Navoiy-Uchquduq-Sultonuizdogʻ-Nukus temir yoʻlini qayta qurush va uning yangi liniyasini qurish masalalari toʻgʻrisida (394-son)

06.08.1993

Oʻzbekiston Respublikasi Vazirlar Mahkamasining

qarori

Yangi yerlarni, foydali qazilmalar konlarini kompleks oʻzlashtirish, temir yoʻlda yuk tashishning transport taʼminotini yaxshilash, Navoiy viloyati va Qoraqalpogʻiston Respublikasi yangi mintaqalarning ishlab chiqarish va ijtimoiy masalalarini hal etish, Oʻzbekistonning yagona temir yoʻl tarmogʻini shakllantirish maqsadida Vazirlar Mahkamasi qaror qiladi:

1. Navoiy—Uchquduq, Sultonuizdogʻ—Nukus yoʻnalishlaridagi temir yoʻlni elektrlashtirgan holda qayta qurish hamda Uchquduq—Sultonuizdogʻ yoʻnalishida yangi temir yoʻlni elektrlashtirgan holda qurish maqsadga muvofiq deb hisoblansin.

2. 1994—2000-yillarda qayta qurish va qurishni boshlash va nihoyasiga yetkazish muddatlari ilovaga* muvofiq, qurilishning buyurtmachisi etib — Oʻrta Osiyo temir yoʻl boshqarmasi, temir yoʻl transporti ishlab chiqarish va noishlab chiqarish sohalari obyektlarini loyihalash va qurish boʻyicha bosh pudratchi etib – “Oʻzbektransqurilish” uyushmasi belgilansin.

Navoiy—Uchquduq—Sultonuizdogʻ—Nukus yangi temir yoʻlini elektrlashtirilgan holda qurish va qayta qurishni amalga oshirish respublikaning davlat maqsadli dasturi hisoblansin.

*Ilova rus tilidagi matnda berilgan.

3. Xorazm viloyati va Qoraqalpogʻistonning janubiy tumanlarining respublikaning temir yoʻl magistraliga chiqishlarini taʼminlagan holda uzunligi 120 kilometrli Sultonuizdogʻ—Toʻrtkul—Lenin yoʻli temir yoʻl uchastkasi qurilishi davom ettirilsin.

4. Energetika va elektrlashtirish vazirligi, “Oʻzbekneftgaz” milliy korporatsiyasi, Kommunal xizmat koʻrsatish vazirligi, Oʻzbekiston Respublikasi Aloqa vazirligi Oʻrta Osiyo temir yoʻli va “Oʻzbektransqurilish” uyushmasining topshirigʻi boʻyicha bosh pudratchilar sifatida belgilangan muddatlarda mavjud elektruzatish liniyalarini, gaz va neft oʻtkazish quvurlarini, aloqa qurilmalari va boshqa muhandislik kommunikatsiyalarni buyurtmachining mablagʻi hisobiga boshqa joyga koʻchirishni va yangilarini qurishni taʼminlasinlar.

5. “Oʻzistiqbolstat” davlat qoʻmitasi 1994—2005-yillar kapital qurilish prognozida Oʻrta Osiyo temir yoʻl boshqarmasiga temir yoʻl liniyalarini loyihalash, qurish va qayta qurish uchun respublika budjetidan zarur kapital mablagʻlarni ajratishni nazarda tutsin. 1993-yilda loyihalash ishlari oʻz mablagʻlari, u yetishmagani taqdirda bank kreditlari hisobiga amalga oshirilsin.

6. Oʻzbekiston Respublikasi Markaziy bankiga, davlat hamda aksionerlik — tijorat banklariga loyihalash, obyektlar qurilishida bajarilgan ishlarning haqiqiy hajmlari boʻyicha imtiyozli shartlarda mablagʻ bilan taʼminlashni amalga oshirish tavsiya etilsin.

7. “Oʻzbektransqurilish” uyushmasi boʻlinmalari tomonidan bajarilayotgan ish hajmlarining koʻpayib borayotganligi hamda yangi temir yoʻl liniyasi qurilishi va qayta qurilishi zonasidagi pudrat tashkilotlarining zarur mexanizmlar bilan yetarli taʼminlanmaganligi munosabati bilan loyiha – smeta hujjatlarida ishlab chiqarish bazalarni rivojlantirish uchun smeta qiymatining 10 foizi miqdorida mablagʻ ajratish nazarda tutilsin.

8. “Oʻzshartnomasavdo” uyushmasi, “Oʻzqurilishmateriallari” konserni hamda respublikaning boshqa taʼminot—sotuv tashkilotlari temir yoʻl liniyalari qurilishi va qayta qurilishi qatnashchi—tashkilotlariga kvotalangan mahsulotlarni birkitilgan nomenklaturasi boʻyicha tasdiqlangan kapital mablagʻlar miqdoriga qarab ajratilishini amalga oshirsinlar, shuningdek, shartnomaviy narxlar boʻyicha mahsulot yetkazib beruvchilar bilan xoʻjalik aloqalarini oʻrnatishda koʻmaklashsinlar.

9. Qoraqalpogʻiston Respublikasi Vazirlar Kengashi va Navoiy viloyati hokimligi:

Oʻrta Osiyo temir yoʻl boshqarmasi va “Oʻzbektransqurilish” uyushmasi bilan birgalikda belgilangan tartibda temir yoʻl liniyalari, muhandislik va transport kommunikatsiyalari, boshqa obyektlar qurilishi va qayta qurilishi uchun yer maydonlarini ajratishni amalga oshirsinlar;

“Oʻzbeksavdo” uyushmasi, “Oʻzbekbirlashuv” va “Oʻzbektransqurilish” uyushmasi bilan birgalikda qurilishga jalb qilingan ishchilarga ijtimoiy-maishiy sharoitlar yaratilishini, ularni joylashtirishni va ovqatlanishlarini tashkil etishni taʼminlasinlar;

temir yoʻl liniyalari qurilishi va qayta qurilishi ishlariga qurilish boʻlinmalarini ularning mexanizmlari va odam resurslari bilan jalb etish imkoniyatlari koʻrib chiqilsin.

10. Vazirliklar, idoralar, uyushmalar, korporatsiyalar yangi temir yoʻl qurilishi va qayta qurilishida bevosita qatnashuvchi loyihalash, qurilish, montaj, ishga tushirish-sozlash tashkilotlari ishchilari va mutaxassislari va ekspluatatsiya qiluvchi mutaxassislarga tarif stavkalari va lavozim okladlari 30 foizgacha oshirilgan holda, ushbu sarflar qurilish smetasiga kiritgan taqdirda ish haqi toʻlashni amalga oshirsinlar.

Xizmat safariga yuborilayotganlar uchun bir sutkalik xarajatlar miqdori belgilangan eng kam ish haqining 10 foizi miqdorida belgilansin.

11. Oʻzbekiston Respublikasi Davlat tabiatni muhofaza qilish qoʻmitasi Navoiy—Uchquduq—Sultonuizdogʻ—Nukus temir yoʻl liniyasi qurilishi va qayta qurilishi loyihasining texnik-iqtisodiy asosining ekologik ekspertizasini oʻtkazsin hamda ushbu obyektning atrof muhitga taʼsiri toʻgʻrisida xulosa tayyorlasin.

12. Ushbu qarorning bajarilishini nazorat qilish Bosh vazirning oʻrinbosari K.N Toʻlaganov zimmasiga yuklatilsin.

Vazirlar Mahkamasining Raisi I. KARIMOV

Toshkent sh.,

1993-yil 6-avgust,

394-son