Jahon iqtisodiyoti va diplomatiya universitetiga talabalar qabul qilish toʻgʻrisida (365-son)

20.07.1993

Oʻzbekiston Respublikasi Vazirlar Mahkamasining

qarori

Iqtidorli yoshlarni tanlash hamda respublikaning barcha mintaqalari uchun xalqaro siyosiy, iqtisodiy va huquqiy munosabatlar sohasida yuqori malakali mutaxassislar tayyorlash maqsadida Vazirlar Mahkamasi qaror qiladi:

1. Jahon iqtisodiyoti va diplomatiya universitetiga 1993-94 oʻquv yilida qabul qilinadigan talabalar soni 200 nafar qilib belgilansin.

2. Viloyatlarning universitetda 1993-94 oʻquv yilida xalqaro mutaxassis kadrlar tayyorlashga boʻlgan ehtiyojlari maʼlumot uchun qabul qilinsin (ilova qilinmoqda)*.

*ilova berilmaydi

3. Jahon iqtisodiyoti va diplomatiya universitetiga kirish hujjatlarini qabul qilish muddati Buxoro davlat universiteti bazasida Buxoro, Samarqand, Navoiy, Qashqadaryo va Surxondaryo viloyatlari, Andijon davlat universiteti bazasida Andijon, Namangan va Fargʻona viloyatlari, Urganch davlat universiteti bazasida Xorazm viloyati va Qoraqalpogʻiston Respublikasi abituriyentlari uchun joriy yilning 25-iyuligacha uzaytirilsin.

Andijon, Buxoro va Xorazm viloyatlari hokimliklari koʻrsatib oʻtilgan oliy oʻquv yurtlari bazasida abituriyentlarning hujjatlarini qabul qilib olishni tashkil etish uchun tegishli shart-sharoitlar yaratsinlar.

4. Viloyat gazetalarida Jahon iqtisodiyoti va diplomatiya universitetiga talabalar qabul qilishning yangi shartlari eʼlon qilinsin.

5. Oʻzbekiston Respublikasi Vazirlar Mahkamasining 1993-yil 14-iyundagi 283-son qarorining 4 va 6-bandlariga oʻzgarish kiritilib, Jahon iqtisodiyoti va diplomatiya universitetida, zamonaviy kompyuter texnikasini qoʻllagan holda, tegishli fanlar boʻyicha chet (ingliz, fransuz, nemis) tilida maxsus test sinovlari oʻtkazilsin.

Test sinovlari joriy yilning 2—6-avgustida Toshkent shahrida Jahon iqtisodiyoti va diplomatiya universiteti bazasida tashkil etilsin.

6. Ijtimoiy adolatni taʼminlash maqsadida ishchilar va qishloq xoʻjaligi sohasi xodimlari oilalariga mansub boʻlgan yetim abituriyentlar uchun imtiyozlar nazarda tutilsin.

7. Viloyatlar hokimlari koʻp bolali oilalarga mansub boʻlgan muhtoj abituriyentlarga Jahon iqtisodiyoti va diplomatiya universitetida test sinovlaridan oʻtish uchun Toshkent shahriga borishda yordam koʻrsatsinlar.

8. Jahon iqtisodiyoti va diplomatiya universiteti talabalar bilan shartnomalar tuzish qoidasini va ularni universitetda oʻqitish bahosini ishlab chiqsin va tasdiqlasin.

9. Oʻzbekiston Respublikasi Vazirlar Mahkamasi huzuridagi Davlat komissiyasi 1993-94 oʻquv yilida Jahon iqtisodiyoti va diplomatiya universitetiga talabalar qabul qilish tartibi toʻgʻrisidagi Nizomni 3 kun muddatda ishlab chiqsin va tasdiqlasin.

10. Mazkur qarorning bajarilishini nazorat qilish Bosh vazir oʻrinbosari Q. Qoraboyev zimmasiga yuklatilsin.

Vazirlar Mahkamasining Raisi I. KARIMOV

Toshkent sh.,

1993-yil 20-iyul,

365-son