“Oʻzdavmetallkonsern”ning kon-ruda korxonalarini rivojlantirish toʻgʻrisida (331-son)

03.07.1993

Oʻzbekiston Respublikasi Vazirlar Mahkamasining

qarori

Metallurgiya sanoati korxonalarini rivojlantirish Konsepsiyasiga muvofiq hamda Ingichka kon boshqarmasi va Qoʻytosh volfram koni ishlab chiqarish quvvatlaridan yanada toʻlaroq foydalanish, volfram konsentratini barqaror ishlab chiqarishni taʼminlash, shuningdek, Ingichka (Samarqand viloyati) va Qoʻytosh (Jizzax viloyati) shaharchalarining ijtimoiy-ishlab chiqarish sohasini rivojlantirish maqsadida Vazirlar Mahkamasi qaror qiladi:

1. “Oʻzdavmetallkonsern” manfaatdor tashkilotlar bilan birgalikda 1993—1997-yillarda 422 mln soʻm miqdoridagi kredit resurslari hamda 3083 mln soʻm miqdoridagi markazlashtirilgan manbalar hisobiga Ingichka kon boshqarmasi va Qoʻytosh volfram koni obyektlari qurilishini ilovaga* muvofiq belgilangan muddatlarda taʼminlasin.

* ilova berilmaydi.

Markaziy bankka 1993-yilda “Oʻzsanoatqurilishbank”ka yiliga 5 foizli toʻlov bilan, Ingichka kon boshqarmasi va Qoʻytosh volfram koniga shaxtalar qurish uchun zarur boʻlgan 422 mln soʻm miqdorida kredit resurslari berish tavsiya etilsin.

Ingichka kon boshqarmasiga va Qoʻytosh volfram koniga ayni bir vaqtda, ilovaga muvofiq, obyektlarni loyihalashga va qurishga hamda qurilish-montaj ishlari uchun haq toʻlashni haqiqatda bajarilgan ish hajmlari boʻyicha amalga oshirishga ruxsat etilsin.

2. “Oʻzistiqbolstat” davlat qoʻmitasi va Oʻzbekiston Respublikasi Moliya vazirligi har yili kapital qurilish rejalaridan ilovada koʻrsatilgan obyektlarni markazlashtirilgan manbalar hisobiga qurishni nazarda tutsinlar.

3. Ingichka kon boshqarmasining va Qoʻytosh volfram konining moliya-iqtisodiy ahvolini yaxshilash hamda Ingichka va Qoʻytosh shaharchalari ijtimoiy soha obyektlarining bir maromda ishlashini taʼminlash maqsadida:

1993—1997-yillarda koʻrsatib oʻtilgan korxonalarga amortizatsiya ajratmalarining butun summasini qoldirishga hamda ularni resurs toʻlovlarini toʻlashdan va budjetdan tashqari “Mineral xomashyo bazasini qayta tiklash” jamgʻapmaciga ajratmalardan ozod qilishga ruxsat etilsin;

1993-yilda Ingichka kon boshqarmasiga va Qoʻytosh koniga, ularning ish faoliyatini taʼminlash uchun, taqdim etilgan hisob-kitoblarga muvofiq respublika budjetidan 500 mln. soʻm miqdorida bir yoʻla moliyaviy yordam puli ajratilsin.

4. Oʻzbekiston Respublikasi Davlat tabiatni muhofaza qilish qoʻmitasi ilovaga muvofiq obyektlar qurilishi loyihalarini tezkorlik bilan va oʻz vaqtida ekspertizadan oʻtkazishni taʼminlasin.

5. “Oʻzshartnomasavdo” davlat uyushmasi qurilish davri uchun 1993—1997-yillarda Ingichka kon boshqarmasiga va Qoʻytosh volfram koniga moddiy resurslarning kvotalanadigan turlarini ajratishni nazarda tutsin, shuningdek, ularni, yetkazib beruvchi zavodlar shartlari boʻyicha, toʻgʻridan toʻgʻri shartnomalarga binoan yetkazib berishga koʻmaklashsin.

6. Samarqand va Jizzax viloyatlarining hokimliklari Ingichka kon boshqarmasi hamda Qoʻytosh volfram koni bilan birgalikda, mahalliy xomashyodan foydalangan holda, xalq isteʼmol tovarlari ishlab chiqaradigan kichik korxonalar shoxobchalarini tashkil etsinlar.

7. Ushbu qarorning bajarilishini nazorat qilish Bosh vazir oʻrinbosari oʻrtoq A.N. Voznenko zimmasiga yuklatilsin.

Vazirlar Mahkamasining Raisi I. KARIMOV

Toshkent sh.,

1993-yil 3-iyul.,

331-son