasi Tashqi ishlar vazirligida alohida topshiriqlar boʻyicha elchilar lavozimi joriy etilsin (1-ilova).

2. Oʻzbekiston Respublikasi Tashqi ishlar vazirligidagi alohida topshiriqlar boʻyicha elchi toʻgʻrisidagi Nizom tasdiqlansin.

3. Alohida topshiriqlar boʻyicha elchi maqomi, maishiy taʼminoti, tibbiy va transport xizmati koʻrsatish shart-sharoitlari boʻyicha vazir oʻrinbosariga tenglashtirilsin.

4. Oʻzbekiston Respublikasi Moliya vazirligi Oʻzbekiston Respublikasi Tashqi ishlar vazirligining alohida topshiriqlar boʻyicha elchilar lavozimi xarajatlari uchun respublika budjetidan zarur mablagʻlar ajratsin (3-ilova).

Vazirlar Mahkamasining Raisi I. KARIMOV

Toshkent sh.,

1993-yil 26-avgust,

429-son

Vazirlar Mahkamasining 1993-yil 26-avgustdagi 429-son qaroriga 1-ILOVA

Oʻzbekiston Respublikasi Tashqi ishlar vazirligining alohida topshiriqlar boʻyicha elchilar lavozimlarining

SONI

Vazirlar Mahkamasining 1993-yil 26-avgustdagi 429-son qaroriga 2-ILOVA

Oʻzbekiston Respublikasi Tashqi ishlar vazirligidagi alohida topshiriqlar boʻyicha elchi toʻgʻrisida

NIZOM

1. Alohida topshiriqlar boʻyicha elchi Tashqi ishlar vazirligi rahbar xodimlari tarkibiga kiradi hamda tashqi ishlar vazirining oʻrinbosariga tenglashtiriladi. Alohida topshiriqlar boʻyicha elchi lavozimiga tayinlash va undan ozod etish Oʻzbekiston Respublikasi Prezidentining farmoyishi bilan amalga oshiriladi.

2. Bu lavozimga davlat va jamoatchilik faoliyati tajribasiga hamda tashqi siyosat masalalarida puxta bilimga ega boʻlgan xodimlar tayinlanadilar.

3. Alohida topshiriqlar boʻyicha elchi bevosita vazirga boʻysunadi va oʻz xizmat vazifalarini vazirlik apparati boʻlinmalari, Oʻzbekiston Respublikasining chet ellardagi diplomatik va konsullik vakolatxonalari bilan oʻzaro hamkorlikda olib boradi.

4. Alohida topshiriqlar boʻyicha elchi topshiriqni bajarishda:

Oʻzbekiston Respublikasi Prezidentining farmonlari va farmoyishlariga, hukumatning qarorlariga asosan maxsus topshiriqlarni bajaradi, turli darajalardagi davlat hamda hukumat delegatsiyalariga rahbarlik qiladi, xorijiy davlatlar bilan muzokaralar olib boradi;

Oʻzbekiston Respublikasi tashqi siyosat yoʻlining aniq jihatlarini amalga oshirish boʻyicha takliflar tayyorlaydi;

chet davlatlar bilan munosabatlarda vazirlik nomidan ish koʻradi, vazirning topshirigʻiga binoan chet ellarga maxsus vakolatlar bilan yuboriladi;

chet mamlakatlar va xalqaro tashkilotlarning davlat arboblari hamda boshqa rasmiy kishilari bilan muzokaralar olib boradi, xalqaro va davlatlararo shartnomalar va bitimlarni tayyorlashda qatnashadi;

oʻz vakolati doirasida xalqaro ahvolni, tashqi va ichki siyosatni, chet davlatlarning ijtimoiy-iqtisodiy rivojlanishi jarayonlarini va xalqaro tashkilotlar faoliyatini oʻrganadi hamda tahlil qiladi.

5. Oʻz vazifalarini bajarish uchun alohida topshiriqlar boʻyicha elchi quyidagi huquqlarga egadir;

vazirlikka keladigan, shu jumladan yopiq aloqa yoʻli orqali keladigan, umumsiyosiy va muammoli axborotlarni olish, shuningdek, zarur hollarda Oʻzbekiston Respublikasining tegishli vazirliklari, idoralari hamda davlat tashkilotlariga axborot soʻrab murojaat qilish;

xat-xabarlarning mazmunini vazirlik rahbariyati bilan kelishgan holda idoralararo oʻzaro hamkorlikni talab etuvchi masalalar boʻyicha Oʻzbekiston Respublikasi vazirliklari va idoralari bilan, shuningdek, xorijiy davlatlarning diplomatik idoralari va ularning Toshkentda roʻyxatga olingan vakillari bilan aloqalar oʻrnatish va yozishmalar olib borish;

Tashqi ishlar vazirligining hududiy va boshqa boʻlinmalaridan oʻzini qiziqtiruvchi masalalar boʻyicha yozishmalar materiallarini talab qilib olish, topshiriqlar berish, shuningdek, oʻzi bajaradigan topshiriq doirasida boshqa tashkiliy tadbirlarni amalga oshirish;

chet elda boʻlish davrida Oʻzbekiston Respublikasining elchixonalari va xalqaro tashkilotlar huzuridagi vakolatxonalaridan uni xizmat va turar joy binolari, transport bilan taʼminlashda hamda uchrashuvlar va protokol tadbirlarini tashkil etishda zarur yordam olish;

vazirlik boʻlinmalarida faoliyat sohasi elchiga yuklatilgan missiyaga muvofiq keladigan shifrli yozuvlar bilan tanishish va ishlash huquqi beriladi.

6. Alohida topshiriqlar boʻyicha elchi oʻz faoliyatida Oʻzbekiston Respublikasi qonunlariga, Oʻzbekiston Respublikasi Prezidentining farmonlari va farmoyishlariga, Hukumatning qarorlari va farmoyishlariga, tashqi ishlar vazirining buyruqlari va koʻrsatmalariga, boshqa normativ hujjatlarga, shuningdek, mazkur nizomga amal qiladi.

7. Alohida topshiriqlar boʻyicha elchi vazirlik rahbariyatining topshirigʻi oʻz vaqtida va puxta bajarilishi, davlat va xizmat siri saqlanishi uchun javob beradi.

8. Alohida topshiriqlar boʻyicha elchi Tashqi ishlar vazirligining alohida topshiriqlar boʻyicha elchilar guruhiga kiradi, uning shtat soni va lavozim tarkibi, kotib va katta inspektor ham shu jumlaga kiradi, Tashqi ishlar vazirligi apparatining shtat jadvali bilan belgilanadi.

Vazirlar Mahkamasining 1993-yil 26-avgustdagi 429-son qaroriga 3-ILOVA

Tashqi ishlar vazirligi xodimlarining qoʻshimcha soniga 1993-yil 1-avgustdan boshlab

shtat jadvali